Farooq Abdullah should look Pakistan across border: જમ્મુ-કાશ્મીરના ભૂતપૂર્વ મુખ્યમંત્રી અને નેશનલ કોન્ફરન્સના પ્રમુખ ફારુક અબ્દુલ્લાના નિવેદન પર ભાજપે વળતો પ્રહાર કર્યો છે. ભાજપના રાષ્ટ્રીય પ્રવક્તા આર. પી. સિંહે કહ્યું કે ફારુક અબ્દુલ્લાએ કાશ્મીરીઓની સ્થિતિ અંગે વાત કરતાં સરહદ પાર પાકિસ્તાનના કબજા હેઠળના કાશ્મીર (PoK)ની હાલત પર પણ નજર કરવી જોઈએ. તેમણે દાવો કર્યો હતો કે કલમ 370 નાબૂદ થયા બાદ જમ્મુ-કાશ્મીરમાં સ્થિતિ સુધરી છે, પ્રદેશમાં પ્રવાસીઓની સંખ્યા વધી રહી છે અને લોકો શાંતિપૂર્ણ જીવન જીવી રહ્યા છે.
'ફારુક અબ્દુલ્લાએ PoKની સ્થિતિ પણ જોવી જોઈએ'
ભાજપના રાષ્ટ્રીય પ્રવક્તા આર. પી. સિંહે ફારુક અબ્દુલ્લાના નિવેદનનો જવાબ આપતાં પાકિસ્તાનના કબજા હેઠળના કાશ્મીરની સ્થિતિનો ઉલ્લેખ કર્યો હતો. તેમણે કહ્યું કે કાશ્મીરની સ્થિતિ અંગે ચર્ચા કરતી વખતે સરહદ પારના વિસ્તારોમાં લોકોની પરિસ્થિતિને પણ ધ્યાનમાં લેવી જોઈએ. તેમણે વધુમાં દાવો કર્યો હતો કે કલમ 370 નાબૂદ થયા બાદ જમ્મુ-કાશ્મીર ભારત સાથે વધુ મજબૂતીથી જોડાયું છે. પ્રદેશમાં પ્રવાસન વધ્યું છે અને લોકો શાંતિથી જીવી રહ્યા છે. ભાજપે આ મુદ્દે ફારુક અબ્દુલ્લાના નિવેદન સામે પોતાનો પક્ષ રજૂ કર્યો છે.
ફારુક અબ્દુલ્લાએ શું કહ્યું હતું?
નેશનલ કોન્ફરન્સના પ્રમુખ ફારુક અબ્દુલ્લાએ બારામુલ્લામાં પાર્ટી કાર્યકરોના સંમેલનને સંબોધિત કરતી વખતે કેન્દ્ર સરકારની નીતિઓ અને જમ્મુ-કાશ્મીરના લોકોના અધિકારો અંગે સવાલો ઉઠાવ્યા હતા. તેમણે કહ્યું હતું કે, “તમે દિલ્હી પાસેથી શું અપેક્ષા રાખી શકો છો? તમારે તેમની સામે ઊભા રહેવાની અને લડવાની હિંમત બતાવવી પડશે. જો તમે એવું નહીં કરો, તો તમારો નાશ થઈ જશે. તમારું નામ અને ઓળખ ભૂંસી નાખવામાં આવશે અને કોઈ તમને યાદ નહીં કરે.” પાકિસ્તાનનો ઉલ્લેખ કરતાં તેમણે કહ્યું હતું કે કાશ્મીરનો મુદ્દો હજુ ઉકેલાયો નથી અને પાડોશી દેશ સતત આ મુદ્દો ઉઠાવી રહ્યો છે. તેમના આ નિવેદનને લઈને ભાજપે વાંધો ઉઠાવ્યો છે અને PoKની સ્થિતિ તરફ ધ્યાન દોર્યું છે.
કલમ 370 અને રાજ્યના દરજ્જા માટે લડત તેજ કરવાની જાહેરાત
ફારુક અબ્દુલ્લાએ કલમ 370ની પુનઃસ્થાપના અને જમ્મુ-કાશ્મીરને ફરી રાજ્યનો દરજ્જો અપાવવાની માંગ સાથે સંઘર્ષ વધુ તીવ્ર બનાવવાની જાહેરાત પણ કરી હતી. તેમણે કેન્દ્ર સરકાર પર અગાઉ આપેલાં વચનો પૂર્ણ ન કરવાનો આરોપ લગાવ્યો હતો. શનિવારે બારામુલ્લાના ડાક બંગલામાં પાર્ટી કાર્યકરોના સંમેલનને સંબોધતાં તેમણે જમ્મુ-કાશ્મીરના લોકોને પોતાના અધિકારો અને અનન્ય ઓળખના રક્ષણ માટે એકજૂથ થઈને લડવાની અપીલ કરી હતી. તેમણે વિશ્વાસ વ્યક્ત કર્યો હતો કે એક દિવસ જમ્મુ-કાશ્મીરને તેનો વિશેષ દરજ્જો પાછો મળશે.
કેન્દ્ર સરકારે વચન પૂરું ન કર્યું હોવાનો આરોપ
ફારુક અબ્દુલ્લાએ આરોપ લગાવ્યો હતો કે કેન્દ્ર સરકારે સીમાંકન અને ચૂંટણીની પ્રક્રિયા પૂર્ણ થયા બાદ જમ્મુ-કાશ્મીરનો રાજ્યનો દરજ્જો પુનઃસ્થાપિત કરવાનું વચન આપ્યું હતું, પરંતુ તે હજુ સુધી પૂર્ણ થયું નથી. ઉલ્લેખનીય છે કે કેન્દ્ર સરકારે 5 ઓગસ્ટ, 2019ના રોજ જમ્મુ-કાશ્મીરમાંથી કલમ 370ની મોટાભાગની જોગવાઈઓ નાબૂદ કરી હતી. ત્યારથી વિશેષ દરજ્જાની પુનઃસ્થાપના અને રાજ્યનો દરજ્જો પાછો આપવાના મુદ્દાઓ પ્રદેશના રાજકારણમાં મહત્ત્વના રહ્યા છે. ફારુક અબ્દુલ્લાના નિવેદન બાદ ભાજપે PoKની સ્થિતિ અને કલમ 370 નાબૂદ થયા પછીના પરિવર્તનોનો ઉલ્લેખ કરીને વળતો જવાબ આપ્યો છે. આ મુદ્દે ભાજપ અને નેશનલ કોન્ફરન્સ વચ્ચે રાજકીય નિવેદનબાજી વધુ તેજ થવાની શક્યતા છે.
