Air India CEO Campbell Wilson Resigned: ભારતની પ્રતિષ્ઠિત એરલાઇન એર ઈન્ડિયા હાલમાં તેના સૌથી મુશ્કેલ તબક્કામાંથી પસાર થઈ રહી છે. એક તરફ કંપની આર્થિક સંકટ અને ઓપરેશનલ પડકારોનો સામનો કરી રહી છે, ત્યારે બીજી તરફ કંપનીના સીઈઓ કેમ્પબેલ વિલ્સને તેમના પદ પરથી રાજીનામું આપી દેતા ઉડ્ડયન ક્ષેત્રે ખળભળાટ મચી ગયો છે. જોકે, એર ઈન્ડિયા મેનેજમેન્ટે વિલ્સનને વિનંતી કરી છે કે જ્યાં સુધી નવા સીઈઓની નિમણૂક ન થાય ત્યાં સુધી તેઓ પદ પર કાર્યરત રહે, જેથી નેતૃત્વનું સંક્રમણ સરળતાથી પૂર્ણ કરી શકાય.
વહેલી વિદાયનો સંકેત અને નવી શોધ
કેમ્પબેલ વિલ્સનનો કાર્યકાળ મૂળ રીતે સપ્ટેમ્બર 2026 સુધી ચાલવાનો હતો. પરંતુ, તેમણે અગાઉથી જ સંકેત આપી દીધો હતો કે તેઓ તેમનો કાર્યકાળ લંબાવવા માટે ઉત્સુક નથી. આ સ્થિતિને જોતા, કંપનીએ જાન્યુઆરી 2026 માં જ નવા સીઈઓની શોધ પ્રક્રિયા શરૂ કરી દીધી હતી. હવે વિલ્સનના સત્તાવાર રાજીનામા બાદ આ પ્રક્રિયાને વધુ ઝડપી બનાવવામાં આવી છે. ઉડ્ડયન જગતના સૂત્રોના જણાવ્યા અનુસાર, નવા નેતૃત્વની પસંદગી માટે આવતા અઠવાડિયે એક અત્યંત મહત્વપૂર્ણ બેઠક યોજાવાની છે.
વિલ્સનનો કાર્યકાળ: સફળતા અને પડકારો
જુલાઈ 2022 માં જ્યારે ટાટા ગ્રુપે એર ઈન્ડિયાનું સુકાન કેમ્પબેલ વિલ્સનને સોંપ્યું, ત્યારે તેમની પાસે સિંગાપોર એરલાઈન્સમાં 26 વર્ષનો બહોળો અનુભવ હતો. તેમના નેતૃત્વમાં એર ઈન્ડિયાએ 'વિસ્તારા' એરલાઈન્સનું સફળતાપૂર્વક વિલીનીકરણ કર્યું, જે ભારતીય ઉડ્ડયન ઇતિહાસની એક જટિલ પ્રક્રિયા હતી. તેમના સમયમાં કંપનીએ કાફલાના વિસ્તરણ માટે સેંકડો નવા વિમાનોના ઓર્ડર આપ્યા અને અનેક વ્યસ્ત રૂટ પર પ્રતિસ્પર્ધી ઈન્ડિગોને પાછળ છોડી માર્કેટ લીડર તરીકે ઉભરી આવી હતી.
ક્રેશની કાળી છાયા અને આર્થિક ફટકો
સફળતાની આ સફર વચ્ચે, 12 જૂન, 2025 ના રોજ અમદાવાદમાં થયેલી ભયાનક વિમાન દુર્ઘટનાએ કંપનીના પાયા હચમચાવી દીધા હતા. એર ઈન્ડિયાનું બોઇંગ ડ્રીમલાઇનર (AI 171) ક્રેશ થતા 241 નિર્દોષ લોકોએ જીવ ગુમાવ્યા હતા. આ દુર્ઘટનાએ એર ઈન્ડિયાની સુરક્ષા વ્યવસ્થા અને જાહેર છબી પર ગંભીર સવાલો ઉભા કર્યા હતા. આ આઘાતમાંથી કંપની હજુ બહાર આવી નથી ત્યાં આર્થિક મોરચે પણ માઠા સમાચાર મળી રહ્યા છે. નાણાકીય વર્ષ 2026 માં એર ઈન્ડિયાને આશરે ₹20,000 કરોડનું નુકસાન થવાની ભીતિ છે, જે કંપનીના ઇતિહાસની અત્યાર સુધીની સૌથી મોટી ખોટ હશે.
વૈશ્વિક પરિસ્થિતિઓ અને વધતો ખર્ચ
એર ઈન્ડિયાની મુશ્કેલીઓમાં મધ્ય પૂર્વના તણાવે પણ વધારો કર્યો છે. યુદ્ધ જેવી સ્થિતિને કારણે એરસ્પેસ પર પ્રતિબંધો લાદવામાં આવ્યા છે, પરિણામે એર ઈન્ડિયાના વિમાનોએ લાંબા રૂટ પર ઉડાન ભરવી પડી રહી છે. આનાથી ઈંધણનો વપરાશ અને ઓપરેશનલ ખર્ચ આસમાને પહોંચ્યા છે. વધુમાં, બોઇંગ અને એરબસ તરફથી નવા વિમાનોની ડિલિવરીમાં થઈ રહેલા વિલંબે કંપનીના વિસ્તરણ પ્લાનને પણ બ્રેક લગાવી દીધી છે.
કેવા સીઈઓની છે જરૂર?
હવે કંપની એવા મજબૂત નેતૃત્વની શોધમાં છે જે આંતરરાષ્ટ્રીય સ્તરનો અનુભવ ધરાવતી હોય. એર ઈન્ડિયાને એવા સીઈઓની જરૂર છે જે 'ફુલ સર્વિસ' અને 'લો કોસ્ટ' બંને બિઝનેસ મોડલની ઊંડી સમજ ધરાવતા હોય અને કંપનીને આર્થિક ખાડામાંથી બહાર કાઢી શકે. નોંધનીય છે કે માત્ર એર ઈન્ડિયા જ નહીં, પણ દેશની સૌથી મોટી એરલાઈન ઈન્ડિગોએ પણ તાજેતરમાં નેતૃત્વ પરિવર્તન જોયું છે, જ્યાં પીટર એલ્બર્સના રાજીનામા બાદ વિલિયમ વોલ્શે સુકાન સંભાળ્યું છે. એર ઈન્ડિયાના નવા સીઈઓ માટે આગામી સમય કાંટાની સેજ સમાન હશે, કારણ કે તેમણે માત્ર નુકસાન ઘટાડવાનું નથી, પરંતુ અમદાવાદ જેવી દુર્ઘટના બાદ મુસાફરોનો વિશ્વાસ પણ પુનઃસ્થાપિત કરવાનો રહેશે.
