Raksha Bandhan 2026: રક્ષાબંધનના દિવસે બહેન ભાઈના કાંડા પર રાખડી બાંધીને તેના સુખ, સમૃદ્ધિ અને દીર્ઘાયુ માટે પ્રાર્થના કરે છે. પરંતુ શું તમે જાણો છો કે કેટલીક હિન્દુ ધાર્મિક પરંપરાઓમાં ભાઈને રાખડી બાંધતા પહેલા ભગવાનને રાખડી અથવા રક્ષાસૂત્ર અર્પણ કરવાની માન્યતા છે? માન્યતા અનુસાર, કોઈપણ શુભ કાર્યની શરૂઆત ભગવાન ગણેશની પૂજાથી કરવામાં આવે છે. તેથી રક્ષાબંધન પર પણ પ્રથમ રાખડી ભગવાનને અર્પણ કરવાનો ક્રમ શુભ માનવામાં આવે છે.
સૌથી પહેલા ભગવાન ગણેશને રાખડી બાંધો
રક્ષાબંધનના દિવસે સ્નાન કરીને સ્વચ્છ વસ્ત્રો ધારણ કર્યા બાદ પૂજા સ્થાન પર ભગવાન ગણેશની પૂજા કરી શકાય છે. સૌપ્રથમ ગણેશજીને કંકુ અથવા સિંદૂરનો ચાંદલો કરો, ત્યારબાદ અક્ષત અર્પણ કરી આરતી ઉતારો. આ પછી ભગવાન ગણેશને રાખડી અથવા રક્ષાસૂત્ર બાંધવામાં આવે છે અને મીઠાઈનો ભોગ ધરાવવામાં આવે છે. ધાર્મિક માન્યતા અનુસાર ભગવાન ગણેશને પ્રથમ પૂજ્ય માનવામાં આવતા હોવાથી શુભ કાર્ય પહેલાં તેમની પૂજા કરવાથી કાર્યમાં વિઘ્નો દૂર થાય તેવી શ્રદ્ધા છે.
ત્યારબાદ લડ્ડુ ગોપાલને રાખડી અર્પણ કરો
ભગવાન ગણેશ બાદ ઘરના મંદિરમાં બિરાજમાન લડ્ડુ ગોપાલ એટલે કે ભગવાન શ્રીકૃષ્ણને રાખડી બાંધી શકાય છે. ઘણા ઘરોમાં ભગવાનને નાના કદની રાખડીથી શણગારવાની પરંપરા પણ જોવા મળે છે. લડ્ડુ ગોપાલને રાખડી અર્પણ કરતી વખતે પરિવારની સુખ-શાંતિ, સમૃદ્ધિ અને સૌના કલ્યાણ માટે પ્રાર્થના કરવામાં આવે છે. ઘરના મંદિરમાં અન્ય દેવી-દેવતાઓની મૂર્તિઓ હોય તો તેમને પણ રક્ષાસૂત્ર અર્પણ કરી શકાય છે.
દેવતાઓ બાદ ભાઈને બાંધો રાખડી
દેવતાઓને રાખડી અર્પણ કર્યા બાદ ભાઈને રાખડી બાંધવાનો ક્રમ રાખવામાં આવે છે. બહેન સૌપ્રથમ ભાઈના કપાળ પર કંકુ-ચોખાનું તિલક કરે છે. ત્યારબાદ અક્ષત અર્પણ કરીને આરતી ઉતારે છે અને તેના કાંડા પર રાખડી બાંધે છે. રાખડી બાંધ્યા બાદ ભાઈને મીઠાઈ ખવડાવવામાં આવે છે. બહેન પોતાના ભાઈના સારા સ્વાસ્થ્ય, સુખ, સમૃદ્ધિ અને દીર્ઘાયુ માટે પ્રાર્થના કરે છે. ભાઈ પણ બહેનની હંમેશા રક્ષા કરવાનો અને દરેક મુશ્કેલીમાં તેની સાથે ઊભા રહેવાનો સંકલ્પ લે છે.
ભગવાનને પહેલા રાખડી શા માટે?
રક્ષાબંધન માત્ર ભાઈ-બહેનના પ્રેમ અને રક્ષણનો તહેવાર નથી, પરંતુ તેમાં શુભતા અને આશીર્વાદની ભાવના પણ જોડાયેલી છે. તેથી કેટલીક ધાર્મિક પરંપરાઓમાં પહેલા ભગવાનને રક્ષાસૂત્ર અર્પણ કરીને તેમના આશીર્વાદ મેળવ્યા બાદ ભાઈને રાખડી બાંધવાનું શુભ માનવામાં આવે છે. જો, કે વિવિધ પરિવારો અને પ્રાદેશિક પરંપરાઓ પ્રમાણે રાખડી બાંધવાનો ક્રમ અલગ હોઈ શકે છે. તેથી આને ધાર્મિક પરંપરા અને માન્યતા તરીકે જોવું જોઈએ, ફરજિયાત નિયમ તરીકે નહીં.
