Android's 'SMS of Death' Vulnerability: સ્માર્ટફોનની દુનિયામાં સાયબર સુરક્ષાને લઈને એક મોટો ખતરો સામે આવ્યો છે, જેને 'SMS ઓફ ડેથ' (SMS of Death) નામ આપવામાં આવ્યું છે. આ એક એવી ટેકનિકલ ખામી (Vulnerability) છે જે એન્ડ્રોઇડ સ્માર્ટફોનને સંપૂર્ણપણે ઠપ કરીને નકામા બનાવી શકે છે. આ સુરક્ષા ખામીની શોધ સાયબર સિક્યોરિટી રિસર્ચર માર્ક બ્લાસ્ઝિકે (Mark Blaszczyk) કરી છે. આ એટેકની સૌથી ખાસ અને ડરવા લાયક વાત એ છે કે તે એક 'ઝીરો-ક્લિક' (Zero-Click) એટેક છે, એટલે કે યુઝરે મેસેજ ખોલવાની કે કોઈ લિંક પર ક્લિક કરવાની પણ જરૂર પડતી નથી. માત્ર એક ખાસ પ્રકારનો ડેટા મેસેજ ફોનમાં આવતાની સાથે જ સિસ્ટમ પર તેની ખરાબ અસર પડે છે.
કેવી રીતે કામ કરે છે આ એટેક અને કોલિંગ સિસ્ટમ પર અસર?
આ ખતરનાક વલ્નરેબિલિટી સીધી એન્ડ્રોઇડના ટેલિકોમ ફ્રેમવર્ક (WAP Push Parser) પર હુમલો કરે છે. જ્યારે આ પ્રકારનો મેસ્ટ ફોર્મ્ડ મેસેજ ફોનમાં પ્રવેશે છે, ત્યારે એન્ડ્રોઇડ સિસ્ટમ તેને પ્રોસેસ કરવામાં નિષ્ફળ જાય છે અને ફોનની કોલિંગ સર્વિસ મેનેજ કરનાર પ્રક્રિયા ક્રેશ થઈ જાય છે. પરિણામે, ચાલુ કૉલ્સ અચાનક ડિસ્કનેક્ટ થઈ જાય છે અને યુઝર્સ ઈમરજન્સી નંબરો પર પણ ફોન કરી શકતા નથી. રિસર્ચર્સના જણાવ્યા મુજબ, આવા માત્ર 20 જેટલા મેસેજિસ કોઈપણ એન્ડ્રોઇડ સ્માર્ટફોનને સંપૂર્ણપણે કબાડ કે નકામો બનાવી દેવા માટે પૂરતા સાબિત થઈ શકે છે.
બૂટલૂપની સમસ્યા અને ઇનબોક્સમાં મેસેજનું ન દેખાવું
આ સાયબર ખતરાની સૌથી જટિલ બાબત એ છે કે આ હાનિકારક મેસેજ યુઝરના સામાન્ય SMS ઇનબોક્સમાં દેખાતો નથી. સિસ્ટમ જેવો આ મેસેજ વાંચવાનો પ્રયત્ન કરે છે કે તરત જ તે ક્રેશ થઈ જાય છે, જેથી કોઈ નોટિફિકેશન પણ મળતું નથી. આના કારણે ફોન સતત 'બૂટલૂપ' (Bootloop) ની સ્થિતિમાં ફસાઈ જાય છે. ઓપરેટિંગ સિસ્ટમ વારંવાર તે ખામીયુક્ત મેસેજને પ્રોસેસ કરવાનો પ્રયત્ન કરે છે, જેના લીધે ફોન ઓન થઈને ફરી રિસ્ટાર્ટ થયા કરે છે અને સામાન્ય રીતે ચાલુ થઈ શકતો નથી. જો ટેલિકોમ ઓપરેટરના સર્વર પર આ મેસેજ પેન્ડિંગ હોય, તો ફોન રિસેટ થયા પછી પણ ફરી ઓન થતાં જ ક્રેશ થઈ જાય છે.
બચાવના ઉપાય અને ગૂગલ દ્વારા સુરક્ષા સુધારા
આ ગંભીર સુરક્ષા ખામી સામે રક્ષણ મેળવવા માટે ગૂગલ અને એન્ડ્રોઇડ દ્વારા જરૂરી સિક્યોરિટી પેચ તથા ફિક્સ જારી કરવામાં આવ્યા છે. સામાન્ય યુઝર્સે પોતાના સ્માર્ટફોનને સુરક્ષિત રાખવા માટે તાત્કાલિક ધોરણે ફોનની સેટિંગ્સમાં જઈને લેટેસ્ટ સોફ્ટવેર અને સિક્યોરિટી અપડેટ (Software Update) ઇન્સ્ટોલ કરી લેવું જોઈએ. જો કોઈ યુઝરનો ફોન આ પ્રકારની સમસ્યામાં ફસાઈ જાય, તો સામાન્ય ફેક્ટરી રિસેટ કામ ન કરે તેવી સ્થિતિમાં કમ્પ્યુટર અથવા પ્રોફેશનલ ટેકનિકલ સપોર્ટની મદદથી બેકગ્રાઉન્ડમાં રહેલા આ છુપાયેલા મેસેજીસને હટાવવા પડે છે. તમારા ડિવાઇસને હંમેશા અપ-ટૂ-ડેટ રાખવું એ જ આનાથી બચવાનો સૌથી સચોટ ઉપાય છે.
