બિહારના જમુઈ છેડતી કેસમાં એક આરોપીનું એન્કાઉન્ટર, પગમાં ગોળી મારી; બીજાનો ભાગતી વખતે પગ ભાંગ્યો

Jamui Bihar Student Molestation Encounter: બિહારના જમુઈ જિલ્લામાં દસમા ધોરણની એક નાબાલિક વિદ્યાર્થિની સાથે રોડ પર છેડતી અને અશ્લીલ હરકતો કરનાર મુખ્ય આરોપી નંદન યાદવ વિરુદ્ધ પોલીસે કડક કાર્યવાહી કરી છે. મંગળવારે પોલીસની ટીમને જોઈને ભાગવાનો પ્રયાસ કરી રહેલા મુખ્ય આરોપી નંદન યાદવ પર પોલીસે ગોળીબાર કર્યો હતો, જેમાં તેના પગમાં ગોળી વાગતાં તે ઈજાગ્રસ્ત થયો હતો. પોલીસે તાત્કાલિક તેની ધરપકડ કરીને તેને સારવાર અર્થે સદર હોસ્પિટલમાં ભરતી કરાવ્યો છે. આ કેસમાં સામેલ તમામ 6 આરોપીઓની પોલીસે ધરપકડ કરી લીધી છે.

દુંદભી કૌભાંડ જેવી ઘટના અને આરોપીઓનું કૃત્ય
આ શરમજનક ઘટના 19 સપ્ટેમ્બરે સાંજે 7 વાગ્યાના અરસામાં બની હતી. 10મા ધોરણમાં ભણતા બે વિદ્યાર્થીઓ ટ્યુશનથી પરત ફરતી વખતે મડવા ટેકરી તરફ ફરવા ગયા હતા. તે સમયે નંદન યાદવ અને તેના સાથીઓએ બંનેને ઘેરી લીધા હતા. આરોપીઓએ સગીરા સાથે અશ્લીલ હરકતો કરી હતી, તેના પ્રાઈવેટ પાર્ટને સ્પર્શ કર્યો હતો અને તેના મિત્ર સાથે ગાળાગાળી કરી મારપીટ કરી હતી. નરાધમોએ આ સમગ્ર અત્યાચારનો વીડિયો બનાવીને સોશિયલ મીડિયા પર વાયરલ કરી દીધો હતો, જેના આધારે પોલીસે આરોપીઓની ઓળખ કરી હતી.

ભાગવાનો પ્રયાસ કરતાં બીજા આરોપીનો પણ પગ તૂટ્યો
ADG લો એન્ડ ઓર્ડર સુહિત અનુંપમના જણાવ્યા મુજબ, મુખ્ય આરોપી નંદન જંગલ અને પહાડી વિસ્તારમાં છુપાયો હતો અને પોલીસને જોઈને ભાગવાનો પ્રયાસ કરી રહ્યો હતો ત્યારે એન્કાઉન્ટરમાં તેના પગમાં ગોળી વાગી હતી. આ ઉપરાંત, કેસનો અન્ય એક આરોપી હરેરામ પણ જંગલ તરફ ભાગી રહ્યો હતો ત્યારે પથ્થરો પર પડવાથી તેનો પગ ભાંગી ગયો હતો, તેને પણ હોસ્પિટલમાં દાખલ કરાયો છે. આ ઘટનાનો વીડિયો સોશિયલ મીડિયા પર વાયરલ કરનાર રામાશીષ ચૌધરી નામના શખ્સની પણ પોલીસે અગાઉથી ધરપકડ કરી લીધી હતી.

તમામ 6 આરોપીઓ જેલના સળિયા પાછળ
પોલીસે આ સમગ્ર કેસમાં ત્વરિત કાર્યવાહી કરીને કુલ 6 લોકોની ધરપકડ કરી છે. આ ધરપકડ કરાયેલા આરોપીઓમાંથી ત્રણ આરોપીઓ 35થી 40 વર્ષની ઉંમરના છે, જ્યારે અન્ય ત્રણ આરોપીઓ સગીર વયના છે. વિદ્યાર્થિની અને તેના મિત્ર સાથે લગભગ 1 કલાક સુધી આ અમાનવીય કૃત્ય આચરવામાં આવ્યું હતું. બિહાર પોલીસે સ્પષ્ટ સંદેશ આપ્યો છે કે, મહિલાઓ અને બાળકીઓ સુરક્ષિત રહે તે માટે ગુનેગારો સામે આવી જ કડક કાર્યવાહી ચાલુ રહેશે.

પોક્સો (POCSO) એક્ટ હેઠળ કડક કાનૂની જોગવાઈઓ
બાળકોને જાતીય અપરાધોથી સુરક્ષિત રાખવા માટે ભારત સરકાર દ્વારા ૨૦૧૨ માં 'પોક્સો એક્ટ' (Protection of Children from Sexual Offences Act) અમલમાં મૂકવામાં આવ્યો હતો. આ કાયદા હેઠળ સગીર વયના બાળકો સામે જાતીય અસભ્યતા, છેડતી કે અશ્લીલ હરકત કરવી એ ગંભીર બિનજામીનપાત્ર ગુનો છે. જો ગુનાનો વીડિયો બનાવીને સોશિયલ મીડિયા પર વાયરલ કરવામાં આવે તો તેમાં આઈટી એક્ટની કલમો અને પોક્સોની કલમ 14/15 હેઠળ વધારાની સજાની જોગવાઈ છે, જેમાં આજીવન કેદ સુધીની સજા થઈ શકે છે.