Dadra Nagar Haveli Silvassa gas blast: કેન્દ્રશાસિત પ્રદેશ દાદરા અને નગર હવેલીના સેલવાસમાં શનિવારે સવારે એક ભયાનક અકસ્માત સર્જાયો હતો, જેમાં ગેસ સિલિન્ડર બ્લાસ્ટ થવાથી ચાર લોકોના મોત થયા છે અને પાંચથી વધુ લોકો ગંભીર રીતે ઈજાગ્રસ્ત થયા છે.
કઈ રીતે અકસ્માત સર્જાયો?
આ ઘટના સેલવાસના દેમણી રોડ પર આવેલા એક ગોડાઉનમાં બની હતી, જ્યાં નાઈટ્રોજન ગેસના સિલિન્ડરનું રિફિલિંગ કામ ચાલી રહ્યું હતું.માહિતી અનુસાર, રોજની કામગીરીની જેમ કામદારો ગોડાઉનમાં ગેસ ભરવાની પ્રક્રિયામાં વ્યસ્ત હતા. તે દરમિયાન અચાનક એક સિલિન્ડરમાં જોરદાર વિસ્ફોટ થયો. ધડાકો એટલો ભારે હતો કે ગોડાઉનનો ભાગ તૂટી ગયો અને તેનો કાટમાળ આસપાસના વિસ્તારમાં ફંગોળાઈ ગયો. આ ઘટનાનો અવાજ ખૂબ જ દૂર સુધી સંભળાયો હતો, જેને કારણે આસપાસના લોકોમાં ભયનો માહોલ ફેલાઈ ગયો હતો.
નજીકના વિસ્તારમાં ભૂકંપ જેવો આંચકો અનુભવાયો
વિસ્ફોટનો પ્રભાવ એટલો તીવ્ર હતો કે, નજીકના વિસ્તારમાં ભૂકંપ જેવો આંચકો અનુભવાયો હતો. ગોડાઉનથી લગભગ 30 મીટર દૂર આવેલી એક શાળાના વિદ્યાર્થીઓ અને સ્ટાફમાં પણ ગભરાટ ફેલાયો હતો. લોકો તાત્કાલિક સ્થળ પરથી દૂર ભાગવા લાગ્યા હતા અને વિસ્તારમાં અફરાતફરીનું વાતાવરણ સર્જાયું હતું.
ઈજાગ્રસ્તોની હાલત ગંભીર
ઘટનાની જાણ થતાં જ સ્થાનિક પોલીસ, ફાયર બ્રિગેડ અને રાહત ટીમો તાત્કાલિક ઘટનાસ્થળે પહોંચી ગઈ હતી. બચાવ કામગીરી હાથ ધરવામાં આવી અને ઘાયલોને ઝડપથી નજીકની હોસ્પિટલમાં ખસેડવામાં આવ્યા હતા. ઈજાગ્રસ્તોમાંથી કેટલાકની હાલત ગંભીર હોવાનું જાણવા મળ્યું છે, જેને કારણે મોતની સંખ્યામાં વધારો થવાની શક્યતા પણ વ્યક્ત કરવામાં આવી રહી છે.
ગોડાઉનના સંચાલક સહિત ચાર લોકોના મોત
પ્રાથમિક માહિતી મુજબ, મૃતકોમાં ગોડાઉનના સંચાલકનો પણ સમાવેશ થાય છે. આ ઘટના કેવી રીતે બની તે અંગે તપાસ શરૂ કરવામાં આવી છે. સુરક્ષાના નિયમોનું પાલન કરવામાં કોઈ ખામી રહી ગઈ હતી કે કેમ, તે મુદ્દે વિશેષ ધ્યાન આપવામાં આવી રહ્યું છે. આ દુર્ઘટનાને પગલે ઉચ્ચ અધિકારીઓએ સ્થળની મુલાકાત લીધી હતી અને પરિસ્થિતિનો તાગ મેળવ્યો હતો. તંત્ર દ્વારા સમગ્ર ઘટનાની નિષ્પક્ષ તપાસના આદેશ આપવામાં આવ્યા છે. સાથે જ, આવી ઘટનાઓ ફરી ન બને તે માટે કડક પગલાં લેવામાં આવશે તેવી ખાતરી પણ આપવામાં આવી છે. આ દુર્ઘટનાએ સ્થાનિકોમાં શોકની લાગણી ફેલાવી છે અને ગેસ ગોડાઉન જેવી જગ્યાઓ પર સુરક્ષા વ્યવસ્થાની જરૂરિયાત પર ફરી એકવાર પ્રશ્નો ઊભા કર્યા છે.
