WhatsApp Business Paid Messages: 1 ઓક્ટોબર 2026થી વોટ્સએપ બિઝનેસ પ્લેટફોર્મ પર કંપનીઓ દ્વારા ગ્રાહકોને મોકલવામાં આવતા કેટલાક સર્વિસ મેસેજ માટે ચાર્જ ચૂકવવો પડશે. અત્યાર સુધી ગ્રાહક દ્વારા પૂછપરછ કરવામાં આવ્યા બાદ 24 કલાકની કસ્ટમર સર્વિસ વિન્ડો દરમિયાન કંપનીઓ કેટલાક મેસેજ મફતમાં મોકલી શકતી હતી. હવે આ વ્યવસ્થામાં ફેરફાર કરવામાં આવી રહ્યો છે.
1 ઓક્ટોબરથી સર્વિસ મેસેજ પણ પેઇડ થશે
નવા નિયમ હેઠળ કંપનીઓ દ્વારા વોટ્સએપ બિઝનેસ પર મોકલવામાં આવતા સર્વિસ મેસેજ પેઇડ કેટેગરીમાં સામેલ થશે. એટલે કંપનીઓએ આવા મેસેજ મોકલવા માટે વોટ્સએપની પેરેન્ટ કંપની મેટાને ફી ચૂકવવી પડશે. ઓર્ડરની પુષ્ટિ, ડિલિવરી અપડેટ અને ગ્રાહક સેવા સાથે જોડાયેલા અન્ય મેસેજ પણ આ બદલાયેલી વ્યવસ્થાનો ભાગ બની શકે છે. દરેક બિઝનેસ નંબરને મહિનામાં પ્રથમ 1,000 સર્વિસ મેસેજ મફતમાં મળવાની જોગવાઈ રહેશે. ત્યારબાદ કર્મચારી અથવા ચેટબોટ દ્વારા મોકલવામાં આવતા દરેક સર્વિસ મેસેજ માટે ચાર્જ લાગશે.
ગ્રાહક તરફથી મોકલેલા મેસેજ પર ચાર્જ નહીં
આ નિયમનો સીધો અમલ ગ્રાહક દ્વારા કંપનીને મોકલવામાં આવતા મેસેજ પર નહીં થાય. ગ્રાહક વોટ્સએપ પર કંપનીનો સંપર્ક કરે ત્યારે તેના મેસેજ માટે કોઈ ચાર્જ લેવામાં આવશે નહીં. જોકે, કંપની તરફથી આપવામાં આવતા સર્વિસ રિપ્લાય માટે નવી પેઇડ વ્યવસ્થા લાગુ થશે. સામાન્ય વોટ્સએપ યુઝર્સ અને નાના વ્યવસાયો માટે ઉપલબ્ધ મફત WhatsApp Business એપ પર આ નિયમ લાગુ નહીં થાય. આ ફેરફાર મુખ્યત્વે WhatsApp Business Platformનો ઉપયોગ કરતી કંપનીઓને અસર કરશે.
24 કલાકની કસ્ટમર સર્વિસ વિન્ડો યથાવત્
ગ્રાહક કંપનીને મેસેજ કરે ત્યારથી 24 કલાકની કસ્ટમર સર્વિસ વિન્ડો શરૂ થાય છે. આ સમયગાળા દરમિયાન કંપની ગ્રાહકને જવાબ આપી શકે છે. જોકે, 1 ઓક્ટોબરથી આ વિન્ડોમાં મોકલવામાં આવતા સર્વિસ મેસેજ માટે નવી ફી લાગુ થશે. કંપની પોતાની તરફથી સર્વિસ મેસેજ મોકલીને નવી વાતચીત શરૂ કરી શકશે નહીં. સર્વિસ મેસેજ માટે ગ્રાહક સાથેની કસ્ટમર સર્વિસ વિન્ડો ખુલ્લી હોવી જરૂરી રહેશે.
માર્કેટિંગ અને યુટિલિટી મેસેજ પહેલેથી પેઇડ
વોટ્સએપ બિઝનેસ પર માર્કેટિંગ, યુટિલિટી અને ઓથેન્ટિકેશન ટેમ્પલેટ મેસેજ માટે કંપનીઓ પાસેથી અગાઉથી ચાર્જ લેવામાં આવે છે. હવે સર્વિસ મેસેજ પણ પેઇડ કેટેગરીમાં સામેલ થશે. મેટા અનુસાર, સર્વિસ મેસેજના દર બજાર પ્રમાણે અલગ હોઈ શકે છે. ભારતમાં તેનો દર યુટિલિટી અને ઓથેન્ટિકેશન મેસેજના દર જેટલો જ રહેશે.
કંપનીઓએ 30 સપ્ટેમ્બર સુધી પેમેન્ટ મેથડ ઉમેરવી પડશે
વોટ્સએપ બિઝનેસ પ્લેટફોર્મનો ઉપયોગ કરતી કંપનીઓએ 30 સપ્ટેમ્બર સુધીમાં પોતાના અકાઉન્ટમાં પેમેન્ટ મેથડ ઉમેરવી પડશે. જો કંપની પેમેન્ટ મેથડ ઉમેરશે નહીં, તો 1 ઓક્ટોબરથી તેના સર્વિસ મેસેજની ડિલિવરી અટકાવવામાં આવી શકે છે.
દરેક WhatsApp મેસેજ પર ચાર્જ નહીં લાગે
નવા નિયમનો અર્થ એવો નથી કે વોટ્સએપ બિઝનેસ પર મોકલવામાં આવતા દરેક મેસેજ માટે કંપનીઓએ પૈસા ચૂકવવા પડશે. મેટાએ ફ્રી એન્ટ્રી પોઇન્ટ વિન્ડોમાં કોઈ ફેરફાર કર્યો નથી. જો કોઈ ગ્રાહક એવી જાહેરાત પર ક્લિક કરીને વોટ્સએપ પર આવે છે, જેમાં સીધી વોટ્સએપ ચેટ શરૂ કરવાનો વિકલ્પ હોય, તો સંબંધિત ફ્રી એન્ટ્રી પોઇન્ટ વિન્ડો દરમિયાન મોકલવામાં આવતા મેસેજની ડિલિવરી મફત રહેશે.
કંપનીઓ માટે વધશે કસ્ટમર સર્વિસનો ખર્ચ
આ નવા નિયમની સીધી અસર WhatsApp Business Platformનો ઉપયોગ કરતી કંપનીઓ પર પડશે. ખાસ કરીને મોટી સંખ્યામાં ગ્રાહકો સાથે વોટ્સએપ મારફતે કસ્ટમર સર્વિસ સંભાળતી કંપનીઓ માટે સર્વિસ મેસેજનો ખર્ચ વધી શકે છે. બીજી તરફ, સામાન્ય ગ્રાહકો કંપનીને મેસેજ મોકલે ત્યારે તેના માટે કોઈ ચાર્જ ચૂકવવો પડશે નહીં.
