India UAE Oil Deal: પ્રધાનમંત્રી નરેન્દ્ર મોદીની અબુ ધાબી મુલાકાત દરમિયાન, ભારત અને યુએઈ વચ્ચે એક મોટી ઉર્જા ભાગીદારી પર સંમતિ થઈ છે. યુએઈ હવે ભારતના વ્યૂહાત્મક પેટ્રોલિયમ રિઝર્વમાં 30 મિલિયન બેરલ સુધીનું ક્રૂડ ઓઇલ સ્ટોર કરશે. બંને દેશોએ હોર્મુઝ સ્ટ્રેટની સુરક્ષા અને ઉર્જા પુરવઠા અંગે પણ ચિંતા વ્યક્ત કરી હતી.
ભારત અને UAE વચ્ચે ઊર્જા ક્ષેત્રમાં એક મોટી ડીલ થઈ
પ્રધાનમંત્રી નરેન્દ્ર મોદીની અબુ ધાબી મુલાકાત દરમિયાન ભારત અને યુનાઇટેડ આરબ અમીરાત વચ્ચે ઊર્જા ક્ષેત્રમાં એક મોટી ડીલ થઈ છે. બંને દેશોએ ભારતના સ્ટ્રેટેજિક પેટ્રોલિયમ રિઝર્વમાં UAEના કાચા તેલના સંગ્રહને વધારવા પર સહમતિ આપી છે. આ કરાર મુજબ UAE હવે ભારતમાં 30 મિલિયન એટલે કે 3 કરોડ બેરલ સુધી ક્રૂડ ઓઇલ સંગ્રહ કરી શકશે. આ નિર્ણય પ્રધાનમંત્રી મોદી અને UAEના રાષ્ટ્રપતિ મોહમ્મદ બિન જાયદ અલ નાહ્યાન વચ્ચે થયેલી વિગતવાર ચર્ચા પછી સામે આવ્યો છે. ભારતના વિદેશ મંત્રાલયે શુક્રવારે તેની માહિતી આપી હતી. વિદેશ મંત્રાલય મુજબ, ઇન્ડિયન સ્ટ્રેટેજિક પેટ્રોલિયમ રિઝર્વ્સ લિમિટેડ અને અબુ ધાબી નેશનલ ઓઇલ કંપની એટલે કે ADNOC વચ્ચે સ્ટ્રેટેજિક સહકાર કરાર થયો છે. જેના દ્વારા ભારતના પેટ્રોલિયમ રિઝર્વમાં UAEની ભાગીદારીને વધારીને 30 મિલિયન બેરલ સુધી લઈ જવામાં આવશે.
સમુદ્રમાં અવરોધ વિના થશે જહાજોની અવરજવર!
આ કરાર એવા સમયે થયો છે જ્યારે પશ્ચિમ એશિયામાં તણાવ વધ્યો છે અને વૈશ્વિક તેલ પુરવઠાને લઈને ચિંતા વધી છે. ખાસ કરીને હોર્મુઝ સ્ટ્રેટમાં તણાવના કારણે દુનિયાભરમાં ઊર્જા સુરક્ષા મોટો મુદ્દો બની ગઈ છે. આ જ કારણથી ભારત અને UAE બંનેએ સુરક્ષિત દરિયાઈ વેપાર માર્ગો અને બિનઅવરોધિત જહાજોની અવરજવર પર ભાર મૂક્યો છે. બંને નેતાઓએ ચર્ચામાં કહ્યું કે, હોર્મુઝ સ્ટ્રેટ મારફતે સુરક્ષિત અને નિર્વિઘ્ન અવરજવર વૈશ્વિક અર્થતંત્ર અને ઊર્જા પુરવઠા માટે અત્યંત જરૂરી છે. ભારતે UAE પર થયેલા તાજેતરના હુમલાઓની પણ નિંદા કરી અને તેની સાથે એકજૂટતા વ્યક્ત કરી.
LNG, LPG અને કાચા તેલના પુરવઠા પર પણ કરાર
ઊર્જા ભાગીદારીને વધુ મજબૂત બનાવવા માટે બંને દેશોએ ભારતમાં સ્ટ્રેટેજિક ગેસ રિઝર્વ બનાવવા માટે સાથે કામ કરવાની વાત પણ કરી છે. ઉપરાંત ઇન્ડિયન ઓઇલ કોર્પોરેશન અને ADNOC વચ્ચે લાંબા ગાળાના LPG પુરવઠા માટે પણ નવો કરાર થયો છે. વિદેશ મંત્રાલયે UAEને ભારતની ઊર્જા સુરક્ષાનો "મહત્વપૂર્ણ ભાગીદાર" ગણાવ્યો છે. બંને દેશોએ LNG, LPG અને કાચા તેલના પુરવઠાને લઈને ઊર્જા સહકાર વધારવા પર સંમતિ આપી છે.
UAE તરફથી ભારતમાં 5 અબજ ડોલરના રોકાણની જાહેરાત
ઊર્જા ક્ષેત્ર ઉપરાંત આ મુલાકાત દરમિયાન UAE તરફથી ભારતમાં 5 અબજ ડોલરના રોકાણની જાહેરાત પણ થઈ છે. આ રોકાણ બેન્કિંગ, ઈન્ફ્રાસ્ટ્રક્ચર અને ફાઇનાન્સ ક્ષેત્રમાં કરવામાં આવશે. સાથે જ રક્ષા, સમુદ્રી સહકાર, શિપબિલ્ડિંગ અને એડવાન્સ કમ્પ્યુટિંગ જેવા ક્ષેત્રોમાં પણ અનેક કરારો થયા છે. વિશેષજ્ઞોનું માનવું છે કે આ ડીલ ભારતની ઊર્જા સુરક્ષાને વધુ મજબૂત બનાવશે અને પશ્ચિમ એશિયામાં વધતા તણાવ વચ્ચે તેલ પુરવઠાના મામલે ભારત માટે વધારાનું સુરક્ષા કવચ સાબિત થશે.








