Chandra Grahan August 2026 Raksha Bandhan: હિન્દુ ધર્મ અને જ્યોતિષશાસ્ત્રમાં સૂર્યગ્રહણ અને ચંદ્રગ્રહણ બંનેને અશુભ ઘટનાઓ માનવામાં આવે છે. આ સમયગાળા દરમિયાન કોઈપણ પ્રકારના માંગલિક કાર્યો કે પૂજા-પાઠ કરવાની સખત મનાઈ હોય છે. સામાન્ય દિવસોમાં આપણે જે કામો સહજતાથી કરીએ છીએ, તેમાંથી ઘણા કામો ગ્રહણ કાળ દરમિયાન વર્જિત માનવામાં આવે છે. ઓગસ્ટ 2026માં રક્ષાબંધનના પવિત્ર તહેવારના દિવસે જ વર્ષનું બીજું અને અંતિમ ચંદ્રગ્રહણ થવા જઈ રહ્યું છે. આવામાં અનેક મહિલાઓના મનમાં પ્રશ્ન થાય છે કે શું ગ્રહણ કાળ દરમિયાન સજવા-સંવરવાનું કે મેકઅપ (શૃંગાર) કરવાનું યોગ્ય છે કે નહીં?
28 ઓગસ્ટે લાગશે વર્ષનું છેલ્લું ચંદ્રગ્રહણ
વર્ષ 2026ના ઓગસ્ટ મહિનામાં કુલ બે ગ્રહણનો સંયોગ બન્યો છે. જેમાંથી આ વર્ષનું પહેલું સૂર્યગ્રહણ 12 ઓગસ્ટના રોજ લાગી ચૂક્યું છે. હવે આ વર્ષનું બીજું અને છેલ્લું ચંદ્રગ્રહણ 28 ઓગસ્ટ, 2026ના રોજ થવા જઈ રહ્યું છે. શાસ્ત્રો અનુસાર ગ્રહણ કાળ દરમિયાન અનેક વિશેષ નિયમોનું પાલન કરવામાં આવે છે. શૃંગાર, વાળ ઓળવા કે નખ કાપવા જેવી બાબતોને લઈને પણ ચોક્કસ ધાર્મિક માન્યતાઓ અને નિયમો દર્શાવવામાં આવ્યા છે.
ગ્રહણ કાળમાં શૃંગાર કરવો સાચો કે ખોટો?
ધાર્મિક માન્યતાઓ અને શાસ્ત્રો અનુસાર, ગ્રહણ કાળ દરમિયાન મહિલાઓએ શૃંગાર કરવો, વાળ ઓળવા કે નખ કાપવાથી બચવું જોઈએ. માનવામાં આવે છે કે ગ્રહણ દરમિયાન વાતાવરણમાં નકારાત્મક ઊર્જાનો પ્રભાવ ખૂબ જ વધારે હોય છે. હિન્દુ પરંપરામાં શૃંગારને પવિત્રતા અને સૌભાગ્યનું પ્રતિક માનવામાં આવે છે. ખાસ કરીને પરણેલી મહિલાઓ માટે સુહાગથી જોડાયેલી વસ્તુઓ અત્યંત પવિત્ર હોય છે. ગ્રહણના અશુભ સમયમાં આવી પવિત્ર વસ્તુઓ કે શૃંગાર ધારણ કરવાથી દામ્પત્ય જીવનમાં નકારાત્મકતા આવી શકે છે. તેથી પરિણિત અને અપરિણિત બંને મહિલાઓને આ સમયે મેકઅપ કરવાથી દૂર રહેવાની સલાહ આપવામાં આવે છે.
શું ભારતમાં દેખાશે આ ચંદ્રગ્રહણ?
28 ઓગસ્ટે થવા જઈ રહેલું આ ચંદ્રગ્રહણ ભારતમાં દૃશ્યમાન (દેખાશે) નહીં થાય. આનું મુખ્ય કારણ એ છે કે જે સમયે ગ્રહણ લાગશે તે સમયે ભારતમાં દિવસનો સમય હશે અને ચંદ્ર ક્ષિતિજથી નીચે રહેશે. જેના કારણે દેશના કોઈપણ ભાગમાંથી ચંદ્ર દર્શન શક્ય બનશે નહીં. ભારતમા આ ગ્રહણ દેખાવાનું ન હોવાથી અહીં સૂતક કાળ પણ માન્ય રહેશે નહીં. આ દિવસે શ્રાવણ માસની પૂર્ણાહુતિ પણ થશે અને દેશભરમાં રક્ષાબંધનનો તહેવાર કોઈ પણ વિઘ્ન વગર ધામધૂમથી ઉજવાશે.
દુનિયાના કયા દેશોમાં દેખાશે 2026નું આ ચંદ્રગ્રહણ?
ભારતમાં આ ગ્રહણ અદૃશ્ય રહેશે, પરંતુ વિશ્વના અન્ય દેશોમાં તે સ્પષ્ટપણે જોઈ શકાશે. વર્ષ 2026નું આ છેલ્લું ચંદ્રગ્રહણ યુરોપ, ઉત્તર અમેરિકા, દક્ષિણ અમેરિકા અને આફ્રિકા ખંડના કેટલાક ભાગોમાંથી જોઈ શકાશે. જે દેશોમાં આ ગ્રહણ દેખાશે ત્યાં ગ્રહણના તમામ ધાર્મિક નિયમો અને સૂતક કાળનું પાલન કરવું અનિવાર્ય રહેશે.
