Apple Partnership with Google: સ્માર્ટફોન અને ટેક્નોલોજી ક્ષેત્રે ભલે Appleનું નામ મોખરે હોય, પરંતુ આર્ટિફિશિયલ ઇન્ટેલિજન્સ (AI) ની રેસમાં કંપની સ્પષ્ટપણે Google અને Samsung જેવી હરીફોથી ઘણી પાછળ પડી ગઈ છે. Galaxy અને Pixel મોડલમાં AIના અદ્યતન ફીચર્સ આવી ચૂક્યા છે, જ્યારે આઇફોન (iPhone) માં તેની ઊણપ સ્પષ્ટ દેખાય છે. આ તમામ પડકારોની વચ્ચે, Appleના CEO ટિમ કૂકે મહત્ત્વની જાહેરાત કરી છે કે કંપની ખૂબ જ જલદી Apple Intelligenceમાં અન્ય AI મોડલનો સપોર્ટ આપશે.
Apple Intelligenceને અન્ય AI મોડલની જરૂર કેમ?
Apple દ્વારા તાજેતરમાં પોતાનું AI પ્લેટફોર્મ 'Apple Intelligence' લોન્ચ કરવામાં આવ્યું હતું, પરંતુ વિશ્લેષકોનું માનવું છે કે તેમાં જોઈએ તેવા ખાસ અને અદ્યતન ફીચર્સ નથી. Appleના AI ફીચર્સ હજી પણ ખૂબ જ સામાન્ય સ્તરના છે. બીજી તરફ, અન્ય AI મોડલ તેમના ચેટબોટ્સને યુઝર્સ સાથે વાતચીત કરવા અને જટિલ કાર્યો કરવામાં સક્ષમ બનાવી ચૂક્યા છે.
Apple અન્ય શક્તિશાળી AI મોડલ સાથે પાર્ટનરશિપ કરવા તરફ વળ્યું
Apple તેના વોઇસ આસિસ્ટન્ટ Siriને અપગ્રેડ કરવા માટે સતત પ્રયત્નશીલ છે અને આ નવા સંસ્કરણને આવતા વર્ષે લોન્ચ કરવામાં આવે તેવી શક્યતા છે. જોકે, પોતાનું AI પ્લેટફોર્મ સક્ષમ ન બની શકતાં, Apple હવે તેના યુઝર્સને અદ્યતન AI ફીચર્સ આપવા માટે અન્ય શક્તિશાળી AI મોડલ સાથે પાર્ટનરશિપ કરવા તરફ વળ્યું છે.
ChatGPT બાદ હવે Google Geminiને સપોર્ટ
Appleના સોફ્ટવેરના વાઇસ પ્રેસિડન્ટ ક્રેગ ફેડેરિઘીએ ગયા વર્ષે જ સંકેત આપ્યો હતો કે કંપની હવે તેની ઓપરેટિંગ સિસ્ટમમાં નવા AI મોડલનો ઉપયોગ કરવાનું વિચારી રહી છે. હવે ટિમ કૂકે આ વાતની પુષ્ટિ આપી છે.
Geminiનો પણ સમાવેશ કરવામાં આવશે
હાલમાં Apple દ્વારા Siriમાં OpenAIના ChatGPT નો સપોર્ટ આપવામાં આવ્યો છે, પરંતુ ટિમ કૂકના નિવેદન મુજબ, હવે બહુ જલદી Googleના શક્તિશાળી AI મોડલ Geminiનો પણ સમાવેશ કરવામાં આવશે. ટિમ કૂકે કહ્યું છે કે Appleનો AIને લઈને જે ઉદ્દેશ છે, તેમાં જો જરૂર પડે તો તેઓ અન્ય AI મોડલ સાથે પાર્ટનરશિપ કરીને પણ તેમના યુઝર્સને નવા ફીચર્સ રજૂ કરશે. આ પાર્ટનરશિપથી Apple તેના હાર્ડવેરની તાકાત સાથે શ્રેષ્ઠ AI સોફ્ટવેર અનુભવ આપી શકશે.
બિઝનેસમાં વધારો, પણ AI પડકાર યથાવત્
AI ક્ષેત્રે પાછળ હોવા છતાં, Appleએ તેના બિઝનેસમાં મજબૂત પ્રદર્શન કર્યું છે. કંપનીએ હાલમાં જ તેના ચોથા ક્વાર્ટરના બિઝનેસ વિશે માહિતી આપી છે, જેમાં છેલ્લા થોડા મહિનામાં 102.5 બિલિયન અમેરિકન ડોલરનું રેવેન્યુ જનરેટ કર્યું છે. જે ગયા વર્ષના સમાન મહિનાની સરખામણીએ 8 ટકાનો વધારો દર્શાવે છે. Apple આશા રાખી રહ્યું છે કે Siriના નવા વર્ઝન દ્વારા તે AI ફીચર્સની આ ઊણપને દૂર કરી શકશે અને આવનારા સમયમાં AI રેસમાં હરીફોને મજબૂત ટક્કર આપી શકશે.
