US Foreign Policy:ભારતના ત્રણ દિવસના પ્રવાસે આવેલા અમેરિકાના વિદેશ મંત્રી માર્કો રુબિયોએ વૈશ્વિક રાજનીતિ અને દક્ષિણ એશિયાના સુરક્ષા સમીકરણો અંગે એક અત્યંત મહત્વપૂર્ણ નિવેદન આપ્યું છે. તેમણે સ્પષ્ટ શબ્દોમાં જણાવ્યું છે કે પાકિસ્તાન પાસે પરમાણુ હથિયારો હોવાથી અને તેની વ્યૂહાત્મક ભૌગોલિક સ્થિતિના કારણે અમેરિકા તેની સાથેના ડિપ્લોમેટિક એટલે કે રાજદ્વારી સંબંધો સંપૂર્ણપણે તોડી શકે તેમ નથી. આ સાથે જ તેમણે ભારતને ખાતરી આપી છે કે વોશિંગ્ટન અને ઇસ્લામાબાદ વચ્ચેની આ વાચચીતનો ઉપયોગ ભારતની સુરક્ષા સંબંધિત ચિંતાઓને દુર કરવા માટે જ કરવામાં આવશે.
મુશ્કેલ રાજદ્વારી નિર્ણયો અને વૈશ્વિક વિદેશ નીતિની જરૂરિયાત
પોતાની ભૂમિકા સ્પષ્ટ કરતા વિદેશ મંત્રી રુબિયોએ ઉમેર્યું કે, ભૂતકાળમાં તેઓ માત્ર એક સેનેટર હતા પરંતુ હવે વિદેશ મંત્રી તરીકે તેમની પાસે સમગ્ર અમેરિકાની વિદેશ નીતિ સંભાળવાની મોટી જવાબદારી છે. આવી સ્થિતિમાં ઘણી વખત એવા દેશો સાથે પણ વાતચીતનો દોર ચાલુ રાખવો પડે છે જેમના વલણ સાથે ગંભીર મતભેદો હોય. તેમણે આ પરિસ્થિતિની સરખામણી ભારતના ઈરાન સાથેના સંબંધો સાથે કરતા કહ્યું કે, જે રીતે ભારત પોતાના રાષ્ટ્રીય હિતો માટે મતભેદ ધરાવતા દેશો સાથે પણ સંવાદ જાળવી રાખે છે, તેવી જ રીતે અમેરિકા માટે પણ પાકિસ્તાન સાથે સીધો સંપર્ક રાખવો વૈશ્વિક નીતિની એક જરૂરિયાત છે.
આતંકવાદ સામે કડક વલણ અને ભારતની સુરક્ષાની પૂર્ણ ખાતરી
આતંકવાદ અંગે અમેરિકાનું વલણ સ્પષ્ટ કરતા માર્કો રુબિયોએ ભારપૂર્વક કહ્યું કે, અમેરિકા વિશ્વમાં ગમે ત્યાં થતા આતંકવાદની સખત વિરુદ્ધ છે. જે દેશો આતંકવાદને આશ્રય કે પ્રોત્સાહન આપે છે તેમની સામે અમેરિકાની નીતિમાં કોઈ જ નરમાઈ આવી નથી અને આવશે પણ નહીં. જો પાકિસ્તાન સાથે અમેરિકાના રાજદ્વારી સંબંધો ચાલુ રહેશે, તો વોશિંગ્ટન વધુ મજબૂત રીતે ભારતની સુરક્ષા ચિંતાઓ, સરહદ પારની ઘૂસણખોરી અને આતંકવાદી પ્રવૃત્તિઓ પર અંકુશ લાવવા માટે પાકિસ્તાન પર દબાણ બનાવી શકશે.
બે દેશો વચ્ચેના સંતુલન અને વ્યૂહાત્મક ભાગીદારીનો પ્રયાસ
માર્કો રુબિયોના આ નિવેદનથી સ્પષ્ટ થાય છે કે અમેરિકા એક તરફ ભારત સાથે પોતાની વ્યૂહાત્મક અને આર્થિક ભાગીદારીને નવી ઊંચાઈઓ પર લઈ જવા માંગે છે, તો બીજી તરફ દક્ષિણ એશિયામાં પરમાણુ સુરક્ષા અને આતંકવાદને નિયંત્રણમાં રાખવા માટે પાકિસ્તાન સાથે વાર્તાલાપનો માર્ગ ખુલ્લો રાખવા ઈચ્છે છે. તેમણે સ્પષ્ટ કર્યું કે ઇસ્લામાબાદ સાથેનો સંપર્ક માત્ર પ્રદેશની સ્થિરતા અને વૈશ્વિક સુરક્ષા માટે છે, તેનો અર્થ ક્યારેય પાકિસ્તાનની આતંકવાદ-સમર્થક નીતિઓને સમર્થન આપવાનો નથી.
