Putin India visit 2025: રશિયાના રાષ્ટ્રપતિ વ્લાદિમીર પુતિન આજે ભારતના પ્રવાસે આવી રહ્યા છે. 4-5 ડિસેમ્બર દરમિયાન તેઓ દેશની મુલાકાત લેશે, જ્યાં તેઓ વડાપ્રધાન નરેન્દ્ર મોદીની સાથે 23મી ભારત-રશિયા દ્વિપક્ષીય શિખર બેઠકમાં ભાગ લેશે. આ છેલ્લા 4 વર્ષોમાં તેમની પહેલી ભારત મુલાકાત છે. પુતિનના આ પ્રવાસ દરમિયાન ઘણા મોટા કરારો થશે, બિઝનેસ લીડર્સ સાથે મુલાકાત થશે, તેમજ એક શાહી ડિનર પણ થશે. જાણી લો કે પુતિનનું બે દિવસનું શેડ્યૂલ શું રહેશે?
ભારત અને રશિયા વચ્ચેની વ્યૂહાત્મક ભાગીદારીના 25 વર્ષ પૂર્ણ
રાષ્ટ્રપતિ પુતિન 4 ડિસેમ્બરની સાંજે નવી દિલ્હી પહોંચશે, અંદાજે સાંજે 7 વાગ્યા સુધી તેઓ દિલ્હી પહોંચી જશે. ત્યાં વડાપ્રધાન મોદી 7, લોક કલ્યાણ માર્ગ પર તેમના સન્માનમાં એક ખાનગી ડિનરની મેજબાની કરશે. આ પ્રવાસ ભારત અને રશિયા વચ્ચેની વ્યૂહાત્મક ભાગીદારીના 25 વર્ષ પૂર્ણ થવાનું પ્રતીક પણ છે. પુતિને આ પહેલા વર્ષ 2022માં ભારતની મુલાકાત લીધી હતી.
5 ડિસેમ્બરે થશે મહત્વપૂર્ણ ડીલ
પુતિન અને પીએમ મોદી વચ્ચેના મહત્વના કરારો 5 ડિસેમ્બરે થશે. શુક્રવારની સવારે, પુતિનનું રાષ્ટ્રપતિ ભવન ખાતે ત્રિ-સેવા ગાર્ડ ઓફ ઑનર સાથે સત્તાવાર સ્વાગત કરવામાં આવશે. ત્યારબાદ તેઓ મહાત્મા ગાંધીને શ્રદ્ધાંજલિ આપવા રાજઘાટ જશે.
ભારત-રશિયા શિખર બેઠક
ત્યારબાદ સવારે લગભગ 11 વાગ્યે હૈદરાબાદ હાઉસમાં પીએમ મોદી અને રશિયાના રાષ્ટ્રપતિ વ્લાદિમીર પુતિન 23મી ભારત-રશિયા શિખર બેઠકનું આયોજન કરશે. આ બેઠક દરમિયાન રક્ષા, ઊર્જા, વેપાર, ટેકનોલોજી, અંતરિક્ષ અને વ્યૂહાત્મક સહકાર જેવા ક્ષેત્રોમાં અનેક મહત્વપૂર્ણ કરારો થવાની અપેક્ષા છે. ચર્ચા પછી બંને નેતાઓ સંયુક્ત નિવેદન પણ જારી કરશે.
ભારત-રશિયા બિઝનેસ ફોરમ
સાંજે 4 વાગ્યે બંને નેતાઓ ભારત મંડપમ જશે, જ્યાં તેઓ ભારત-રશિયા બિઝનેસ ફોરમને સંબોધિત કરશે. બંને નેતાઓ વેપાર જગતના પ્રતિનિધિઓ સાથે મુલાકાત કરશે. આ ચર્ચાઓ દ્વિપક્ષીય વેપારને વધુ મજબૂત બનાવવા પર કેન્દ્રિત રહેશે. વિદેશ મંત્રાલયના અધિકારીઓ અનુસાર, બંને દેશો એક "લેબર મોબિલિટી એગ્રિમેન્ટ"ને અંતિમરૂપ આપવાની પ્રક્રિયામાં છે, જેના કારણે કુશળ ભારતીય કામદારોને રશિયાના બાંધકામ, આરોગ્ય સંભાળ અને આતિથ્ય ક્ષેત્રોમાં કામ કરવાની મંજૂરી મળશે. તે ઉપરાંત, યુરેશિયન ઇકોનોમિક યુનિયન સાથે સંભવિત મુક્ત વેપાર કરાર, નાગરિક ન્યુક્લિયર સહકાર, રશિયન સેનામાં હાજર ભારતીય નાગરિકોની સુરક્ષિત વતન વાપસી અને રક્ષા સંબંધો વધુ મજબૂત બનાવવા અંગે પણ ચર્ચા થશે.
રાષ્ટ્રપતિ મુર્મુ કરશે ડિનરની મેજબાની
ત્યારબાદ સાંજે લગભગ 7 વાગ્યે, રાષ્ટ્રપતિ દ્રૌપદી મુર્મુ પુતિનના સન્માનમાં રાજ્ય ભોજનનું આયોજન કરશે. ભારતમાં લગભગ 30 કલાક વિતાવ્યા બાદ પુતિન 5 ડિસેમ્બરની રાત્રે રશિયા પરત જશે.
