India Mobile Congress 2026: વડાપ્રધાન નરેન્દ્ર મોદીએ ગુરુવાર, 8 ઑક્ટોબર 2026ના રોજ નવી દિલ્હીના યશોભૂમિ ખાતે ઇન્ડિયા મોબાઇલ કોંગ્રેસની 10મી આવૃત્તિને સંબોધિત કરી હતી. આ દરમિયાન તેમણે ભારતના ડિજિટલ ઇન્ફ્રાસ્ટ્રક્ચર, મોબાઇલ કનેક્ટિવિટી, ડાયરેક્ટ બેનિફિટ ટ્રાન્સફર (DBT) અને 5G ટેક્નોલોજીની પ્રગતિ વિશે વાત કરી હતી. તેમણે દાવો કર્યો કે DBT દ્વારા સરકારી સહાય સીધી લાભાર્થીઓના ખાતામાં પહોંચતાં ₹5 લાખ કરોડ ખોટા હાથોમાં જતાં બચ્યા છે.
નાના પાટેકરના નિધન પર પીએમ મોદીએ વ્યક્ત કર્યું દુઃખ
સંબોધન દરમિયાન પીએમ મોદીએ જાણીતા અભિનેતા નાના પાટેકરના નિધનના સમાચાર પર દુઃખ વ્યક્ત કર્યું હતું. તેમણે નાના પાટેકરને સુપરસ્ટાર ગણાવતાં કહ્યું કે તેમણે પોતાના વિવિધ પાત્રો દ્વારા દર્શકોનાં દિલ જીત્યાં હતાં.
બેંક, હોસ્પિટલ અને સરકારી સેવાઓ હવે મોબાઇલમાં
પીએમ મોદીએ કહ્યું કે પહેલાં બેંકો, હોસ્પિટલો અને સરકારી કચેરીઓની સેવાઓ મેળવવા માટે લોકોને ખાસ કરીને ગામડાંમાંથી શહેરો સુધી જવું પડતું હતું. તેના કારણે સમય અને નાણાં બંને ખર્ચાતાં હતાં. હવે મોબાઇલ ટેક્નોલોજીએ આ સ્થિતિમાં મોટો ફેરફાર કર્યો છે. તેમણે જણાવ્યું કે આજે સરકારની સેંકડો સેવાઓ મોબાઇલ ફોન પર ઉપલબ્ધ છે. DBT દ્વારા સરકારી યોજનાઓના નાણાં સીધા લાભાર્થીઓના બેંક ખાતામાં જમા થાય છે. તેમના જણાવ્યા અનુસાર, આ વ્યવસ્થાથી ₹5 લાખ કરોડ ખોટા હાથોમાં જતાં બચ્યા છે.
2022માં આ જ મંચ પરથી 5Gની શરૂઆત કરી હતી
પીએમ મોદીએ ઇન્ડિયા મોબાઇલ કોંગ્રેસ સાથેના અગાઉના અનુભવોને યાદ કરતાં કહ્યું કે વર્ષ 2022માં આ જ મંચ પરથી ભારતમાં 5G સેવાઓની શરૂઆત કરવામાં આવી હતી. વર્ષ 2023માં ભારત 5Gના વિસ્તરણમાં કેવી રીતે આગળ વધી રહ્યું છે તેની માહિતી પણ આ મંચ પરથી આપવામાં આવી હતી. તેમણે કહ્યું કે આજે દેશના ખૂણે-ખૂણે 5G કનેક્ટિવિટી પહોંચાડવાના પ્રયાસો થઈ રહ્યા છે. એક સમયે ડિજિટલ ડિવાઇડ એટલે કે ટેક્નોલોજીની સુવિધાઓ સુધી પહોંચવામાં અસમાનતા મોટો પડકાર હતો. મોબાઇલ ફોન અને ડેટા વધુ સસ્તા બનતાં વધુ લોકો ડિજિટલ સેવાઓનો લાભ લઈ શકે છે.
મોબાઇલ અને ઇન્ટરનેટથી શિક્ષણ-આરોગ્ય સેવાઓને વેગ
વડાપ્રધાને જણાવ્યું કે મોબાઇલ અને ઇન્ટરનેટ કનેક્ટિવિટીએ શિક્ષણ, ડિજિટલ પેમેન્ટ અને આરોગ્ય સેવાઓ સુધી પહોંચ સરળ બનાવી છે. દૂરનાં ગામડાંઓમાં રહેતા વિદ્યાર્થીઓ પણ હવે ઑનલાઇન માધ્યમથી અભ્યાસ કરી શકે છે. તેમણે દીક્ષા (DIKSHA) પ્લેટફોર્મનો ઉલ્લેખ કરતાં કહ્યું કે કોવિડ મહામારી દરમિયાન ઑનલાઇન શિક્ષણનું મહત્ત્વ વધ્યું હતું અને આ પ્લેટફોર્મ પર 500 કરોડથી વધુ લર્નિંગ સેશન નોંધાયા હતા. સરકારનો પ્રયાસ છે કે ડિજિટલ શિક્ષણનાં માધ્યમો દ્વારા ગરીબ અને છેવાડાના વિસ્તારોમાં રહેતા વિદ્યાર્થીઓને પણ જોડવામાં આવે.
ભારતમાં મોબાઇલ મેન્યુફેક્ચરિંગ અને ડિજિટલ ઇન્ફ્રાસ્ટ્રક્ચરનો વિકાસ
પીએમ મોદીએ કહ્યું કે એક સમયે ભારતમાં ડિજિટલ ઉપકરણોની ઉપલબ્ધતા એક મોટો પડકાર હતી. આધુનિક ટેક્નોલોજીનો લાભ મર્યાદિત લોકો સુધી પહોંચતો હતો. આ સ્થિતિ બદલવા માટે મોબાઇલ ફોનને ડિજિટલ વિકાસના કેન્દ્રમાં રાખવામાં આવ્યો અને દેશમાં ટેલિકોમ ઇન્ફ્રાસ્ટ્રક્ચર તથા મોબાઇલ મેન્યુફેક્ચરિંગને પ્રોત્સાહન આપવામાં આવ્યું. તેમણે ભાર મૂક્યો કે ટેક્નોલોજી માત્ર વપરાશ સુધી મર્યાદિત ન રહે, પરંતુ ભારતમાં જ તેની ડિઝાઇન અને વિકાસ થાય તે જરૂરી છે. તેમના જણાવ્યા અનુસાર, ભારત હવે માત્ર ટેક્નોલોજીનો વપરાશ કરનાર દેશ નહીં, પરંતુ નવી ટેક્નોલોજી બનાવનાર દેશ બનવાની દિશામાં આગળ વધી રહ્યું છે.
સેમિકન્ડક્ટર ક્ષેત્રમાં સપ્લાય ચેઇન પર ધ્યાન
પીએમ મોદીએ જણાવ્યું કે ભારતનું સેમિકન્ડક્ટર ઇકોસિસ્ટમ પણ ઝડપથી આગળ વધી રહ્યું છે. ઇન્ડિયા સેમિકન્ડક્ટર મિશનના આગામી તબક્કામાં સપ્લાય ચેઇન મજબૂત કરવા પર ધ્યાન કેન્દ્રિત કરવામાં આવશે. તેમણે કહ્યું કે અત્યાર સુધી થયેલી પ્રગતિ બાદ હવે નવા પડાવ પાર કરવા માટે પ્રયાસોનો વ્યાપ વધારવો પડશે. ટેક્નોલોજી અને ઉત્પાદન ક્ષેત્રે ભારતની ક્ષમતા વધારવા માટે આ દિશામાં આગળ વધવું જરૂરી છે.
AI, 6G અને સાયબર સુરક્ષા પર રહેશે ખાસ ધ્યાન
ઇન્ડિયા મોબાઇલ કોંગ્રેસ 2026માં આર્ટિફિશિયલ ઇન્ટેલિજન્સ (AI), 6G અને સેટેલાઇટ કમ્યુનિકેશન જેવી ટેક્નોલોજીઓ પર વિશેષ ધ્યાન આપવામાં આવશે. કાર્યક્રમમાં AI આધારિત પ્રી-6G નેટવર્ક અને ઇન્ટિગ્રેટેડ સેન્સિંગ એન્ડ કમ્યુનિકેશન જેવી ટેક્નોલોજીઓ પણ રજૂ થવાની છે. પીએમ મોદીએ ટેલિકોમ ક્ષેત્રના વૈશ્વિક પ્રતિનિધિઓને એવું નેટવર્ક બનાવવા પર ધ્યાન આપવા જણાવ્યું કે જેનો દુરુપયોગ અટકાવવામાં મદદ મળે. સાયબર ફ્રોડ સામે સતત એલર્ટ મેસેજ મોકલવાની વ્યવસ્થા અને AI દ્વારા તૈયાર કરવામાં આવેલા ડીપફેક કન્ટેન્ટના મૂળ સ્રોતને ઓળખવા માટેની સિસ્ટમની જરૂરિયાત પર પણ ભાર મૂકવામાં આવ્યો હતો.
100થી વધુ દેશોના પ્રતિનિધિઓ લેશે ભાગ
ઇન્ડિયા મોબાઇલ કોંગ્રેસની આ 10મી આવૃત્તિમાં 100થી વધુ દેશોના પ્રતિનિધિઓ અને ટેક્નોલોજી ક્ષેત્ર સાથે જોડાયેલા લોકો ભાગ લઈ રહ્યા છે. ત્રણ દિવસ ચાલનારા આ કાર્યક્રમમાં ટેલિકોમ, AI, 6G, સેમિકન્ડક્ટર અને ડિજિટલ ઇન્ફ્રાસ્ટ્રક્ચરના ભવિષ્ય અંગે ચર્ચા કરવામાં આવશે. કેન્દ્રીય સંચાર મંત્રી જ્યોતિરાદિત્ય સિંધિયાએ જણાવ્યું કે છેલ્લા એક દાયકામાં ભારતમાં બ્રોડબેન્ડ ગ્રાહકોની સંખ્યા 6 કરોડથી વધીને 100 કરોડ થઈ છે. તેમણે વધુમાં કહ્યું કે ભારતમાં એક જીબી મોબાઇલ ડેટાની કિંમત લગભગ ₹8 છે, જેના કારણે ડિજિટલ સેવાઓનો ઉપયોગ વધ્યો છે.








