Ram Mandir Trust Appoints New CEO: અયોધ્યામાં પ્રભુ શ્રી રામના ભવ્ય મંદિરનું નિર્માણ અને વહીવટી કામગીરી વધુ સુદ્રઢ બનાવવા માટે શ્રી રામ જન્મભૂમિ તીર્થ ક્ષેત્ર ટ્રસ્ટ દ્વારા એક મહત્વપૂર્ણ નિર્ણય લેવામાં આવ્યો છે. ટ્રસ્ટના પ્રથમ ચીફ એક્ઝિક્યુટિવ ઓફિસર (CEO) તરીકે નિવૃત્ત એર માર્શલ જિતેન્દ્ર મિશ્રાની નિમણૂક કરવામાં આવી છે. તેઓ ટૂંક સમયમાં જ અયોધ્યા પહોંચીને મંદિર સંકુલ અને ટ્રસ્ટની તમામ મુખ્ય વહીવટી જવાબદારીઓ વિધિવત રીતે સંભાળી લેશે. દેશના આ સૌથી મહત્વપૂર્ણ ધાર્મિક સ્થળનું સંચાલન હવે એક અનુભવી અને નિવૃત્ત સૈન્ય અધિકારીના હાથમાં જઈ રહ્યું છે.
ટ્રસ્ટમાં ખાલી પડેલી જગ્યાઓ પર ૩ નવા ટ્રસ્ટીઓ આવ્યા
રામ મંદિર ટ્રસ્ટમાં અગાઉથી ખાલી પડેલી જગ્યાઓને ભરવા માટે પણ મહત્વનો નિર્ણય કરવામાં આવ્યો છે. સત્તાવાર જાહેરાત મુજબ, ટ્રસ્ટમાં 3 નવા અગ્રણી સભ્યોનો સમાવેશ કરવામાં આવ્યો છે. જેમાં અયોધ્યાના જાણીતા વકીલ મદન મોહન પાંડે, દિલ્હીના ઉદ્યોગપતિ મહેશ ભાગચંદકા અને શિકોહાબાદના સામાજિક કાર્યકર નિર્મલા યાદવનો સમાવેશ થાય છે. આ ત્રણેય નવા ટ્રસ્ટીઓ તાજેતરમાં યોજાયેલી ટ્રસ્ટની મહત્વપૂર્ણ બેઠકમાં ઓનલાઈન માધ્યમથી જોડાઈને ઔપચારિક રીતે ટ્રસ્ટના કામકાજનો ભાગ બન્યા હતા.
કયા કારણોસર ખાલી પડી હતી ટ્રસ્ટની જગ્યાઓ?
રામ મંદિર ટ્રસ્ટમાં નવી નિમણૂકો કરવાની જરૂરિયાત કેટલાક રાજકીય અને વ્યક્તિગત કારણોસર ઊભી થઈ હતી. અગાઉ ટ્રસ્ટના મહત્વના પદો પર રહેલા ચંપત રાય અને અનિલ મિશ્રાએ પોતાના હોદ્દા પરથી રાજીનામા આપી દીધા હતા, જ્યારે અન્ય એક સક્રિય સભ્ય વિમલેન્દ્ર મોહનનું દુઃખદ નિધન થતાં 3 જગ્યાઓ ખાલી પડી હતી. નવા નિમાયેલા સભ્યોમાંથી મદન મોહન પાંડે હાઈકોર્ટમાં મંદિર પક્ષ તરફથી વકીલ તરીકે સફળતાપૂર્વક કેસ લડી ચૂક્યા છે, જ્યારે મહેશ ભાગચંદકા સ્વર્ગસ્થ અશોક સિંઘલના નજીકના સગાં હોવાનું જાણવા મળ્યું છે.
CEO પદ માટે દેશભરમાંથી આવી હતી 5500થી વધુ અરજીઓ
શ્રી રામ જન્મભૂમિ તીર્થ ક્ષેત્ર ટ્રસ્ટના CEOનું પદ અત્યંત જવાબદારીપૂર્વકનું હોવાથી તેની પસંદગી પ્રક્રિયા ખૂબ જ કડક રાખવામાં આવી હતી. આ પદ માટે દેશભરમાંથી ૫,૫૮૫ જેટલા અનુભવી દાવેદારોની અરજીઓ મળી હતી. તમામ અરજીઓની ચકાસણી માટે નિવૃત્ત જસ્ટિસ પ્રમોદ કોહલીના અધ્યક્ષપણા હેઠળ એક વિશેષ સ્ક્રીનિંગ કમિટી બનાવવામાં આવી હતી. આ કમિટીએ યોગ્ય લાયકાત ધરાવતા ૧૬ ઉમેદવારોના રૂબરૂ ઇન્ટરવ્યુ લીધા હતા અને તેમાંથી શ્રેષ્ઠ 3 નામો પસંદ કરીને બંધ કવરમાં ટ્રસ્ટના અધ્યક્ષને સોંપ્યા હતા.
બેઠકમાં લેવાયો આખરી નિર્ણય અને ભવિષ્યનું આયોજન
બુધવારે યોજાયેલી ટ્રસ્ટની હાઈ-લેવલ બેઠકમાં સ્ક્રીનિંગ કમિટી દ્વારા સોંપવામાં આવેલા નામો પર ગંભીરતાથી વિચાર-વિમર્શ કરવામાં આવ્યો હતો. તમામ પાસાંઓની સમીક્ષા કર્યા બાદ સર્વાનુમતે નિવૃત્ત એર માર્શલ જિતેન્દ્ર મિશ્રાની પસંદગી આ પદ માટે કરવામાં આવી હતી. જિતેન્દ્ર મિશ્રાનો સૈન્ય વહીવટનો વિશાળ અનુભવ મંદિરના દૈનિક વ્યવસ્થાપન, શ્રદ્ધાળુઓની સુવિધા, સુરક્ષા અને આગામી વિકાસ કાર્યોને વધુ શિસ્તબદ્ધ અને સુચારુ બનાવવામાં ખૂબ જ ઉપયોગી સાબિત થશે.
