જમ્મુ-કાશ્મીરના કિશ્તવાડના જંગલમાં બે પોલીસકર્મીઓની હત્યા, સર્વિસ હથિયારો પણ ગાયબ; આતંકી કનેક્શનની આશંકા

Jammu Kashmir Kishtwar SPO Murder: જમ્મુ-કાશ્મીરના કિશ્તવાડ જિલ્લામાંથી ચોંકાવનારા સમાચાર સામે આવ્યા છે. મારવાહના દેહરનાના જંગલ વિસ્તારમાં ગુમ થયેલા બે સ્પેશિયલ પોલીસ ઓફિસર (SPO)ના મૃતદેહ મળી આવ્યા છે. બંને પોલીસકર્મીઓની ગોળી મારીને હત્યા કરવામાં આવી હોવાનું પ્રાથમિક માહિતીમાં સામે આવ્યું છે. તેમના સર્વિસ હથિયારો પણ ગાયબ હોવાથી આતંકવાદીઓની સંડોવણીની આશંકા વ્યક્ત કરવામાં આવી રહી છે.

આર્મી પોસ્ટ તરફ જતાં બંને SPO ગુમ થયા હતા
મળતી માહિતી પ્રમાણે, શહીદ થયેલા SPO ઋષિપાલ અને બોબી ચંદ સ્પેશિયલ ઓપરેશન ગ્રુપ (SOG)નો ભાગ હતા. બંને કિયાર દછાનથી અપર રિજ દેહરનાના ઇન્દરવાન વિસ્તારમાં બસનાન ખાતે તૈનાત સેનાની 17મી રાષ્ટ્રીય રાઇફલ્સની ટીમને રાહત આપવા માટે નીકળ્યા હતા. અધિકારીઓના જણાવ્યા અનુસાર, બંને કિયાર કેમ્પથી ધરણા-મારવાહ સ્થિત આર્મી પોસ્ટ તરફ રવાના થયા હતા, પરંતુ નિર્ધારિત સ્થળે પહોંચ્યા નહોતા. શરૂઆતમાં તેમના મોબાઇલ ફોન સંપર્કમાં હતા, પરંતુ ત્યારબાદ બંનેના ફોન બંધ થઈ ગયા હતા. આથી તેમની સુરક્ષા અને ઠેકાણા અંગે ચિંતા વધી હતી.

સર્ચ ઓપરેશનમાં બંનેના મૃતદેહ મળ્યા
બંને SPO ગુમ થયા બાદ પોલીસ અને સેનાની રાષ્ટ્રીય રાઇફલ્સ દ્વારા વિશાળ શોધ અભિયાન શરૂ કરવામાં આવ્યું હતું. દુર્ગમ પર્વતીય જંગલ વિસ્તાર સહિત આસપાસના વિસ્તારોમાં સુરક્ષા દળોની ટીમો તૈનાત કરવામાં આવી હતી. સર્ચ ઓપરેશન દરમિયાન બંનેના મૃતદેહ મળી આવ્યા હતા. તેમના શરીર પર ગોળીના ઘા હોવાનું સામે આવ્યું છે. અધિકારીઓના જણાવ્યા પ્રમાણે, બંને પોલીસકર્મીઓનાં સર્વિસ હથિયારો પણ મળી આવ્યા નથી. આ બાબતને કારણે ઘટનામાં આતંકવાદીઓની સંડોવણી હોવાની શંકા વધુ ઘેરી બની છે.

આતંકવાદી કનેક્શન અંગે તપાસ ચાલુ
અધિકારીઓનું કહેવું છે કે ઘટનાના તમામ પાસાંની તપાસ કર્યા વિના તેને આતંકવાદી પ્રવૃત્તિ સાથે જોડવી ઉતાવળ ગણાશે. જોકે, કિશ્તવાડ જેવા પહાડી જિલ્લામાં બે પોલીસકર્મીઓની હત્યાની ઘટનાએ સુરક્ષા વ્યવસ્થાને લઈને ચિંતા વધારી છે. છેલ્લા કેટલાક વર્ષોમાં આ વિસ્તારમાં આતંકવાદ સંબંધિત ઘટનાઓ પણ સામે આવી છે.

કુલગામમાં CRPF કેમ્પ પર હુમલામાં ત્રણ જવાન ઘાયલ
બીજી તરફ, જમ્મુ-કાશ્મીરના કુલગામમાં તાજેતરમાં CRPF કેમ્પ પર થયેલા હુમલામાં ત્રણ જવાન ઘાયલ થયા હતા. આ ઘટનાના CCTV ફૂટેજ પણ સામે આવ્યા છે. CRPFના અહેવાલ પ્રમાણે, મોટરસાઇકલ પર આવેલા અજાણ્યા હુમલાખોરોએ ચેકપોઇન્ટ પર તૈનાત સુરક્ષાકર્મીઓ પર ગોળીબાર કર્યો હતો. કિશ્તવાડ અને કુલગામની આ ઘટનાઓને પગલે જમ્મુ-કાશ્મીરમાં સુરક્ષા સ્થિતિ અંગે ફરી ચિંતા વ્યક્ત થઈ રહી છે.