Sam Pitroda Praises PM Modi; Modi Responds with Warm Diwali Wishes: રાજકારણમાં એકબીજાની સામે આકરા પ્રહારો કરતા નેતાઓ વચ્ચે જ્યારે અંગત સંબંધોની ઉષ્મા જોવા મળે ત્યારે તે ચર્ચાનો વિષય બની જાય છે. આવું જ કંઈક કોંગ્રેસના વરિષ્ઠ નેતા અને ઇન્ડિયન ઓવરસીઝ કોંગ્રેસના પ્રમુખ સામ પિત્રોડા તથા વડાપ્રધાન નરેન્દ્ર મોદી વચ્ચે જોવા મળ્યું છે. સામ પિત્રોડાએ એક મુલાકાતમાં વડાપ્રધાન મોદીને પોતાના 'ગુજરાતી મિત્ર' ગણાવ્યા હતા અને તેમના અંગત સ્વભાવનાં વખાણ કર્યા હતા. આ નિવેદન બાદ વડાપ્રધાન મોદીએ પણ સોશિયલ મીડિયા પ્લેટફોર્મ 'X' પર પિત્રોડાને દિવાળી અને ગુજરાતી નવા વર્ષની શુભેચ્છા પાઠવી હતી. ખાસ વાત એ રહી કે મોદીએ તેમને 'સામ ભાઈ' કહીને સંબોધ્યા હતા.
PM મોદીએ 'સામ ભાઈ' અને 'અંજના બેન'ને પાઠવી શુભેચ્છા
સામ પિત્રોડાના નિવેદનનો વીડિયો સામે આવ્યા બાદ વડાપ્રધાન નરેન્દ્ર મોદીએ તેને લગતી પોસ્ટ શેર કરી હતી. આ પોસ્ટના જવાબમાં મોદીએ લખ્યું હતું કે, 'સામ ભાઈ અને અંજના બેન, આપને હેપ્પી દિવાળી અને નૂતન વર્ષાભિનંદન. આવનારું વર્ષ આનંદમય અને સ્વસ્થ રહે તેવી પ્રાર્થના. જય જગન્નાથ!' વડાપ્રધાનના આ સંદેશમાં સામ પિત્રોડાની સાથે તેમનાં પત્ની અંજના પિત્રોડાને પણ શુભેચ્છા પાઠવવામાં આવી હતી. રાજકીય મતભેદો વચ્ચેનો આ હળવો અને ઉષ્માભર્યો સંવાદ સોશિયલ મીડિયા પર ચર્ચાનો વિષય બન્યો છે.
સામ પિત્રોડાએ PM મોદીને ગણાવ્યા 'ગુજરાતી મિત્ર'
આ સમગ્ર ઘટનાની શરૂઆત સામ પિત્રોડાની એક મુલાકાતથી થઈ હતી. વડાપ્રધાન નરેન્દ્ર મોદી વિશે પૂછવામાં આવતાં પિત્રોડાએ કહ્યું હતું કે, 'તેઓ મારા ગુજરાતી મિત્ર છે. એક વ્યક્તિ તરીકે હું તેમનું સન્માન કરું છું. હું અને મારી પત્ની તેમને મળ્યાં છીએ. વ્યક્તિગત સ્તરે તેઓ ખૂબ જ ઉષ્માભર્યા, પ્રેમાળ અને કાળજી રાખનારા રહ્યા છે.' પિત્રોડાએ મોદીને સારા વક્તા અને મહેનતુ વ્યક્તિ પણ ગણાવ્યા હતા. તેમણે વધુમાં કહ્યું હતું કે તેમની અને વડાપ્રધાન વચ્ચે અંગત સ્તરે કોઈ મતભેદ નથી અને બંને વચ્ચે સારા સંબંધો છે.
'વિચારધારા સાથે મતભેદ, વ્યક્તિ સાથે નહીં'
સામ પિત્રોડાએ પોતાના નિવેદનમાં એક મહત્ત્વની વાત પણ સ્પષ્ટ કરી હતી. તેમણે કહ્યું કે વડાપ્રધાન મોદીના વિચારો અને વિચારધારા સાથે તેમને મતભેદ હોઈ શકે છે, પરંતુ તેનો અર્થ એ નથી કે તેમને વ્યક્તિગત રીતે મોદી સામે કોઈ વાંધો છે. પિત્રોડાના જણાવ્યા અનુસાર, તેઓ ગુજરાતમાં વડાપ્રધાનના ઘરે પણ અનેક વખત જઈ ચૂક્યા છે. તેમણે એવો પણ ઉલ્લેખ કર્યો હતો કે કોઈ વ્યક્તિની વિચારધારાનો વિરોધ કરવા છતાં તેની સાથે વ્યક્તિગત સંબંધો સારા હોઈ શકે છે. આમ, પિત્રોડાએ રાજકીય અસહમતિ અને અંગત સંબંધો વચ્ચેનો તફાવત સમજાવવાનો પ્રયાસ કર્યો હતો.
X યુઝરની રમૂજી વિનંતી પર PM મોદીનો જવાબ
વડાપ્રધાન મોદીની સામ પિત્રોડાને પાઠવેલી શુભેચ્છા બાદ સોશિયલ મીડિયા પર એક રમૂજી સંવાદ પણ જોવા મળ્યો હતો. મિહિર ઝા નામના એક X યુઝરે મોદીની પોસ્ટ પર પ્રતિક્રિયા આપતાં હિન્દીમાં લખ્યું હતું કે, 'જો તમે સામ પિત્રોડાને હેપ્પી દિવાળી કહી શકો છો, તો અમને પણ કહી દો મોદીજી.' આ વિનંતીનો વડાપ્રધાને પણ હળવા અંદાજમાં જવાબ આપ્યો હતો. તેમણે લખ્યું હતું, 'આપકો ભી હેપ્પી દિવાલી મિહિર ભાઈ. આવનારી તહેવારોની મોસમ અને વર્ષ શાનદાર રહે.' આ જવાબ સાથે સ્મિતનું ઇમોજી પણ મૂક્યું હતું. આ રીતે એક રાજકીય ચર્ચાની વચ્ચે સોશિયલ મીડિયા પર હળવી ક્ષણ પણ જોવા મળી હતી.
2024ની ચૂંટણીમાં PM મોદીએ પિત્રોડા પર કર્યા હતા આકરા પ્રહાર
સામ પિત્રોડા અને વડાપ્રધાન મોદી વચ્ચેનો આ સંવાદ અગાઉના રાજકીય વિવાદોથી તદ્દન અલગ છે. ખાસ કરીને 2024ની લોકસભા ચૂંટણી દરમિયાન પિત્રોડાના એક નિવેદનને લઈને મોટો વિવાદ થયો હતો. પિત્રોડાએ ભારતના અલગ-અલગ પ્રદેશોના લોકોના શારીરિક દેખાવની સરખામણી આફ્રિકન, ચીની, આરબ અને યુરોપિયન લોકો સાથે કરી હતી. આ નિવેદનને લઈને વડાપ્રધાન મોદીએ તેલંગાણાના વારંગલમાં ચૂંટણી સભા દરમિયાન પિત્રોડા પર આકરા પ્રહાર કર્યા હતા. તેમણે પિત્રોડાને રાહુલ ગાંધીના અમેરિકામાં રહેતા અંકલ ગણાવીને ભારતીયોના દેખાવ અંગેની ટિપ્પણી સામે નારાજગી વ્યક્ત કરી હતી. આ વિવાદ બાદ પિત્રોડાએ ઇન્ડિયન ઓવરસીઝ કોંગ્રેસના અધ્યક્ષ પદેથી રાજીનામું આપ્યું હતું, જોકે થોડા અઠવાડિયા બાદ તેમને ફરીથી આ જવાબદારી સોંપવામાં આવી હતી.
'હુઆ તો હુઆ' અને ઈનહેરિટન્સ ટેક્સ મુદ્દે પણ થયો હતો વિવાદ
વડાપ્રધાન મોદી અને સામ પિત્રોડા વચ્ચે અગાઉ પણ અનેક મુદ્દે રાજકીય ટકરાવ જોવા મળ્યો છે. વર્ષ 2019ની લોકસભા ચૂંટણી દરમિયાન 1984ના શીખ વિરોધી રમખાણો અંગે પિત્રોડાએ કરેલી 'હુઆ તો હુઆ' ટિપ્પણીને લઈને મોટો વિવાદ થયો હતો. આ નિવેદન બદલ પિત્રોડાએ પાછળથી માફી પણ માગી હતી. આ ઉપરાંત 2024ની ચૂંટણી દરમિયાન અમેરિકામાં લાગુ ઈનહેરિટન્સ ટેક્સ અંગે પિત્રોડાની ટિપ્પણીઓ પણ ચર્ચામાં રહી હતી. વડાપ્રધાન મોદીએ આ મુદ્દાને લઈને કોંગ્રેસ પર નિશાન સાધ્યું હતું. આમ, ભૂતકાળમાં એકબીજાની સામે રાજકીય રીતે આકરા નિવેદનો કરનારા બંને નેતાઓ વચ્ચે હવે જોવા મળેલી આ ઉષ્માભરી વાતચીતે સૌનું ધ્યાન ખેંચ્યું છે.
રાજકીય મતભેદો છતાં અંગત સંબંધોની ચર્ચા
સામ પિત્રોડાના નિવેદન અને વડાપ્રધાન મોદીના જવાબે રાજકીય વર્તુળોમાં એક અલગ જ ચર્ચા જગાવી છે. એક તરફ પિત્રોડાએ મોદીની વ્યક્તિગત રીતે પ્રશંસા કરી છે, તો બીજી તરફ તેમણે વિચારધારાના મુદ્દે પોતાના મતભેદો પણ સ્પષ્ટ રાખ્યા છે. વડાપ્રધાનનો 'સામ ભાઈ' કહીને આપેલો જવાબ પણ આ સમગ્ર ઘટનાને વધુ ચર્ચાસ્પદ બનાવે છે. જોકે, આ સંવાદને રાજકીય નજીકતા કે કોઈ નવા સમીકરણ તરીકે જોવાને બદલે બે નેતાઓ વચ્ચેના અંગત સંબંધોની અભિવ્યક્તિ તરીકે જોવો વધુ યોગ્ય રહેશે.
