Bihar Temple Stampede: બિહારના મધેપુરા જિલ્લામાં આવેલા પ્રસિદ્ધ બાબા સિંહેશ્વરનાથ મંદિરમાં શ્રાવણ મહિનાના સોમવારે મોટી ભીડ વચ્ચે અંધાધૂંધી જેવી સ્થિતિ સર્જાઈ હતી. મંદિરનો મુખ્ય દરવાજો ખોલવામાં આવતાં જ ભક્તોમાં ધક્કામુક્કી થતાં પાંચ શ્રદ્ધાળુઓ ઘાયલ થયા હતા. ઘાયલોને તાત્કાલિક જન નાયક કરપુરી ઠાકુર મેડિકલ કોલેજમાં સારવાર માટે ખસેડવામાં આવ્યા હતા. જેમાં એક ભક્તને માથામાં ગંભીર ઈજા થતાં તેની હાલત નાજુક હોવાનું જાણવા મળ્યું છે.
મુખ્ય દરવાજો ખુલતાં જ ધક્કામુક્કી
પ્રત્યક્ષદર્શીઓના જણાવ્યા મુજબ, સિંહેશ્વરનાથ મંદિરમાં રાત્રે લગભગ 12:30 વાગ્યે સત્તાવાર પૂજા શરૂ થઈ હતી. ત્યારબાદ ભક્તો માટે મંદિરના દરવાજા ખોલવામાં આવ્યા હતા. સવારે મોટી સંખ્યામાં શ્રદ્ધાળુઓ દર્શન માટે એકત્ર થયા હતા. ભીડ વધતાં સવારે લગભગ 4 વાગ્યે મુખ્ય દરવાજો ખોલવામાં આવ્યો ત્યારે અચાનક ધક્કામુક્કી શરૂ થઈ હતી અને થોડા સમય માટે નાસભાગ જેવી સ્થિતિ સર્જાઈ હતી.
એક ભક્તને માથામાં ગંભીર ઈજા
અંધાધૂંધી દરમિયાન એક ભક્ત ગ્રીલ પરથી નીચે પડી ગયા હતા. તેમને માથામાં ગંભીર ઈજા થતાં હોસ્પિટલમાં સારવાર માટે ખસેડવામાં આવ્યા હતા અને તેમની હાલત ગંભીર હોવાનું જણાવાયું છે. અન્ય ઘાયલોમાં સુપૌલના સિન્ટુ કુમાર, સહરસાની રૂના દેવી, મધેપુરાના ગ્વાલપારાની સુલેના દેવી સહિત એક અજાણી મહિલા ભક્તનો સમાવેશ થાય છે.
પોલીસકર્મીઓ પણ ઈજાગ્રસ્ત
ભીડને કાબૂમાં લેતી વખતે કેટલાક પોલીસકર્મીઓ પણ ઈજાગ્રસ્ત થયા હોવાનું જાણવા મળ્યું છે. ઘટનાની જાણ થતાં પોલીસ અને વહીવટી તંત્રએ તાત્કાલિક સ્થિતિ સંભાળીને ભીડને નિયંત્રિત કરી હતી. અંધાધૂંધી બાદ તમામ ઘાયલોને મેડિકલ કોલેજમાં સારવાર માટે ખસેડવામાં આવ્યા હતા.
શ્રાવણના સોમવારે મંદિરોમાં મોટી ભીડ
શ્રાવણ મહિનાના સોમવારે શિવ મંદિરોમાં મોટી સંખ્યામાં ભક્તો દર્શન અને પૂજા માટે ઉમટી પડે છે. ભીડને કારણે આવા ધાર્મિક સ્થળોએ અંધાધૂંધીની સ્થિતિ સર્જાવાનું જોખમ રહે છે. તાજેતરમાં લખીસરાયના અશોકધામ મંદિરમાં પણ ભાગદોડની ઘટના બની હતી, જેમાં અનેક લોકોના મોત થયા હતા. સિંહેશ્વરનાથ મંદિરની ઘટનાએ ફરી એકવાર મોટા ધાર્મિક આયોજનો દરમિયાન ભીડ વ્યવસ્થાપન અને સુરક્ષા વ્યવસ્થાની જરૂરિયાત અંગે સવાલો ઉભા કર્યા છે.
