Maha Shivratri 2026: મહાશિવરાત્રી ભગવાન શિવ અને માતા પાર્વતીના પવિત્ર મિલનનું પ્રતિક માનવામાં આવે છે. ધાર્મિક માન્યતા અનુસાર આ દિવસે શિવલિંગની વિધિપૂર્વક પૂજા કરવાથી વિશેષ ફળ મળે છે. અવિવાહિત યુવતીઓ યોગ્ય જીવનસાથીની ઇચ્છા સાથે આ વ્રત રાખે છે, જ્યારે વિવાહિત મહિલાઓ દાંપત્ય જીવનની સુખ-સમૃદ્ધિ અને પરિવારના કલ્યાણ માટે ઉપવાસ કરે છે.
હિંદુ ધર્મનો અતિ પવિત્ર તહેવાર: મહાશિવરાત્રી
મહાશિવરાત્રી હિંદુ ધર્મનો અતિ પવિત્ર અને મહત્વપૂર્ણ તહેવાર છે. હિંદુ પંચાંગ મુજબ આ તહેવાર ફાગણ મહિનાના કૃષ્ણ પક્ષની ચતુર્દશી તિથિએ ઉજવવામાં આવે છે. માન્યતા છે કે આ દિવસે નિયમપૂર્વક વ્રત અને પૂજા કરવાથી જીવનના દુઃખો દૂર થાય છે અને સુખ-સમૃદ્ધિ પ્રાપ્ત થાય છે. હવે પ્રશ્ન એ છે કે, વ્રત ક્યારે શરૂ કરવું અને પારણ ક્યારે કરવું યોગ્ય રહેશે? ચાલો જાણીએ વિગતવાર માહિતી.
મહાશિવરાત્રી વ્રત 2026નો સમય
વર્ષ 2026માં મહાશિવરાત્રીનું વ્રત 15 ફેબ્રુઆરી 2026ના રોજ સવારે 5:17 વાગ્યાથી માનવામાં આવશે. વ્રતનું પારણ 16 ફેબ્રુઆરી 2026ના રોજ સવારે 6:59 વાગ્યા પછી કરવાનું રહેશે. વ્રત દરમિયાન અન્નનું સેવન કરવાની મનાઈ છે. ભક્તો ફળ, દૂધ અને અન્ય ફરાળી વસ્તુઓ લઈ શકે છે. શક્ય હોય તો આ રાત્રે જાગરણ કરવું ખૂબ શુભ માનવામાં આવે છે.
મહાશિવરાત્રી 2026 પૂજા મુહૂર્ત
નિશિતા કાળ પૂજા: 15 ફેબ્રુઆરી 2026ની રાત્રે 12:09 થી 01:01 સુધી રહેશે.
રાત્રિ પ્રથમ પ્રહર પૂજા: સાંજે 6:11 થી 9:23 સુધી રહેશે.
રાત્રિ દ્વિતીય પ્રહર પૂજા: રાત્રે 9:23 થી 16 ફેબ્રુઆરીના 12:35 સુધી રહેશે.
રાત્રિ તૃતીય પ્રહર પૂજા: 16 ફેબ્રુઆરીએ રાત્રે 12:35 થી 3:47 સુધી રહેશે.
રાત્રિ ચતુર્થ પ્રહર પૂજા: 16 ફેબ્રુઆરીએ વહેલી સવારે 3:47 થી 6:59 સુધી રહેશે.
મહાશિવરાત્રી વ્રત વિધિ
બ્રહ્મમુહૂર્તમાં ઉઠીને શુદ્ધ સ્નાન કરો અને મનમાં વ્રતનો સંકલ્પ લો. ત્યારબાદ શિવલિંગનું ગંગાજળ, દૂધ અને બીલીપત્રથી પૂજન કરો. નિયમપૂર્વક આરાધના કરો. આખો દિવસ સંયમ રાખો અને કોઈ પણ પ્રકારનું અનાજ ગ્રહણ ન કરો. જરૂર મુજબ ફળ, દૂધ અથવા સાબુદાણા જેવી ફરાળી વસ્તુઓ લઈ શકો છો. સાંજે ફરીથી ભગવાન શિવની આરતી કરો. શિવ મહિમાની કથા વાંચો અથવા સાંભળો. રાત્રે ભજન-કીર્તન અથવા મંત્ર જાપ સાથે જાગરણ કરવું શુભ માનવામાં આવે છે. "ૐ નમઃ શિવાય" મંત્રનો સતત જાપ કરો. શ્રદ્ધાપૂર્વક રુદ્રાભિષેક જરૂર કરો. બીજા દિવસે સવારે 7 વાગ્યા પછી પૂજા પૂર્ણ કરીને વિધિ મુજબ વ્રતનું પારણ કરો.
