વડોદરામાં પૂર્વ ક્રિકેટર યુસુફ પઠાણે પરિવાર સાથે મતદાન કર્યું, લોકોને કરી જાગૃતિની અપીલ

Yusuf Pathan voting Vadodara: વડોદરામાં મતદાનને લઈને સ્થાનિકોમાં ઉત્સાહ જોવા મળ્યો હતો. પૂર્વ ભારતીય ક્રિકેટર અને હાલમાં તૃણમૂલ કોંગ્રેસના સાંસદ યુસુફ પઠાણે પણ પોતાના પરિવાર સાથે મતદાન કરીને લોકશાહી પ્રત્યેની પોતાની જવાબદારી નિભાવી હતી.

નાગરિકોને મતાધિકારનો ઉપયોગ કરવા પ્રેરિત કર્યા
મતદાન બાદ યુસુફ પઠાણે નાગરિકોને પણ પોતાના મતાધિકારનો ઉપયોગ કરવા પ્રેરિત કર્યા હતા. તેમણે જણાવ્યું કે મતદાન માત્ર અધિકાર જ નહીં પરંતુ જવાબદારી પણ છે અને દરેક વ્યક્તિએ સમજદારીપૂર્વક તેનો ઉપયોગ કરવો જોઈએ. યુસુફ પઠાણે વધુમાં જણાવ્યું કે, "મત આપતી વખતે એવા ઉમેદવારને પસંદ કરવો જોઈએ જે લોકો માટે કામ કરે, તેમની સમસ્યાઓને સમજે અને વિકાસ માટે પ્રતિબદ્ધ રહે. તેમણે કહ્યું કે સારો પ્રતિનિધિ તે જ હોય છે જે લોકો વચ્ચે રહીને તેમની વાત સાંભળે અને તેમના પ્રશ્નોના નિરાકરણ માટે સતત પ્રયત્નશીલ રહે. મતદાન દ્વારા આપણે એવા નેતાને પસંદ કરીએ જે આપણું પ્રતિનિધિત્વ કરે અને સમાજના વિકાસમાં યોગદાન આપે.

કોણ છે યુસુફ પઠાણ?
યુસુફ પઠાણનો જન્મ વડોદરાના એક ગુજરાતી પઠાણ પરિવારમાં થયો હતો. તેઓ ભારતીય ક્રિકેટ ટીમના ભૂતપૂર્વ ખેલાડી ઈરફાન પઠાણના મોટા ભાઈ છે. ક્રિકેટ ક્ષેત્રમાં તેમણે નોંધપાત્ર યોગદાન આપ્યું છે અને પોતાની આક્રમક બેટિંગ માટે જાણીતા રહ્યા છે. તેમના વ્યક્તિગત જીવનની વાત કરીએ તો તેમણે 27 માર્ચ 2013ના રોજ મુંબઈમાં રહેતી ફિઝિયોથેરાપિસ્ટ આફરીન ખાન સાથે લગ્ન કર્યા હતા. તેમના પરિવારમાં પત્ની અને એક પુત્ર પણ છે.

સામાજિક પ્રવૃત્તિઓમાં પણ સક્રિય
ક્રિકેટ સિવાય યુસુફ પઠાણ સામાજિક પ્રવૃત્તિઓમાં પણ સક્રિય રહ્યા છે. તેઓ 'યુથ અગેઇન્સ્ટ રેપ' જેવી પહેલ સાથે જોડાયેલા રહ્યા છે, જે સમાજમાં જાગૃતિ લાવવા અને યુવાનોને યોગ્ય દિશામાં પ્રેરિત કરવાનો પ્રયાસ કરે છે. રમતગમતમાં પણ તેમની ઉપલબ્ધિઓ નોંધપાત્ર રહી છે. ઓક્ટોબર 2015 સુધી રણજી ટ્રોફીમાં સૌથી ઝડપી અડધી સદી બનાવવાનો રેકોર્ડ તેમના નામે હતો, જે પછી બંદીપ સિંહે 15 બોલમાં તોડી નાખ્યો હતો.

રાજકારણમાં યુસુફ પઠાણ કેવી રીતે પ્રવેશ્યા?
રાજકારણમાં તેમના પ્રવેશની વાત કરીએ તો યુસુફ પઠાણે 2024ની લોકસભા ચૂંટણીમાં તૃણમૂલ કોંગ્રેસના ઉમેદવાર તરીકે પશ્ચિમ બંગાળના બહેરામપુર મતવિસ્તારમાંથી ચૂંટણી લડી હતી. આ ચૂંટણીમાં તેમણે કોંગ્રેસના અનુભવી નેતા અધીર રંજન ચૌધરીને નોંધપાત્ર અંતરથી હરાવીને જીત મેળવી હતી. આ જીત તેમની રાજકીય કારકિર્દી માટે મહત્વપૂર્ણ સાબિત થઈ હતી.