Typhoon Champi Hits Taiwan:તાઇવાનમાં કુદરતે પોતાનો રૌદ્ર સ્વરૂપ બતાવ્યો છે, જ્યાં 'ચાંપી' (Champi) નામના શક્તિશાળી વાવાઝોડાએ ભારે તબાહી મચાવી છે. આ વાવાઝોડાના કારણે સમગ્ર દેશમાં જનજીવન સંપૂર્ણપણે અસ્તવ્યસ્ત થઈ ગયું છે. શનિવારના રોજ આવેલા આ ભયાનક વાવાઝોડાની ઝપેટમાં આવીને એક વ્યક્તિનું કરુણ મૃત્યુ થયું છે, જ્યારે 500 કરતાં વધુ લોકો ઘાયલ થયા હોવાના અહેવાલ છે. હવામાન વિભાગના જણાવ્યા અનુસાર, આ વાવાઝોડું પ્રશાંત મહાસાગરમાં આ વર્ષે ઉદ્ભવેલા સૌથી શક્તિશાળી વાવાઝોડાં પૈકીનું એક હતું, જેણે તાઇવાનના દરિયાકાંઠાના વિસ્તારોમાં ભારે નુકસાન પહોંચાડ્યું છે.
126 કિમીની ઝડપે ફૂંકાયેલા પવને મચાવ્યો કહેર
તાઇવાનના સેન્ટ્રલ વેધર એડમિનિસ્ટ્રેશન (CWA) દ્વારા આપવામાં આવેલી માહિતી મુજબ, શરૂઆતમાં આ એક 'સુપર ટાયફૂન' તરીકે સક્રિય હતું. જો કે તાઇવાનના ઉત્તરપૂર્વીય દરિયાકાંઠા નજીક પહોંચતા તે થોડું નબળું જરૂર પડ્યું, પરંતુ તેમ છતાં તેના કેન્દ્રની આસપાસ પવનની ઝડપ પ્રતિ કલાક 126 કિલોમીટર જેટલી અતિશય ખતરનાક નોંધાઈ હતી. આટલી પ્રચંડ ગતિએ ફૂંકાયેલો પવન અને મુશળધાર વરસાદને કારણે રસ્તાઓ પર અનેક વિશાળ વૃક્ષો જમીનદોસ્ત થઈ ગયા હતા અને અનેક વિસ્તારોમાં વીજળીનો પુરવઠો પણ સંપૂર્ણપણે ઠપ થઈ ગયો હતો.
લિયુચીઉ ટાપુ પર દુર્ઘટના અને લાખ્ખો ઘરોમાં અંધારપટ
આ ભયાનક કુદરતી આફતમાં તાઇવાનના લિયુચીઉ ટાપુ પર દરિયાના તોફાની મોજાંમાં તણાઈ જવાથી એક વ્યક્તિનું દુઃખદ મોત નીપજ્યું હતું. ભારે પવન અને અવિરત વરસાદ વચ્ચે જુદી-જુદી દુર્ઘટનાઓમાં કુલ 527 લોકો ઈજાગ્રસ્ત થયા છે, જેમને ત્વરિત સારવાર માટે હોસ્પિટલે ખસેડવામાં આવ્યા હતા. તાઇવાનની મુખ્ય વીજળી કંપની 'તાઇપાવર'ના જણાવ્યા અનુસાર, વાવાઝોડાના કારણે 1.67 લાખથી વધુ ઘરોમાં અંધારપટ છવાઈ ગયો હતો. જો કે, તંત્ર દ્વારા યુદ્ધના ધોરણે કામગીરી હાથ ધરીને મોટાભાગના વિસ્તારોમાં વીજળીનો પુરવઠો પૂર્વવત કરી દેવામાં આવ્યો છે.
તાઇપેઈ સહિત અનેક શહેરોમાં શાળાઓ અને કચેરીઓ બંધ
વાવાઝોડાની આ ગંભીર સ્થિતિને ધ્યાનમાં રાખીને તાઇવાનના ઉત્તરીય અને મધ્ય ભાગના મોટાભાગના વિસ્તારોમાં પ્રશાસન દ્વારા સતત બીજા દિવસે પણ શાળાઓ, કલેક્ટર કચેરીઓ અને સરકારી-ખાનગી સંસ્થાઓ બંધ રાખવાનો મોટો નિર્ણય લેવામાં આવ્યો હતો. દેશની રાજધાની તાઇપેઈમાં પણ આ નિયમ કડકાઈથી લાગુ કરવામાં આવ્યો હતો. સુરક્ષાના ભાગરૂપે અનેક ઉડાનો (Flights) રદ કરવામાં આવી હતી. જોકે, તાઇવાનમાં વાવાઝોડા સામેડ લડવાની મજબૂત સિસ્ટમ અને પૂર્વ તૈયારીઓ હોવાના કારણે મોટી જાનહાનિ ટાળી શકાઈ છે. સામાન્ય રીતે આવા વાવાઝોડાં ઉનાળામાં વધુ ત્રાટકતા હોય છે, પરંતુ પાનખર ઋતુમાં પણ આ પ્રકારની આફતો આવવી એ ચિંતાનો વિષય છે.
હવે ચીન અને જાપાન તરફ આગળ વધી રહ્યું છે તોફાન
તાઇવાનમાં પોતાની વિનાશલીલા બતાવ્યા બાદ હવે આ 'ચાંપી' વાવાઝોડું ઉત્તર તરફ આગળ વધી રહ્યું છે. હવામાન વિભાગની આગાહી મુજબ, આ વાવાઝોડું હવે ચીનના દરિયાકાંઠા તરફ આગળ વધી રહ્યું છે અને ત્યારબાદ તે દક્ષિણ જાપાન તરફ ફંટાઈ શકે છે. આ પરિસ્થિતિને જોતાં ચીન અને જાપાનના સંબંધિત દરિયાકાંઠાના વિસ્તારોમાં હાઈ એલર્ટ જાહેર કરી દેવામાં આવ્યું છે. સ્થાનિક પ્રશાસન દ્વારા નાગરિકોને દરિયા કિનારાથી દૂર રહેવા અને સુરક્ષિત સ્થળોએ ખસી જવાની કડક સૂચનાઓ આપવામાં આવી રહી છે.
