Caste Census: કોંગ્રેસ પાર્ટીએ જાતિગત વસ્તી ગણતરીના મુદ્દે કેન્દ્રની મોદી સરકારને આડે હાથ લેતા ગંભીર આરોપો લગાવ્યા છે. ગુરુવારે કોંગ્રેસે જણાવ્યું હતું કે સરકારે જાતિગત વસ્તી ગણતરી કરવાની જાહેરાત કર્યાને એક આખું વર્ષ વીતી ગયું હોવા છતાં, આ પ્રક્રિયા કઈ રીતે અને કયા માળખામાં હાથ ધરવામાં આવશે તે અંગે હજુ સુધી કોઈ સ્પષ્ટતા કરવામાં આવી નથી. કોંગ્રેસના મહાસચિવ જયરામ રમેશે આક્ષેપ કર્યો હતો કે વડાપ્રધાન નરેન્દ્ર મોદી વાસ્તવમાં આ જાતિ સર્વેક્ષણને રોકવાનો ઇરાદો ધરાવે છે.
સમયરેખા રજૂ કરી પીએમ મોદીના વલણને ગણાવ્યું 'નાટકીય'
કોંગ્રેસના સંચાર પ્રભારી જયરામ રમેશે સોશિયલ મીડિયા પ્લેટફોર્મ 'X' પર એક વિસ્તૃત પોસ્ટ શેર કરીને આ મુદ્દે સરકારના બદલાતા વલણની સમયરેખા રજૂ કરી હતી. તેમણે નોંધ્યું કે 30 એપ્રિલ, 2025 ના રોજ મોદી સરકારે આગામી વસ્તી ગણતરીમાં જાતિગત ગણતરીનો સમાવેશ કરવાની જાહેરાત કરી હતી. રમેશે આ વલણને વડાપ્રધાનનો "નાટકીય યુ-ટર્ન" ગણાવ્યો હતો. તેમણે ભૂતકાળના સંદર્ભો આપતા જણાવ્યું કે 21 જુલાઈ, 2021 ના રોજ લોકસભામાં ભાજપના જ એક સાંસદના પ્રશ્નના જવાબમાં ગૃહમંત્રીએ સ્પષ્ટ કર્યું હતું કે સરકારે નીતિગત બાબત તરીકે વસ્તીની જાતિવાર ગણતરી ન કરવાનો નિર્ણય લીધો છે. વધુમાં, 21 સપ્ટેમ્બર, 2021 ના રોજ સરકારે સુપ્રીમ કોર્ટમાં સોગંદનામું દાખલ કરીને જણાવ્યું હતું કે જાતિવાર વસ્તી ગણતરી અંગે કોર્ટનો કોઈ પણ નિર્દેશ સરકારના નીતિગત નિર્ણયોમાં દખલગીરી સમાન ગણાશે.
'શહેરી નક્સલ' ટિપ્પણી પર માફીની માંગ
જયરામ રમેશે વધુમાં જણાવ્યું કે કોંગ્રેસ પ્રમુખ મલ્લિકાર્જુન ખડગેએ 16 એપ્રિલ, 2023 ના રોજ વડાપ્રધાનને પત્ર લખીને સામાન્ય વસ્તી ગણતરીની સાથે જાતિ ગણતરી કરાવવાની માંગ કરી હતી. જોકે, 28 એપ્રિલ, 2024 ના રોજ એક મુલાકાત દરમિયાન વડાપ્રધાને આવી માંગને "શહેરી નક્સલ" માનસિકતા ગણાવી હતી. કોંગ્રેસ નેતાએ ભારપૂર્વક માંગ કરી છે કે વડાપ્રધાને આ ટિપ્પણી બદલ કોંગ્રેસ નેતૃત્વની માફી માંગવી જોઈએ અને દેશને સમજાવવું જોઈએ કે 2025માં જાતિ ગણતરીની જાહેરાત કરતી વખતે તેમના વિચારો આ કથિત "શહેરી નક્સલીઓ" થી કેવી રીતે પ્રભાવિત થયા.
પરામર્શનો અભાવ અને વહીવટી શૂન્યતા
કોંગ્રેસનો મુખ્ય આરોપ છે કે જાહેરાતના એક વર્ષ બાદ પણ કોઈ રોડમેપ તૈયાર નથી. જયરામ રમેશે લખ્યું હતું કે, "આ વિષય પર વિરોધ પક્ષો, રાજ્ય સરકારો કે નિષ્ણાતો સાથે કોઈ પરામર્શ કરવામાં આવ્યો નથી". તેમણે ઉમેર્યું કે મલ્લિકાર્જુન ખડગેએ 5 મે, 2025 ના રોજ ફરીથી પ્રધાનમંત્રીને પત્ર લખ્યો હતો, પરંતુ તેનો પણ કોઈ જવાબ મળ્યો નથી. કોંગ્રેસનું માનવું છે કે તાજેતરમાં પૂર્ણ થયેલા સંસદના ખાસ સત્ર બાદ એ વધુ સ્પષ્ટ થઈ ગયું છે કે સરકારની દાનત જાતિ વસ્તી ગણતરીને આગળ ધપાવવાની નથી, પરંતુ તેને કોઈને કોઈ બહાને રોકવાની છે. રમેશે અંતમાં જણાવ્યું કે ખડગેના પત્રમાં ઉઠાવવામાં આવેલા પ્રશ્નો આજે પણ તેટલા જ સુસંગત છે અને દેશ આ પ્રક્રિયાની પારદર્શિતા અંગે જવાબ માંગી રહ્યો છે.
