USA Amazon Plane Crash: અમેરિકાના ફ્લોરિડામાં આવેલા મિયામી ઈન્ટરનેશનલ એરપોર્ટ પર ગંભીર વિમાન દુર્ઘટના સર્જાઈ હતી. એમેઝોનનું એક કાર્ગો વિમાન લેન્ડિંગ દરમિયાન રન-વે પરથી લપસી ગયું હતું અને ત્યારબાદ એરપોર્ટની બહાર અનેક વાહનો સાથે અથડાયું હતું. અકસ્માતમાં અત્યાર સુધીમાં 5 લોકોનાં મોત થયા હોવાના અહેવાલ છે.
લેન્ડિંગ દરમિયાન અનિયંત્રિત થયું વિમાન
મળતી માહિતી મુજબ, એમેઝોન પ્રાઈમનું કાર્ગો વિમાન લેન્ડિંગ કરી રહ્યું હતું ત્યારે કોઈ કારણોસર વિમાન અનિયંત્રિત બન્યું હતું. લેન્ડિંગ બાદ વિમાન રન-વે પરથી લપસી ગયું અને રન-વેની હદ પાર કરીને આગળ વધ્યું હતું. ત્યારબાદ વિમાન અનેક વાહનો સાથે અથડાતાં મોટો અકસ્માત સર્જાયો હતો. ઘટનાને પગલે એરપોર્ટ પર અફરાતફરીનો માહોલ સર્જાયો હતો. દુર્ઘટનાની ગંભીરતાને ધ્યાનમાં રાખીને એરપોર્ટના રન-વે અને ટેક્સી-વે બંધ કરવાની ફરજ પડી હતી. જેના કારણે એરપોર્ટ પર ફ્લાઈટનું સંચાલન ખોરવાયું હતું અને મોટી સંખ્યામાં મુસાફરોને મુશ્કેલીનો સામનો કરવો પડ્યો હતો.
250 ફ્લાઈટના સંચાલન પર અસર
વિમાન દુર્ઘટનાની અસર એરપોર્ટના હવાઈ ટ્રાફિક પર પણ જોવા મળી હતી. રવિવાર સુધીમાં આશરે 250 ફ્લાઈટના સંચાલનને અસર થઈ હોવાનું જાણવા મળ્યું છે. અનેક ફ્લાઈટ મોડી પડી હતી અથવા તેમના શેડ્યૂલમાં ફેરફાર કરવાની ફરજ પડી હતી. હાલ અકસ્માતનું ચોક્કસ કારણ સામે આવ્યું નથી. સંબંધિત એજન્સીઓ દ્વારા ઘટનાની તપાસ હાથ ધરવામાં આવી છે. વિમાન રન-વે પરથી શા માટે લપસ્યું અને વાહનો સાથે કેવી રીતે અથડાયું તે અંગે તપાસ બાદ વધુ વિગતો સામે આવવાની શક્યતા છે.
