New York Indian Flag Desecrated: અમેરિકાના ન્યૂયોર્કમાં ભારતીય તિરંગાના અપમાનની ઘટના સામે આવ્યા બાદ રાજકીય ગરમાવો વધી ગયો છે. મેડિસન સ્ક્વેર ગાર્ડન ખાતે RSS પ્રમુખ મોહન ભાગવતના કાર્યક્રમ દરમિયાન બહાર વિરોધ પ્રદર્શન કરી રહેલા ખાલિસ્તાની સમર્થકો દ્વારા ભારતીય રાષ્ટ્રધ્વજ સાથે કથિત રીતે અપમાનજનક વર્તન કરવામાં આવ્યું હોવાનો વીડિયો સામે આવ્યો છે. ઘટનાને લઈને કેન્દ્રીય મંત્રી કિરેન રિજિજુએ આકરો વિરોધ નોંધાવી કડક ચેતવણી આપી છે.
મેડિસન સ્ક્વેર ગાર્ડન બહાર તિરંગા સાથે અપમાનજનક હરકત
શનિવાર, 29 ઓગસ્ટે ન્યૂયોર્કના મેડિસન સ્ક્વેર ગાર્ડનના ઇન્ફોસિસ થિયેટરમાં 'યુનિવર્સલ વનનેસ સેલિબ્રેશન' કાર્યક્રમ યોજાયો હતો. કાર્યક્રમમાં RSS પ્રમુખ મોહન ભાગવતે સંબોધન કર્યું હતું. આ દરમિયાન કાર્યક્રમ સ્થળની બહાર ખાલિસ્તાની સમર્થકો દ્વારા વિરોધ પ્રદર્શન કરવામાં આવ્યું હતું. આ વિરોધ દરમિયાન કેટલાક પ્રદર્શનકારીઓ દ્વારા ભારતીય તિરંગા સાથે અપમાનજનક વર્તન કરવામાં આવ્યું હોવાના વીડિયો સોશિયલ મીડિયા પર વાયરલ થયા છે. વીડિયોમાં એક દેખાવકાર તિરંગાને પગ સાથે બાંધીને પોઝ આપતો જોવા મળે છે, જ્યારે અન્ય કેટલાક પ્રદર્શનકારીઓ રાષ્ટ્રધ્વજ ફાડતા હોવાનું પણ દેખાઈ રહ્યું છે. આ ઉપરાંત મોહન ભાગવતના કટઆઉટને જૂતાની માળા પહેરાવીને સૂત્રોચ્ચાર કરવામાં આવ્યા હોવાનો પણ દાવો કરવામાં આવ્યો છે.
'સરકારની ટીકા કરો, પરંતુ તિરંગાનું અપમાન નહીં'
વીડિયો સામે આવ્યા બાદ કેન્દ્રીય મંત્રી કિરેન રિજિજુએ સોશિયલ મીડિયા પ્લેટફોર્મ X પર આ ઘટનાની આકરી નિંદા કરી હતી. રિજિજુએ કહ્યું કે ભારતમાં સરકાર, ભાજપ અથવા RSSની ટીકા કરવાની દરેકને સ્વતંત્રતા છે. જોકે, ભારત અને રાષ્ટ્રધ્વજનું અપમાન કોઈપણ સંજોગોમાં સ્વીકાર્ય નથી. તેમણે કડક શબ્દોમાં ચેતવણી આપતા લખ્યું, 'કાન ખોલીને સાંભળી લો… અમારા રાષ્ટ્રીય ધ્વજ અને મારા દેશનું અપમાન ના કરો. આ ભૂલ તમને ખૂબ ભારે પડશે.'
મોહન ભાગવતના કાર્યક્રમ દરમિયાન વિરોધ પ્રદર્શન
RSSના શતાબ્દી વર્ષ નિમિત્તે મોહન ભાગવત ત્રણ દેશોના પ્રવાસે અમેરિકા પહોંચ્યા હતા. ન્યૂયોર્કમાં યોજાયેલા કાર્યક્રમમાં મોટી સંખ્યામાં ભારતીય મૂળના લોકો હાજર રહ્યા હતા. કાર્યક્રમની બહાર ખાલિસ્તાની સમર્થકો દ્વારા વિરોધ પ્રદર્શન કરવામાં આવ્યું હતું. આ દરમિયાન તિરંગા સાથે કથિત અપમાનજનક વર્તનની ઘટના સામે આવતા હવે આ મામલો ચર્ચામાં આવ્યો છે.
ઘટનાને લઈને કડક કાર્યવાહી કરવાની માંગ
તિરંગાના અપમાનનો વીડિયો વાયરલ થયા બાદ આ ઘટનાની વ્યાપક ટીકા થઈ રહી છે. કેન્દ્રીય મંત્રીના નિવેદન બાદ હવે સમગ્ર મામલે કાયદાકીય કાર્યવાહી અંગે પણ ચર્ચા શરૂ થઈ છે. ભારતીય રાષ્ટ્રધ્વજનું અપમાન કરનાર તત્વો સામે યોગ્ય કાર્યવાહી કરવામાં આવે તેવી માંગ ઉઠી રહી છે. ઘટનામાં સામેલ લોકોની ઓળખ અને તેમની સામે શું કાર્યવાહી કરવામાં આવશે તેના પર હવે નજર રહેશે.
