Vadodara Bhayli Gangrape Case- 5 Get Life Imprisonment: ગુજરાતને હચમચાવી મુકનારા વડોદરાના ભાયલી સામૂહિક દુષ્કર્મ કેસમાં અદાલતે તમામ 5 દોષિતોને અંતિમ શ્વાસ સુધીની આજીવન કેદની કડક સજા સંભળાવી છે. વડોદરાના ન્યાયિક ઇતિહાસમાં આ પહેલો એવો કિસ્સો છે જેમાં સામૂહિક દુષ્કર્મના કેસમાં એકસાથે પાંચેય આરોપીઓને આજીવન કેદની આકરી સજા ફટકારવામાં આવી હોય. અદાલતે આ ઘટનાને માનવતા માટે નીચલી કક્ષાનું કૃત્ય ગણાવીને સમાજમાં એક દાખલો બેસાડતો ચુકાદો આપ્યો છે.
નવરાત્રિની રાત્રે આચર્યું હતું ભયાનક કૃત્ય
આ ચકચારી ઘટના 4 ઓક્ટોબર 2024 ના રોજ નવરાત્રિના બીજા નોરતે બની હતી. 16 વર્ષની માસૂમ સગીરા પોતાના મિત્ર સાથે ભાયલી-બીલ ટીપી રોડ પર આવેલી એક અવાવરું જગ્યાએ બેઠી હતી. તે દરમિયાન બે મોટરસાઇકલ પર આવેલા પાંચ નરાધમોએ ત્યાં પહોંચીને ખૌફનાક ખેલ ખેલ્યો હતો. આરોપીઓએ સગીરાના મિત્રને બંધક બનાવી તેની સાથે મારપીટ કરી હતી અને તેની હાજરીમાં જ માસૂમ સગીરા પર સામૂહિક દુષ્કર્મ આચર્યું હતું. ત્યારબાદ પીડિતો તાત્કાલિક કોઈની મદદ ન લઈ શકે તે માટે મોબાઈલ ફોન લૂંટીને ફરાર થઈ ગયા હતા.
પોલીસની ત્વરિત તપાસ અને આરોપીઓની ધરપકડ
બનાવની ગંભીરતાને ધ્યાનમાં રાખીને વડોદરા પોલીસે ત્વરિત તપાસ હાથ ધરી હતી. સીસીટીવી ફૂટેજ અને ટેકનિકલ સર્વેલન્સની મદદથી પોલીસે મુખ્ય આરોપી મુમતાઝ ઉર્ફે આફતાબ બનજારા, મુન્ના બનજારા અને શાહરૂખ બનજારા સહિત ગુનામાં મદદગારી કરનાર સૈફઅલી અને અજમલ બનજારાની ધરપકડ કરી હતી. કેસને મજબૂત બનાવવા માટે સરકારે ત્રણ વિશેષ સરકારી વકીલોની નિમણૂક કરી હતી, જેમાં 45 સાક્ષીઓની જુબાની અને ફોરેન્સિક પુરાવા કોર્ટ સમક્ષ રજૂ કરવામાં આવ્યા હતા.
પીડિતા માટે વળતર અને દંડનો હુકમ
અદાલતે પોતાનો ચુકાદો આપતા પીડિતા માટે 10 લાખ રૂપિયાના વળતરની જાહેરાત કરી છે. આ ઉપરાંત તમામ પાંચેય દોષિતોને પચાસ-પચાસ હજાર રૂપિયાનો દંડ પણ ફટકારવામાં આવ્યો છે. કોર્ટે ચુકાદા દરમિયાન મહત્વપૂર્ણ ટિપ્પણી કરતા જણાવ્યું કે સ્ત્રી એ સમાજનો અત્યંત મહત્વનો ભાગ છે. એક તરફ જ્યારે દેશમાં 'બેટી બચાવો બેટી પઢાવો' જેવા અભિયાન ચાલી રહ્યા છે, ત્યારે આવી અમાનુષી ઘટનાઓને ક્યારેય હળવાશથી લઈ શકાય નહીં.
સમાજ માટે એક મોટો સંદેશ
આ ચુકાદાથી પીડિતા અને તેના પરિવારને ન્યાય મળ્યો છે. કોર્ટે આ કડક સજા દ્વારા સ્પષ્ટ સંદેશ આપ્યો છે કે મહિલાઓ અને માસૂમ બાળકીઓ વિરુદ્ધ ગુનો આચરનારા તત્વો સામે કોઈ પણ પ્રકારની દયા દાખવવામાં આવશે નહીં. વડોદરા પોલીસે એકત્ર કરેલા મજબૂત પુરાવાઓ અને અદાલતના ઐતિહાસિક નિર્ણયના કારણે આજે પાંચેય ગુનેગારોને યોગ્ય સજા મળી છે.
