Donald Trump on Iran War: અમેરિકામાં તાજેતરમાં યોજાયેલી મિડટર્મ ચૂંટણીમાં રિપબ્લિકન પાર્ટીને મોટો રાજકીય ઝટકો લાગ્યા બાદ રાષ્ટ્રપતિ ડોનાલ્ડ ટ્રમ્પના વલણમાં નરમાઈ જોવા મળી રહી છે. ઈરાન સાથે ચાલી રહેલા સંઘર્ષ વચ્ચે ટ્રમ્પે સંકેત આપ્યો છે કે જો બંને દેશો વચ્ચેની વાતચીત સફળ રહેશે અને કોઈ મજબૂત સમજૂતી થશે, તો અમેરિકા ફરીથી સૈન્ય કાર્યવાહી નહીં કરે. જોકે, તેમણે ઈરાનને પરમાણુ હથિયાર હાંસલ કરવાની મંજૂરી નહીં આપવાની વાત પણ સ્પષ્ટ કરી છે.
ઈરાન સાથે મજબૂત સમજૂતી થાય તો ટળી શકે છે યુદ્ધCNN સાથેની ટેલિફોનિક વાતચીત દરમિયાન ટ્રમ્પે જણાવ્યું હતું કે હવે ઘણું બધું ઈરાન સાથેની વાટાઘાટો પર નિર્ભર છે. જો ઈરાન કોઈ મજબૂત અને વ્યાપક સમજૂતી પર હસ્તાક્ષર કરવા તૈયાર થશે, તો સંઘર્ષને આગળ વધારવાની જરૂર નહીં પડે. ટ્રમ્પે સ્વીકાર્યું કે તાજેતરની વાતચીતમાં પ્રગતિ જોવા મળી છે. જોકે, તેમણે ફરી એકવાર સ્પષ્ટ કર્યું કે અમેરિકા કોઈપણ સંજોગોમાં ઈરાનને પરમાણુ હથિયાર વિકસાવવા દેશે નહીં.
એક કલાકમાં 38 પુલ તબાહ કરવાની ટ્રમ્પની ધમકીવાતચીત દ્વારા વિવાદ ઉકેલવાની આશા વ્યક્ત કરવાની સાથે ટ્રમ્પે અમેરિકન સેનાની તાકાતનો પણ ઉલ્લેખ કર્યો હતો. તેમણે દાવો કર્યો કે અમેરિકન સેનાએ ઈરાનના 38 પુલ સહિત અનેક મહત્ત્વપૂર્ણ માળખાકીય સ્થળોને નિશાન પર રાખ્યાં છે. જરૂર પડ્યે આ સ્થળોને માત્ર એક કલાકમાં નષ્ટ કરી શકાય છે. જોકે, ટ્રમ્પે કહ્યું કે તેઓ ઈરાનના માળખાકીય વિકાસને સંપૂર્ણપણે તબાહ કરવા માંગતા નથી, કારણ કે તેનું પુનર્નિર્માણ કરવામાં આશરે 10 વર્ષ લાગી શકે છે.
મિડટર્મ ચૂંટણીમાં હાર બાદ ટ્રમ્પ પર વધ્યું દબાણટ્રમ્પનું આ નિવેદન એવા સમયે સામે આવ્યું છે જ્યારે 3 નવેમ્બરે યોજાયેલી મિડટર્મ ચૂંટણીમાં ડેમોક્રેટિક પાર્ટીને મોટી જીત મળી છે. ચૂંટણીમાં રિપબ્લિકન પાર્ટીને મળેલા ઝટકાને કારણે ટ્રમ્પ પર રાજકીય દબાણ વધ્યું છે. સંસદનાં બંને ગૃહોમાં ડેમોક્રેટ્સની સ્થિતિ મજબૂત બનતાં ઈરાન સાથેના સંઘર્ષ, સરકારી ખર્ચ અને અન્ય નીતિઓ અંગે ટ્રમ્પને સવાલોનો સામનો કરવો પડી શકે છે. હવે ઈરાન સાથેની વાટાઘાટો કઈ દિશામાં આગળ વધે છે અને બંને દેશો વચ્ચે કોઈ સ્થાયી સમજૂતી થાય છે કે નહીં, તેના પર સૌની નજર રહેશે.
