PM Modi Speech 7.8 Percent GDP Growth Rate: વૈશ્વિક આર્થિક મંદી અને પડકારો વચ્ચે ભારતે 7.8%નો મજબૂત આર્થિક વિકાસ દર હાંસલ કર્યો છે. આ સફળતા પર વડાપ્રધાન નરેન્દ્ર મોદીએ દેશવાસીઓને અભિનંદન પાઠવ્યા છે. તેમણે એક વીડિયો સંદેશ જાહેર કરીને જણાવ્યું હતું કે, આ સિદ્ધિ 140 કરોડ દેશવાસીઓની ઈચ્છાશક્તિ, સખત પરિશ્રમ અને સામુહિક શક્તિનું પરિણામ છે. આ સાથે જ PM મોદીએ દેશના અર્થતંત્રને વધુ મજબૂત કરવા માટે સોનાની બિનજરૂરી ખરીદી ટાળવા અને 'મેક ઈન ઈન્ડિયા' અપનાવવા અપીલ કરી છે.
નિરાશા અને જૂઠ ફેલાવનારાઓને પીએમનો જવાબ
વડાપ્રધાન મોદીએ જણાવ્યું હતું કે, "દેશની અંદર પણ કેટલાક લોકો નિરાશા ફેલાવવામાં અને જૂઠના સારે માહોલ ખરાબ કરવામાં લાગેલા છે પરંતુ, આ તમામ પડકારોને પાર કરીને ભારતે 7.8%નો વિકાસ દર હાંસલ કર્યો છે. આપણે આ જ ગતિ જાળવી રાખવાની છે. લોકોએ વિદેશમાં બિનજરૂરી પ્રવાસ કરવા અને 'ડેસ્ટિનેશન વેડિંગ' માટે વિદેશ જવાથી બચવું જોઈએ. દેશવાસીઓ જેટલો વધારે આત્મનિર્ભરતા અને સ્વદેશી પર ભાર મૂકશે, ભારત એટલું જ ઝડપથી આગળ વધશે."
પીએમ મોદીએ સોનું ન ખરીદવાની અપીલ કેમ કરી?
ભારત પોતાની જરૂરિયાતનું લગભગ 99% સોનું વિદેશથી આયાત કરે છે. સોનાની આયાત ભારતના કુલ આયાત બિલમાં ક્રૂડ ઓઈલ પછી બીજા નંબરે (લગભગ 9%) આવે છે.
નાણાકીય વર્ષ 2025-26માં ભારતનું ગોલ્ડ ઈમ્પોર્ટ બિલ વધીને આશરે 6.4 લાખ કરોડ રૂપિયા પહોંચી ગયું હતું.
આંતરરાષ્ટ્રીય બજારમાં સોનાના ભાવ ઝડપથી વધવાને કારણે આયાત બિલમાં 24%નો ઉછાળો આવ્યો હતો.
જો દેશવાસીઓ બિનજરૂરી સોનું ખરીદવાનું ટાળશે, તો ભારતનું ઈમ્પોર્ટ બિલ ઘટશે, જેનાથી દેશનું ફોરેન એક્સચેન્જ રિઝર્વ (વિદેશી હૂંડિયામણ) સચવાઈ રહેશે અને ભારતીય રૂપિયો ડોલર સામે મજબૂત બનશે.
સોનાના ભાવ અને ભારતીય બજારની સ્થિતિ
હાલમાં સ્થાનિક બજારમાં સોનાના ભાવ પ્રતિ 10 ગ્રામ 1.50 લાખને પાર પહોંચી ગયા છે. મોંઘવારીના કારણે ચાલુ વર્ષે સોનાની આયાતમાં નોંધપાત્ર ઘટાડો જોવા મળ્યો છે. જાન્યુઆરીમાં 100 ટન, ફેબ્રુઆરીમાં 65 ટન અને માર્ચમાં 22 ટન સોનાની આયાત થઈ હતી, જ્યારે એપ્રિલમાં આ આંકડો ઘટીને માત્ર 15 ટન થવાનો અંદાજ છે, જે છેલ્લા 30 વર્ષમાં સૌથી નીચલા સ્તરે છે. વર્લ્ડ ગોલ્ડ કાઉન્સિલના અહેવાલ મુજબ, 2026ના પ્રથમ ક્વાર્ટરમાં ભારતમાં ઘરેણાં કરતાં રોકાણ માટે સોનાની માંગ વધુ જોવા મળી છે.
ભારતીય અર્થતંત્ર અને ફોરેક્સ રિઝર્વ અંગે વિશેષ માહિતી
કરંટ એકાઉન્ટ ડેફિસિટ (CAD) પર અસર: ભારત જ્યારે વિદેશમાંથી ભારે માત્રામાં સોનું ખરીદે છે ત્યારે દેશમાંથી મોટા પ્રમાણમાં યુએસ ડોલર બહાર જાય છે. આનાથી દેશની 'ચાલુ ખાતાની ખાધ' (CAD) વધે છે, જે અર્થતંત્ર માટે જોખમી સંકેત છે.
ગોલ્ડ સોવરેન બોન્ડ (SGB) વિકલ્પ: સરકારે ભૌતિક સોનું (Physical Gold) ખરીદવાના બદલે કાગળ પર અથવા ડિજિટલ સ્વરૂપે સોનામાં રોકાણ કરવા માટે 'સોવરેન ગોલ્ડ બોન્ડ' સ્કીમ પ્રોત્સાહિત કરી છે, જેથી ફોરેક્સ રિઝર્વ પર દબાણ ન આવે.
'Wed in India' અભિયાન: પીએમ મોદીએ અગાઉ પણ ભારતીય અમીરો અને ઉદ્યોગપતિઓને વિદેશમાં જઈને કરોડો રૂપિયાનો ધુમાડો કરવાના બદલે ભારતના પર્યટન સ્થળો પર જ લગ્ન સમારોહ યોજવા ('Wed in India') આહ્વાન કર્યું હતું, જેથી દેશનું ધન દેશમાં જ રહે અને સ્થાનિક રોજગારી વધે.
