અમદાવાદ: શીલજ હિટ એન્ડ રન કેસમાં બોપલ પોલીસે આરોપીને રાજસ્થાનના ડુંગરપુરથી ઝડપ્યો

Ahmedabad Shilaj Canal Road Hit and Run Case: અમદાવાદના શીલજ કેનાલ રોડ પર તાજેતરમાં બનેલી એક હૃદયદ્રાવક ઘટનાએ સમગ્ર વિસ્તારમાં અરેરાટી ફેલાવી દીધી છે. બે મહિના પહેલા જ પ્રભુતામાં પગલાં પાડનાર એક નવપરિણીત યુવતી અકસ્માતનો ભોગ બનતાં તેનો પરિવાર ઘેરા શોકમાં ગરકાવ થઈ ગયો છે. માર્ગ પર પૂરપાટ ઝડપે દોડતા વાહનોની બેદરકારીને કારણે વધુ એક નિર્દોષ જિંદગી હોમાઈ ગઈ છે, જેનાથી સ્થાનિક લોકોમાં પણ ભારે રોષ જોવા મળી રહ્યો છે.

ગરબા ક્લાસ પૂરા કરીને ઘરે પરત ફરતી વખતે સર્જાયો કાળમુખો અકસ્માત
ઘટનાની વિગત મુજબ, બોપલ વિસ્તારમાં રહેતા અને પ્રોફેશનલ કોરિયોગ્રાફર તરીકે ફરજ બજાવતા હાર્દિક દરજી હાલમાં સાયન્સ સિટી પાસે આવેલા બ્લૂમિંગ કેમ્પમાં ગરબા ક્લાસ ચલાવે છે. ગત 11 સપ્ટેમ્બરના રોજ રાત્રિના સમયે ગરબા ક્લાસ પૂર્ણ કર્યા બાદ હાર્દિક પોતાની મોટરસાઈકલ પર અને તેમની પત્ની નિશિ પોતાના એક્સેસ ટુ-વ્હીલર પર ઘર તરફ નીકળ્યા હતા. ડી.પી.એસ. કેનાલ રોડ પર આવેલ માધવ અધવેદ કોમ્પ્લેક્સ નજીક નિશિ રોડ ક્રોસ કરી રહી હતી, ત્યારે અચાનક સામેથી પૂરપાટ ઝડપે આવેલા એક બાઈક ચાલકે તેને જોરદાર ટક્કર મારી હતી.

ગંભીર ઈજાઓને કારણે નવપરિણીતાએ દમ તોડ્યો
આ ગમખ્વાર ટક્કર એટલી જબરદસ્ત હતી કે નિશિ રોડ પર ફેંકાઈ ગઈ હતી અને તેને માથા તેમજ શરીરના અન્ય ગંભીર ભાગોમાં ઊંડી ઈજાઓ પહોંચી હતી. અકસ્માત સર્જીને બાઈક ચાલક ઘટનાસ્થળેથી તાત્કાલિક ફરાર થઈ ગયો હતો. ગંભીર રીતે ઘવાયેલી નિશિને તાત્કાલિક સારવાર અર્થે હોસ્પિટલ ખસેડવામાં આવી હતી, પરંતુ સારવાર દરમિયાન તેણે આખરી શ્વાસ લીધા હતા. લગ્નના માત્ર બે જ મહિનામાં પત્નીનું છત્ર છીનવાઈ જતાં પતિ હાર્દિક અને પરિવારજનો પર દુઃખનો પહાડ તૂટી પડ્યો હતો.

ન્યાય માટે પતિએ સોશિયલ મીડિયા પર વિનંતી કરી
ઘટના બાદ ફરાર આરોપી સામે કડક કાર્યવાહી થાય અને પોતાની સ્વર્ગસ્થ પત્નીને ન્યાય મળે તે માટે પીડિત પતિ હાર્દિક દરજીએ હાથ જોડીને ન્યાય માગતો એક લાગણીસભર વીડિયો સોશિયલ મીડિયા પર વાયરલ કર્યો હતો. આ વીડિયો વાયરલ થતાં જ લોકોમાં ભારે આક્રોશ ફેલાયો હતો અને પોલીસ તંત્ર પણ તાત્કાલિક હરકતમાં આવ્યું હતું. સ્થાનિક પોલીસે આ કેસને ગંભીરતાથી લઈને અલગ-અલગ ટીમ બનાવી આરોપીની શોધખોળ શરૂ કરી હતી.

બોપલ પોલીસે આરોપીને રાજસ્થાનના ડૂંગરપુરથી દબોચ્યો
બોપલ પોલીસે ટેકનિકલ સર્વેલન્સ અને હ્યુમન ઈન્ટેલિજન્સની મદદથી તપાસનો ધમધમાટ શરૂ કર્યો હતો. સીસીટીવી ફૂટેજ અને ચોક્કસ બાતમીના આધારે પોલીસને માહિતી મળી હતી કે અકસ્માત સર્જનાર આરોપી રાજ્ય બહાર ભાગી ગયો છે. પોલીસે ત્વરિત કાર્યવાહી કરીને રાજસ્થાનના ડૂંગરપુર ખાતે દરોડો પાડી આરોપી સુનિલ પરમારની ધરપકડ કરી લીધી છે. હાલ બોપલ પોલીસે આરોપી સામે ગુનો નોંધીને આગળની કાનૂની કાર્યવાહી હાથ ધરી છે.