YouTube New View Count Rules: જો તમે પણ યુટ્યૂબ પર વીડિયો બનાવતા હો કે કન્ટેન્ટ ક્રિએશનમાં રસ ધરાવતા હો, તો તમારા માટે એક મહત્વપૂર્ણ અપડેટ આવી છે. પ્લેટફોર્મે તેની વ્યૂ ગણતરીની નીતિમાં મોટો ફેરફાર કર્યો છે. હવે કોઈપણ વીડિયો યુઝરની સ્ક્રીન પર પ્લે થવાનું શરૂ થશે તેની સાથે જ તેને વ્યૂ કાઉન્ટ કરી લેવામાં આવશે, પછી ભલે યુઝર તે વીડિયો પૂરો જોશે કે નહીં. આ નવા ફેરફારના કારણે યુટ્યૂબર્સની ચેનલ પર વીડિયોના કુલ વ્યૂઝની સંખ્યામાં મોટો ઉછાળો જોવા મળશે, જેનાથી ક્રિએટર્સમાં ખુશીનો માહોલ છે.
મોનેટાઇઝેશન માટે નવા પડકારો
યુટ્યૂબથી કમાણી કરવી હવે પહેલાં જેટલી સરળ નહીં રહે. કંપની પોતાના 'યુટ્યૂબ પાર્ટનર પ્રોગ્રામ'ની શરતો વધુ સખત બનાવી રહી છે. અત્યાર સુધી પાછલા એક વર્ષમાં લોંગ-ફોર્મ વીડિયો માટે 4,000 કલાકનો વોચ ટાઈમ મેળવવો જરૂરી હતો, જેને હવે સીધો બમણો કરીને 8,000 કલાક કરી દેવામાં આવ્યો છે. તેવી જ રીતે, યુટ્યૂબ શોર્ટ્સના માધ્યમથી કમાણી કરવા માટે અત્યાર સુધી 90 દિવસમાં 1 કરોડ વ્યૂઝ મેળવવા પડતા હતા, તે મર્યાદા વધારીને હવે સીધી 2 કરોડ વ્યૂઝની કરી દેવામાં આવી છે.
નવા ક્રિએટર્સ માટે જંગ બનશે કમાણી: 2027થી લાગુ થશે આકરા નિયમો
આ નવા પોલિસી ફેરફારો 1 ફેબ્રુઆરી,2027 થી સંપૂર્ણપણે અમલમાં આવશે, જે ખાસ કરીને ડિજિટલ પ્લેટફોર્મ પર નવી સફર શરૂ કરનારા કન્ટેન્ટ ક્રિએટર્સ માટે મોટો પડકાર બની રહેશે. આ આકરા નિયમોના કારણે નવા ક્રિએટર્સ માટે યુટ્યૂબ ચેનલને મોનેટાઇઝ કરાવવી અને તેમાંથી આવક મેળવવાનું કામ અગાઉ કરતાં બમણું મુશ્કેલ બની જશે. જોકે, જેઓ પહેલેથી જ યુટ્યૂબ પાર્ટનર પ્રોગ્રામમાં જોડાયેલા છે, તેમનું મોનેટાઇઝેશન સ્ટેટસ સુરક્ષિત રહેશે; પરંતુ તેમણે 31 જાન્યુઆરી, 2027 સુધીમાં આ નવી શરતો માટે સહમતિ આપવી પડશે.
પ્રીમિયમ સબસ્ક્રિપ્શનથી વધશે કમાણી: સંતુલન જાળવવા પ્લેટફોર્મનો નવો દાવો
યુટ્યૂબે સ્પષ્ટ કર્યું છે કે મોનેટાઇઝેશનના નિયમો આકરા બનાવવાની સાથે તેઓ ક્વોલિટી કન્ટેન્ટ બનાવનારા ક્રિએટર્સને સારો લાભ પણ આપશે. યુટ્યૂબ પ્રીમિયમ સબસ્ક્રિપ્શન આધારિત વીડિયોમાંથી થતી કમાણીનો મોટો હિસ્સો હવે ક્રિએટર્સ સાથે શેર કરવામાં આવશે. કંપનીના દાવા મુજબ, શરતો કડક થવા છતાં યોગ્ય અને ઓરિજિનલ કામ કરનારા ક્રિએટર્સની કુલ આવકમાં આગામી વર્ષોમાં વધારો થશે.
