Thailand seeks Indias support to join BRICS: અમેરિકાના રાષ્ટ્રપતિ ડોનાલ્ડ ટ્રમ્પ દ્વારા BRICS (બ્રાઝિલ, રશિયા, ભારત, ચીન અને દક્ષિણ આફ્રિકા) જૂથને સતત ટીકાનું નિશાન બનાવવામાં આવે છે, છતાં દક્ષિણ-પૂર્વ એશિયાની મહત્વપૂર્ણ અર્થવ્યવસ્થા થાઇલેન્ડે BRICSમાં પૂર્ણ સભ્યપદ મેળવવા માટે તેના પ્રયાસોને વધુ સક્રિય બનાવ્યા છે. BRICSને ટ્રમ્પે વારંવાર 'એન્ટી અમેરિકન બ્લોક' ગણાવ્યું હોવા છતાં, આ દાવાઓનો પ્રાદેશિક રાજનીતિ પર ખાસ કોઈ પ્રભાવ જોવા મળતો નથી. થાઇલેન્ડે BRICSમાં જોડાવા માટે તેના મહત્વપૂર્ણ વ્યૂહાત્મક ભાગીદાર ભારત પાસેથી સત્તાવાર સમર્થનની અપીલ કરી છે.
સભ્યપદ પ્રક્રિયા માટે સકારાત્મક ભૂમિકા ભજવે
આ સંદર્ભે, થાઇલેન્ડના વિદેશ મંત્રી સિહાસક ફુઆંગકેટકેઓ તાજેતરમાં ભારતની મુલાકાતે આવી દ્વિપક્ષીય બેઠક માટે વિદેશ મંત્રી એસ. જયશંકર સાથે મળ્યા. બેઠક દરમિયાન થાઈ વિદેશ મંત્રીએ BRICSમાં જોડાવાની સ્પષ્ટ ઈચ્છા વ્યક્ત કરી. તેમણે જણાવ્યું કે થાઇલેન્ડ ઈચ્છે છે કે ભારત BRICSના ભાવિ વિકાસમાં તેની સભ્યપદ પ્રક્રિયા માટે સકારાત્મક ભૂમિકા ભજવે. થાઇ વિદેશ મંત્રાલયે નિવેદનમાં કહ્યું છે કે થાઈલેન્ડ ASEAN, APEC અને BIMSTEC જેવા મંચોને BRICS સાથે જોડતો સેતુ બની શકે છે, અને આ પ્રયાસોમાં ભારતની ભૂમિકા અત્યંત મહત્ત્વપૂર્ણ ગણાય છે. નોંધનીય છે કે ભારત વર્ષ 2026માં BRICSનું અધ્યક્ષપદ સંભાળશે, જે થાઈલેન્ડની અપેક્ષાઓ માટે મહત્વપૂર્ણ સંજોગ છે.
સભ્યપદ પ્રક્રિયાને ઝડપી બનાવવાની ઈચ્છા
થાઈલેન્ડની BRICS તરફની યાત્રા એકદમ અચાનક શરૂ થઈ નથી. જૂન 2024માં, તત્કાલીન વડાપ્રધાન શ્રેથા થાવિસિનની સરકાર દ્વારા BRICSમાં જોડાવા માટે ઔપચારિક ઇરાદા પત્ર રજૂ કરવામાં આવ્યો હતો. ત્યારબાદ ઓક્ટોબર 2024માં રશિયાના કાઝાનમાં યોજાયેલી BRICS સમિટમાં થાઇલેન્ડને 13 અન્ય દેશો સાથે 'પાર્ટનર કન્ટ્રી'નો દરજ્જો મળ્યો. આ દરજ્જો 1 જાન્યુઆરી 2025થી અમલમાં આવ્યો છે. હવે, 2025માં બ્રાઝિલ BRICSનું અધ્યક્ષપદ સંભાળતા, થાઈલેન્ડે પોતાની સભ્યપદ પ્રક્રિયાને ઝડપી બનાવવાની ઈચ્છા વ્યક્ત કરી છે. થાઈલેન્ડ માને છે કે BRICSમાં જોડાવાથી વેપાર, રોકાણ, પર્યટન, ખાદ્ય સુરક્ષા અને ઊર્જા સહકાર જેવા ક્ષેત્રોમાં નવા માર્ગ ખુલશે.
BRICSને ડોલર આધારિત પ્રણાલીને પડકારનાર
આ સમગ્ર પ્રક્રિયા ડોનાલ્ડ ટ્રમ્પના નિવેદનોને સ્પષ્ટપણે પડકારતી દેખાય છે. ટ્રમ્પે ભૂતકાળમાં BRICSને 'મૃત્યુ પામેલો જૂથ' ગણાવ્યો છે અને અનેક વખત BRICS દેશોમાંથી ઈમ્પોર્ટ થતા માલ પર 100% સુધી ટેરિફ લગાવવાની ધમકી આપી છે. વધુમાં, જાન્યુઆરી 2025માં ટ્રમ્પે BRICSને ડોલર આધારિત પ્રણાલીને પડકારનાર ગણાવ્યો હતો. જોકે, થાઈલેન્ડ જેવી ASEAN ક્ષેત્રની મુખ્ય અર્થવ્યવસ્થાની BRICSમાં જોડાવાની ઉત્સુકતા દર્શાવે છે કે આ જૂથ વૈશ્વિક દૃશ્યમાં પોતાનું પ્રભાવ વધારી રહ્યું છે. થાઈલેન્ડનું BRICS તરફ વધતું ઝુકાણ એશિયા અને ગ્લોબલ સાઉથમાં ઉદ્ભવતી રાજકીય અને આર્થિક ગતિશીલતાનું પ્રતિબિંબ છે. અમેરિકા સાથેના વ્યૂહાત્મક સંબંધોને જાળવી રાખતા, થાઇલેન્ડ હવે બહુધ્રૂવીય વિશ્વમાં તેનું સ્થાન મજબૂત કરવા માટે BRICSને એક મહત્વપૂર્ણ પ્લેટફોર્મ તરીકે જોઈ રહ્યું છે.
