Kerala Govt Orders Vigilance Probe Against CEC Gyanesh Kumar: કેરળ સરકારે મુખ્ય ચૂંટણી કમિશનર (CEC) જ્ઞાનેશ કુમાર સામેના ભ્રષ્ટાચાર અને લાંચના જૂના કેસમાં તપાસ માટે સત્તાવાર મંજૂરી આપી દીધી છે. આ મામલો તેમના કેરળમાં પબ્લિક વર્ક્સ ડિપાર્ટમેન્ટ (PWD)ના સચિવ તરીકેના કાર્યકાળ સાથે જોડાયેલો છે. રાજ્ય સરકારના આ પગલાથી રાજકીય વર્તુળોમાં ભારે ચર્ચા જાગી છે, કારણ કે આ મામલો વર્ષો જૂનો હોવા છતાં હવે ફરીથી ચર્ચામાં આવ્યો છે.
શું છે સમગ્ર મામલો અને ₹2 કરોડની લાંચનો આરોપ?
મીડિયા રિપોર્ટ્સ અને સત્તાવાર માહિતી મુજબ, આ વિવાદ ત્યારે શરૂ થયો જ્યારે એક કોન્ટ્રાક્ટર દ્વારા એવા ગંભીર આરોપો મૂકવામાં આવ્યા કે જ્ઞાનેશ કુમારે તેમના PWD સચિવ પદના કાર્યકાળ દરમિયાન એક રોડ પ્રોજેક્ટના બાકી નીકળતા બિલ પાસ કરવા માટે રૂપિયા 2 કરોડની લાંચ માગી હતી. આ પ્રોજેક્ટ 'PATI-BEL' નામના કન્સોર્ટિયમ હેઠળ થિરુવનંતપુરમથી અંગમાલી વચ્ચેના મેન સેન્ટ્રલ રોડના નિર્માણ સાથે સંકળાયેલો હતો. બિલ સમયસર પાસ ન થવાને કારણે કંપની અને અધિકારીઓ મુશ્કેલીમાં મુકાયા હતા.
મલેશિયન એન્જિનિયરની આત્મહત્યા સાથે કડીઓ જોડાયાનો દાવો
આ પ્રકરણમાં સૌથી સંવેદનશીલ પાસું મલેશિયાઈ કંપનીના પ્રોજેક્ટ ઓફિસર લી સી બિન (Lee See Been) ની દુઃખદ આત્મહત્યાનું છે. ફરિયાદી અને સંબંધિત પક્ષોનો દાવો છે કે PWD દ્વારા બિલના ચુકવણામાં જાણી જોઈને કરવામાં આવેલા વિલંબ અને આર્થિક દબાણના કારણે તે એન્જિનિયર ભારે માનસિક તણાવમાં આવ્યા હતા. એવું પણ કહેવામાં આવી રહ્યું છે કે આ સમગ્ર દબાણ અને કથિત લાંચની માગણી પાછળ તેમને આત્યંતિક પગલું ભરવું પડ્યું હતું.
કાનૂની પ્રક્રિયા અને ભ્રષ્ટાચાર વિરોધી કાયદા હેઠળ તપાસ
ભ્રષ્ટાચાર નિવારણ અધિનિયમ (Prevention of Corruption Act) ની કલમ 17A હેઠળ કોઈપણ મોટા અધિકારી વિરુદ્ધ તપાસ શરૂ કરવા માટે સરકારની પૂર્વ મંજૂરી અનિવાર્ય હોય છે. આ કાનૂની પ્રક્રિયા અને વિજિલન્સ વિભાગની સલાહ લીધા બાદ કેરળ સરકારે હવે આ પ્રારંભિક તપાસ માટેનો રસ્તો સાફ કર્યો છે. અગાઉ વર્ષ 2006માં પણ આ મામલે પ્રાથમિક તપાસ થઈ હતી અને બાદમાં કાર્યવાહી બંધ થઈ હતી, પરંતુ હવે નવી ફરિયાદો સામે આવતા વિજિલન્સ એન્ડ એન્ટી કરપ્શન બ્યુરો (VACB) દ્વારા મામલાની નવેસરથી તપાસ હાથ ધરવામાં આવશે.
