Congress Leaders Clash Over BRICS Summit: ભારતમાં યોજાઈ રહેલા BRICS સંમેલનને લઈને કોંગ્રેસની અંદર જ અલગ-અલગ મત સામે આવ્યા છે. એક તરફ વરિષ્ઠ નેતા પી. ચિદમ્બરમે BRICS સહિત વિવિધ આંતરરાષ્ટ્રીય મંચોથી ભારતને થતા વાસ્તવિક ફાયદા અંગે સવાલો ઉઠાવ્યા છે, તો બીજી તરફ કોંગ્રેસ સાંસદ શશી થરૂરે BRICS સમિટનું આયોજન ભારત માટે ગૌરવની વાત ગણાવી છે. કોંગ્રેસના બંને નેતાઓના અલગ-અલગ નિવેદનોને લઈને ભાજપને પણ કોંગ્રેસ પર પ્રહાર કરવાની તક મળી છે.
ચિદમ્બરમે સમિટના ફાયદા અંગે ઉઠાવ્યા સવાલ
કોંગ્રેસના વરિષ્ઠ નેતા પી. ચિદમ્બરમે તાજેતરમાં BRICS સમિટના પરિણામો અંગે સવાલ ઉઠાવ્યા હતા. તેમણે કહ્યું હતું કે છેલ્લા બે-ત્રણ BRICS સંમેલનોથી ભારતને કોઈ નક્કર ફાયદો થયો હોય તેવું દેખાતું નથી. તેમણે સવાલ કર્યો કે ભારત G-20, SCO અને QUAD જેવા અનેક આંતરરાષ્ટ્રીય મંચોનો હિસ્સો છે, પરંતુ આ તમામ જૂથોમાંથી દેશને વાસ્તવમાં શું લાભ મળી રહ્યો છે તે સ્પષ્ટ થવું જોઈએ.
શશી થરૂરે BRICSને ગણાવ્યું મહત્વપૂર્ણ વૈશ્વિક મંચ
ચિદમ્બરમના નિવેદનથી વિપરીત કોંગ્રેસ સાંસદ શશી થરૂરે BRICSને ગ્લોબલ સાઉથ માટે મહત્વપૂર્ણ મંચ ગણાવ્યો છે. તેમણે કહ્યું કે આ જૂથ વિશ્વની મોટી વસ્તી અને વૈશ્વિક GDPમાં નોંધપાત્ર હિસ્સો ધરાવે છે. ભારતમાં વિદેશી રાષ્ટ્રપ્રમુખોનું એકત્ર થવું દેશની રાજદ્વારી ક્ષમતા અને વૈશ્વિક પ્રતિષ્ઠા દર્શાવે છે. જોકે, થરૂરે BRICSના સભ્ય દેશો વચ્ચે વૈશ્વિક મુદ્દાઓ પર સહમતિ બનાવવામાં પડકારો અને વેપાર અસંતુલન જેવા મુદ્દાઓનો પણ સ્વીકાર કર્યો હતો.
ભાજપે કોંગ્રેસના અલગ-અલગ સૂર પર કર્યો કટાક્ષ
કોંગ્રેસના બંને નેતાઓના અલગ-અલગ નિવેદનોને લઈને ભાજપે પણ પ્રહાર કર્યો છે. ભાજપના રાષ્ટ્રીય પ્રવક્તા પ્રદીપ ભંડારીએ કટાક્ષ કરતા કહ્યું કે જ્યારે પણ દેશ આગળ વધે છે અને ભારતનું ગૌરવ વધે છે, ત્યારે કોંગ્રેસ પાર્ટી 'નારાજ ફૂઆ'ની જેમ તેનો વિરોધ કરતી હોય છે. તેમણે કહ્યું કે શશી થરૂરના નિવેદનથી કોંગ્રેસની અંદરના વિરોધાભાસી વલણો સામે આવ્યા છે.
