Indian Government First Reaction After Attack On Iran: ઈરાન પર અમેરિકા અને ઈઝરાયેલના તાજેતરના હવાઈ હુમલા બાદ સર્જાયેલી અત્યંત સ્ફોટક સ્થિતિ અંગે ભારત સરકારે તેની પ્રથમ સત્તાવાર પ્રતિક્રિયા આપી છે. વિદેશ મંત્રાલયે (MEA) શનિવારે એક નિવેદન જારી કરીને ગલ્ફ ક્ષેત્રમાં વધી રહેલા તણાવ અને સૈન્ય ગતિવિધિઓ અંગે ઊંડી ચિંતા વ્યક્ત કરી છે. ભારતે તમામ સંકળાયેલા પક્ષોને શાંતિ જાળવવા અને નાગરિકોની સુરક્ષાને સર્વોચ્ચ પ્રાથમિકતા આપવા અપીલ કરી છે.
સંયમ અને સાર્વભૌમત્વ જાળવવા ભારતની અપીલ
વિદેશ મંત્રાલયે પોતાના નિવેદનમાં ભારપૂર્વક જણાવ્યું છે કે, કોઈપણ દેશની સાર્વભૌમત્વ અને પ્રાદેશિક અખંડિતતાનું સન્માન થવું અનિવાર્ય છે. મંત્રાલયે તમામ પક્ષોને સંયમ રાખવા અને તણાવ વધે તેવા પગલાંથી બચવા તાકીદ કરી છે. ભારતે સ્પષ્ટ કર્યું છે કે હિંસા અને સંઘર્ષ કોઈ સમસ્યાનો ઉકેલ નથી, તેના બદલે વાતચીત અને રાજદ્વારી માધ્યમો દ્વારા જ મુખ્ય મુદ્દાઓનો ઉકેલ લાવવો જોઈએ.
ભારતીય નાગરિકોની સુરક્ષા માટે એડવાઈઝરી
મધ્ય પૂર્વમાં વસતા લાખો ભારતીયોની સુરક્ષાને ધ્યાનમાં રાખીને વિદેશ મંત્રાલયે ખાસ સૂચનાઓ જારી કરી છે. ગલ્ફ દેશોમાં આવેલા ભારતીય સરકારી મિશન (એમ્બેસી) સતત નાગરિકોના સંપર્કમાં છે. ભારતીય નાગરિકોને અત્યંત સતર્ક રહેવા, સ્થાનિક સુરક્ષા માર્ગદર્શિકાઓનું કડક પાલન કરવા અને કોઈપણ કટોકટીના સમયે નજીકના ભારતીય મિશનનો સંપર્ક કરવા જણાવવામાં આવ્યું છે. ઉલ્લેખનીય છે કે 8 મિલિયનથી વધુ ભારતીયો ગલ્ફ દેશોમાં વસવાટ કરે છે, જેમનું સ્થળાંતર કરવું સરકાર માટે એક મોટો પડકાર સાબિત થઈ શકે છે.
ભારતની ઉર્જા સુરક્ષા અને અર્થતંત્ર પર ખતરો
ઈરાન અને ઈઝરાયેલ વચ્ચેનો લાંબો સંઘર્ષ ભારત માટે માત્ર વ્યૂહાત્મક જ નહીં પરંતુ આર્થિક રીતે પણ ઘાતક સાબિત થઈ શકે છે. ભારત તેની જરૂરિયાતનું લગભગ 40 થી 60 ટકા ક્રૂડ ઓઈલ 'હોર્મુઝ સ્ટ્રેટ' મારફતે આયાત કરે છે. જો આ વિસ્તારમાં લશ્કરી નાકાબંધી થાય, તો તેલનો પુરવઠો ખોરવાઈ શકે છે, જેના કારણે ભારતમાં પેટ્રોલ-ડીઝલના ભાવમાં તોતિંગ વધારો અને આર્થિક અસ્થિરતા સર્જાવાની પૂરેપૂરી સંભાવના છે. ભારત સરકાર હાલમાં સમગ્ર પરિસ્થિતિ પર અત્યંત બારીકાઈથી નજર રાખી રહી છે અને આંતરરાષ્ટ્રીય સમુદાય સાથે સંપર્કમાં છે જેથી સ્થિતિને વધુ વણસતી અટકાવી શકાય.
