Aladdin's lamp :ક્યારેક સામાન્ય લાગતી વસ્તુ પણ વ્યક્તિનું નસીબ બદલી શકે છે. આવો જ એક ચોંકાવનારો કિસ્સો ઉત્તર ફ્રાન્સની મહિલાના જીવનમાં બન્યો છે. મહિલાએ જૂની વસ્તુઓના બજારમાંથી માત્ર 20 યુરો (અંદાજે 2,000 રૂપિયા)માં એક કાળો સિરામિક લેમ્પ ખરીદ્યો હતો. જોકે, તેને અંદાજ પણ નહોતો કે આ સામાન્ય દેખાતો લેમ્પ એક દિવસ કરોડો રૂપિયાની કિંમત ધરાવતી કલાકૃતિ સાબિત થશે.
દીકરીની નજરે ચઢ્યું લેમ્પ પરનું નામ
લેમ્પ ખરીદ્યા બાદ મહિલાએ તેને પોતાના ઘરના કબાટમાં મૂકી દીધો હતો. લગભગ એક વર્ષ બાદ ઘરની સફાઈ દરમિયાન તેની પુત્રીની નજર આ લેમ્પ પર પડી. તેણે લેમ્પને ધ્યાનથી તપાસતાં તેના તળિયે કોતરેલું 'જોર્જેસ જૂવે' (Georges Jouve) નામ જોયું. આ નામ ફ્રાન્સના જાણીતા સિરામિક કલાકારનું હોવાનું જાણવા મળતાં માતા-પુત્રીએ તેની કિંમત અને ઓળખ અંગે વધુ તપાસ શરૂ કરી.
નિષ્ણાતોએ અસલી કલાકૃતિ હોવાની કરી પુષ્ટિ
જોર્જેસ જૂવે (1910-1964) યુદ્ધ પછીના સમયગાળાના ફ્રાન્સના જાણીતા સિરામિક કલાકારોમાંના એક હતા. તેમની કલાકૃતિઓ કલાપ્રેમીઓ અને સંગ્રહકારો માટે ખાસ મહત્ત્વ ધરાવે છે. આથી પરિવારે પેરિસના NEO Enchères ઓક્શન હાઉસનો સંપર્ક કર્યો. નિષ્ણાતોએ લેમ્પની તપાસ કર્યા બાદ તે ખરેખર જૂવેની અસલી કલાકૃતિ હોવાનું પ્રમાણિત કર્યું. તેની સારી સ્થિતિ અને દુર્લભ બનાવટને કારણે તેનું મૂલ્ય પણ ઘણું ઊંચું હોવાનું સામે આવ્યું.
અંદાજ કરતાં અનેકગણી ઊંચી કિંમત મળી
ઓક્શન હાઉસે હરાજી પહેલાં આ લેમ્પની કિંમત 80,000થી 1,20,000 યુરો વચ્ચે રહેવાનો અંદાજ લગાવ્યો હતો. 29 ઓક્ટોબર, 2026ના રોજ પેરિસમાં તેની હરાજી યોજાઈ હતી. આ દરમિયાન અનેક સંગ્રહકારોએ તેને ખરીદવામાં રસ દાખવ્યો હતો. અંતે બે યુરોપિયન ખરીદદારો વચ્ચે જોરદાર બોલી લાગી અને ખરીદદારની ફી સહિત લેમ્પની અંતિમ કિંમત 2,51,000 યુરો એટલે કે અંદાજે 2.63 કરોડ રૂપિયા સુધી પહોંચી ગઈ.
કલાકારના લેમ્પ માટે બન્યો નવો રેકોર્ડ
NEO Enchèresના જણાવ્યા અનુસાર, આ અત્યાર સુધીમાં જોર્જેસ જૂવેના કોઈ લેમ્પ માટે હરાજીમાં મળેલી સૌથી ઊંચી કિંમત છે. રસપ્રદ વાત એ છે કે મહિલાએ જે લેમ્પ માત્ર 20 યુરોમાં ખરીદ્યો હતો, તેની હરાજીની કિંમત મૂળ ખરીદ કિંમત કરતાં 12,000 ગણીથી પણ વધુ થઈ ગઈ. એક સામાન્ય જૂના બજારમાંથી શરૂ થયેલી આ ખરીદી આખરે કરોડોની કિંમતની સાબિત થઈ. ખરેખર, મહિલાની આ અનોખી શોધ કોઈ ફિલ્મી વાર્તાથી ઓછી નથી.
