Nepal Floods: નેપાળમાં 26 ઓગસ્ટે આવેલા ભીષણ પૂર, ભૂસ્ખલન અને અચાનક પૂરના કારણે ભારે તબાહી સર્જાઈ છે. ઘટનાના આઠ દિવસ બાદ પણ અસરગ્રસ્ત વિસ્તારોમાં રાહત અને બચાવ કામગીરી યથાવત છે. કાટમાળમાંથી હજુ પણ મૃતદેહો મળી રહ્યા છે. નેપાળ પોલીસના આંકડા અનુસાર, 1 સપ્ટેમ્બરની રાત્રે 8 વાગ્યા સુધીમાં આ હોનારતમાં 1,093 લોકોનાં મોત થયા છે, જ્યારે 4,000થી વધુ લોકો ગુમ હોવાનું જાણવા મળ્યું છે.
પૂર અને ભૂસ્ખલનથી ગામો-શહેરોમાં ભારે તારાજી
26 ઓગસ્ટે અચાનક આવેલા પૂર અને ભૂસ્ખલનથી નેપાળના અનેક વિસ્તારોમાં જોતજોતામાં પાણી અને કાટમાળ ફરી વળ્યા હતા. અનેક ઘરો, રસ્તાઓ અને ઇમારતો કાટમાળ નીચે દટાઈ ગઈ હતી. ઘણી જગ્યાએ આખા વિસ્તારોનો નકશો જ બદલાઈ ગયો છે. હાલ સુરક્ષા કર્મચારીઓ અને બચાવ ટીમો કાટમાળ વચ્ચે ગુમ થયેલા લોકોને શોધી રહી છે. બીજી તરફ, ગુમ થયેલા લોકોના પરિવારો હજુ પણ પોતાના સ્વજનોની રાહ જોઈ રહ્યા છે.
ત્રણ મહિના માટે અસરગ્રસ્ત વિસ્તારોને આપત્તિ ક્ષેત્ર જાહેર કરાયા
નેપાળ સરકારે અસરગ્રસ્ત વિસ્તારોને ઓછામાં ઓછા ત્રણ મહિના માટે આપત્તિ સંકટ ક્ષેત્ર જાહેર કર્યા છે. સરકારના જણાવ્યા મુજબ, આ નિર્ણયથી રાહત અને બચાવ માટે જરૂરી સંસાધનો ઝડપથી પહોંચાડવામાં મદદ મળશે. હવે બચાવ કામગીરીની સાથે રાહત અને પુનર્વસન પર પણ ભાર મૂકવામાં આવી રહ્યો છે. અસરગ્રસ્ત વિસ્તારોમાં મોટી સંખ્યામાં સુરક્ષા કર્મચારીઓ અને રાહત ટીમો તૈનાત કરવામાં આવી છે.
હેલિકોપ્ટર સર્વેમાં જોવા મળી તબાહીની ભયાનક તસવીર
ચીન મીડિયા ગ્રુપ (CMG)ના એક પત્રકારે હેલિકોપ્ટર મારફતે ચીન-નેપાળ સરહદ નજીકના અસરગ્રસ્ત વિસ્તારોનું સર્વેક્ષણ કર્યું હતું. હવામાંથી લેવામાં આવેલી તસવીરોમાં અનેક ગામો અને નાના શહેરોમાં થયેલી ભયાનક તબાહી જોવા મળી હતી. ઘણા વાહનો અને ઇમારતો માટી અને કાટમાળના ઊંડા સ્તરો નીચે દટાઈ ગયા છે. જ્યાં પહેલાં લોકોની અવરજવર રહેતી હતી, ત્યાં હવે મોટા પ્રમાણમાં કાદવ અને કાટમાળ જોવા મળી રહ્યો છે.
સ્યાબ્રુબેંસી સૌથી વધુ પ્રભાવિત વિસ્તારોમાં સામેલ
આ હોનારતમાં સ્યાબ્રુબેંસી સૌથી વધુ અસરગ્રસ્ત વિસ્તારોમાંનું એક છે. સરહદ ચોકીથી સીધી રેખામાં આ વિસ્તાર 10 કિલોમીટરથી ઓછા અંતરે આવેલો છે. આપત્તિ પહેલાં અહીં ભારે ચહલપહલ રહેતી હતી, પરંતુ હવે પરિસ્થિતિ સંપૂર્ણપણે બદલાઈ ગઈ છે. બચાવ અને રાહત ટીમો કાટમાળ વચ્ચે ગુમ થયેલા લોકોને શોધી રહી છે.
નેપાળમાં ગુમ થયેલા પાંચ લોકોના મૃતદેહ ભારતમાં મળ્યા
નેપાળના પૂર દરમિયાન તણાઈને ગુમ થયેલા પાંચ નેપાળી નાગરિકોના મૃતદેહ ઉત્તર પ્રદેશના કુશીનગર જિલ્લામાં ગંડક નદીમાંથી મળી આવ્યા છે. 1 સપ્ટેમ્બરે તમામ મૃતદેહોને સોનૌલી સરહદ પર નેપાળ પોલીસને સોંપવામાં આવ્યા હતા. મૃતકોમાં બે મહિલાઓ અને ત્રણ પુરુષોનો સમાવેશ થાય છે. આ મૃતદેહો કુશીનગરના બરવા પટ્ટી અને ખડ્ડા વિસ્તારમાંથી મળી આવ્યા હતા. ત્યારબાદ તેમને નેપાળ લઈ જવામાં આવ્યા છે, જ્યાં પોલીસ તેમની ઓળખની પ્રક્રિયા પૂર્ણ કરશે અને મૃતદેહો પરિવારજનોને સોંપશે.
ઉત્તર પ્રદેશમાં પણ નદીઓના જળસ્તરમાં વધારો
નેપાળ અને ઉત્તર પ્રદેશમાં સતત વરસાદને કારણે મહારાજગંજ જિલ્લામાં અનેક નદીઓના જળસ્તરમાં વધારો થયો છે. વાલ્મીકિનગરના ગંડક બેરેજમાંથી 1,50,200 ક્યુસેક પાણી છોડવામાં આવ્યું છે.મહારાજગંજમાં છેલ્લા 24 કલાકમાં 33.5 મિલીમીટર વરસાદ નોંધાયો છે. મહાવ નાળાનું પાણી ભયજનક સપાટીથી ઉપર વહી રહ્યું છે અને તેનું જળસ્તર નવ ફૂટ સુધી પહોંચ્યું છે, જ્યારે ભયની સપાટી પાંચ ફૂટ છે. રાપ્તી, ચંદન અને પ્યાસ સહિતની અન્ય નદીઓનું જળસ્તર પણ વધી રહ્યું છે, જોકે તે હાલમાં ભયના નિશાનથી નીચે છે.
વહીવટીતંત્ર એલર્ટ મોડ પર અધિક જિલ્લા મેજિસ્ટ્રેટ પ્રશાંત કુમારે જણાવ્યું છે કે વહીવટીતંત્ર સમગ્ર સ્થિતિ પર નજર રાખી રહ્યું છે. એસડીએમ, તહસીલ અધિકારીઓ, સિંચાઈ વિભાગ અને પૂર નિયંત્રણ અધિકારીઓને સંવેદનશીલ વિસ્તારોમાં ખાસ તકેદારી રાખવાની સૂચના આપવામાં આવી છે. નીચાણવાળા વિસ્તારોમાં રાહત અને બચાવ માટેની તૈયારીઓ ચાલુ રાખવામાં આવી છે. મહારાજગંજ અને નેપાળ સરહદ નજીકના વિસ્તારોમાં તમામ પાળા હાલમાં સુરક્ષિત હોવાનું અધિકારીઓએ જણાવ્યું છે.
