Janmashtami Midnight Puja Muhurat: કાન્હાના જન્મોત્સવની આતુરતાપૂર્વક રાહ જોઈ રહેલા શ્રદ્ધાળુઓ માટે આ વર્ષની જન્માષ્ટમી અત્યંત વિશેષ અને ફળદાયી રહેવાની છે. મંદિરોમાં સજાવેલી મનોહર ઝાંખીઓ, લડ્ડુ ગોપાલનો દિવ્ય શૃંગાર અને મધ્યરાત્રિએ ગૂંજતો "નંદ ઘેર આનંદ ભયો, જય કન્હૈયા લાલ કી" નો નાદ... વર્ષ 2026માં ભગવાન શ્રીકૃષ્ણનો જન્મોત્સવ 4 સપ્ટેમ્બર, 2026 શુક્રવારના રોજ દેશભરમાં ભક્તિભાવપૂર્વક ઉજવવામાં આવશે.
15 વર્ષ પછી જન્માષ્ટમી પર ત્રિવેણી સંયોગ
ધાર્મિક માન્યતાઓ અનુસાર ભગવાન શ્રીકૃષ્ણનો જન્મ ભાદરવા મહિનાના વદ પક્ષની અષ્ટમી તિથિ, રોહિણી નક્ષત્ર અને અડધી રાત્રે થયો હતો. વર્ષ 2026માં 4 સપ્ટેમ્બરની રાત્રે અષ્ટમી તિથિ, રોહિણી નક્ષત્ર અને વૃષભ રાશિમાં ચંદ્રની ઉપસ્થિતિનો વિશેષ સંયોગ બની રહ્યો છે. આવા દુર્લભ સંયોગમાં શ્રીકૃષ્ણની આરાધના કરવાથી તમામ મનોકામનાઓ પૂર્ણ થાય છે અને જીવનના કષ્ટો દૂર થાય છે.
તિથિ અને પૂજાનું શુભ મુહૂર્ત
અષ્ટમી તિથિ પ્રારંભ: 4 સપ્ટેમ્બર 2026, રાત્રે 2.25 વાગ્યાથી
અષ્ટમી તિથિ સમાપ્ત: 5 સપ્ટેમ્બર 2026, રાત્રે 12.13 વાગ્યા સુધી
ઉદયાતિથિ અને જન્મોત્સવ તારીખ: 4 સપ્ટેમ્બર, 2026(શુક્રવાર)
નિશીથ કાલ (મધ્યરાત્રિ) પૂજા મુહૂર્ત: 4 સપ્ટેમ્બર રાત્રે 11.57 વાગ્યાથી 5 સપ્ટેમ્બર રાત્રે 12.43 વાગ્યા સુધી (કુલ સમયગાળો: 46 મિનિટ)
લડ્ડુ ગોપાલની પૂજન વિધિ અને આરાધના
જન્માષ્ટમીના દિવસે ઘરના પૂજા સ્થળને ગંગાજળથી પવિત્ર કરી લડ્ડુ ગોપાલની મૂર્તિ સ્થાપિત કરવી. મધ્યરાત્રિએ (12 વાગ્યે) કાનુડાનો જન્મ કરાવીને તેમને પંચામૃત (દૂધ, દહીં, ઘી, મધ, સાકર) થી સ્નાન કરાવવું. ત્યારબાદ સ્વચ્છ નવા વસ્ત્ર પહેરાવી, મોરપીંછ, વાંસળી અને મુગટથી સુંદર શૃંગાર કરવો. શ્રદ્ધાળુઓએ લડ્ડુ ગોપાલને પારણામાં બિરાજમાન કરી ભક્તિભાવથી ઝૂલાવવા અને આરતી કરવી.
કાન્હાને પ્રિય ભોગ અને તુલસી દલનું મહત્વ
ભગવાન શ્રીકૃષ્ણને માખણ અને સાકર (મિશ્રી) અત્યંત પ્રિય છે. પૂજા દરમિયાન માખણ-મિશ્રી ઉપરાંત ધાણાની પંજરી, પંચામૃત, ઋતુફળ, સુકો મેવો અને મિઠાઈનો ભોગ ધરાવવો. ખાસ ધ્યાનમાં રાખવું કે ભગવાનને અર્પણ કરાતા નૈવેદ્ય કે ભોગમાં તુલસી પત્ર (તુલસી દલ) અવશ્ય મૂકવું, કારણ કે તુલસી વગર શ્રીકૃષ્ણ ભોગ સ્વીકારતા નથી.
જન્માષ્ટમી પૂજન અને દ્વારકા-મથુરા ઉત્સવ અંગે વિશેષ માહિતી
દ્વારકા અને મથુરામાં મહાઉત્સવ: ભગવાન શ્રીકૃષ્ણની જન્મભૂમિ મથુરા અને કર્મભૂમિ દ્વારકાધામ ખાતે જન્માષ્ટમી પર કરોડો શ્રદ્ધાળુઓ ઉમટી પડે છે. દ્વારકાધીશ જગત મંદિરમાં રાત્રે 12 વાગ્યે કાનુડાનો જન્મ થતાં જ 21 તોપોની સલામી અને મહાઆરતી યોજાય છે.
પારણાના નિયમો: જે ભક્તો જન્માષ્ટમીનો ઉપવાસ રાખે છે તેઓ મધ્યરાત્રિએ પૂજા અને અર્ઘ્ય અર્પણ કર્યા પછી અથવા બીજા દિવસે (5 સપ્ટેમ્બરે) રોહિણી નક્ષત્ર સમાપ્ત થયા બાદ વ્રતના પારણા કરી શકે છે.
જન્માષ્ટમીનું આધ્યાત્મિક મહત્વ: ભગવદ્ ગીતા મુજબ જ્યારે પણ પૃથ્વી પર અધર્મ વધે છે ત્યારે ધર્મની સ્થાપના માટે શ્રીકૃષ્ણ અવતાર લે છે. જન્માષ્ટમીનો ઉત્સવ આપણને સત્ય, નિષ્કામ કર્મ અને ભક્તિના માર્ગે ચાલવાની પ્રેરણા આપે છે.
