Harish Rawat Resign From Congress: ઉત્તરાખંડના રાજકારણમાંથી ચોંકાવનારા સમાચાર સામે આવ્યા છે. કોંગ્રેસના દિગ્ગજ નેતા અને પૂર્વ મુખ્યમંત્રી હરીશ રાવતે પાર્ટીના તમામ હોદ્દા પરથી અચાનક રાજીનામું આપી દીધું છે. તેમનો આ નિર્ણય એવા સમયે આવ્યો છે જ્યારે તેમના પીએ ચંદન સિંહ સામે એન્ફોર્સમેન્ટ ડિરેક્ટોરેટ (ED) દ્વારા દરોડા સહિતની કાર્યવાહી કરવામાં આવી છે.
કોંગ્રેસના હિતમાં રાજીનામું આપ્યાનો દાવો
રાજીનામા બાદ હરીશ રાવતે સોશિયલ મીડિયા પર લાંબી પોસ્ટ કરીને કહ્યું કે તેઓ નથી ઇચ્છતા કે તેમના કારણે કોંગ્રેસના ભ્રષ્ટાચાર વિરુદ્ધના સંઘર્ષ સામે કોઈ સવાલ ઊભા થાય. EDએ 2016ની ગ્રામ પંચાયત વિકાસ અધિકારી પરીક્ષામાં ગેરરીતિ સાથે જોડાયેલા મની લોન્ડરિંગ કેસમાં દહેરાદૂનના અનેક સ્થળોએ દરોડા પાડ્યા હતા. આ કાર્યવાહી દરમિયાન ચંદન સિંહના ઘર પર પણ તપાસ કરવામાં આવી હતી.
EDની કાર્યવાહીમાં શું મળ્યું?
EDના જણાવ્યા અનુસાર, ચંદન સિંહના ઘરેથી રૂ. 32 લાખની બેહિસાબી રોકડ, આશરે 200 ગ્રામ સોનું અને લગભગ 12 લક્ઝરી ઘડિયાળો મળી આવી હતી. આ ઉપરાંત ચંદન સિંહ તથા તેમના પરિવારના સભ્યોના બેન્ક ખાતામાં રહેલી રૂ. 52.16 લાખની રકમ પણ જપ્ત કરવામાં આવી હોવાનું EDએ જણાવ્યું છે. ચંદન સિંહ અગાઉ હરીશ રાવતના મુખ્યમંત્રી તરીકેના કાર્યકાળ દરમિયાન OSD તરીકે કામ કરી ચૂક્યા છે અને હાલમાં તેમના પીએ તરીકે ફરજ બજાવી રહ્યા હતા.
‘ચૂંટણી પહેલાં રાજકીય નેરેટિવ ઊભો કરવાનો પ્રયાસ’
હરીશ રાવતે સમગ્ર મામલે કહ્યું કે અહેવાલોમાં રહેલી હકીકત તપાસ પૂર્ણ થયા બાદ જ સ્પષ્ટ થશે. ભરતી પરીક્ષામાં ગેરરીતિના આરોપો અંગે તેમણે કહ્યું કે જો આ દાવા સાબિત થશે તો તે તેમના માટે શરમજનક બાબત હશે, જોકે તેમને આવા આરોપો પર વિશ્વાસ નથી. તેમણે આક્ષેપ કર્યો કે આગામી ચૂંટણી પહેલાં રાજકીય માહોલ બગાડવા અને નેરેટિવ ઊભો કરવા માટે તેમના સહયોગીને નિશાન બનાવવામાં આવ્યા છે. પાર્ટીની સાખ અને ભ્રષ્ટાચાર વિરુદ્ધના સંઘર્ષને નુકસાન ન પહોંચે તે માટે તેઓ પ્રદેશ કારોબારી અને કોંગ્રેસ વર્કિંગ કમિટી (CWC)ના પદોથી અલગ થઈ રહ્યા હોવાનું તેમણે જણાવ્યું.
42 હજારથી વધુ સરકારી ભરતીઓનો પણ કર્યો ઉલ્લેખ
હરીશ રાવતે પોતાના મુખ્યમંત્રી તરીકેના કાર્યકાળ દરમિયાન થયેલી 42,000થી વધુ સરકારી ભરતીઓનો ઉલ્લેખ કરતાં કહ્યું કે જો નિમણૂક પ્રક્રિયામાં અજાણતા પણ કોઈ ચૂક થઈ હોય તો તેઓ રાજ્યની જનતાની માફી માંગે છે. તેમણે જણાવ્યું કે ભરતી આયોગના તત્કાલીન અધ્યક્ષ સામે ફરિયાદ મળ્યા બાદ તેમને પદ પરથી હટાવી દેવામાં આવ્યા હતા. હવે EDની તપાસમાં આગળ શું બહાર આવે છે અને હરીશ રાવતના રાજીનામા બાદ કોંગ્રેસમાં તેની શું અસર પડે છે, તેના પર સૌની નજર છે.
