Australian government health website: વિશ્વમાં પ્રથમ જાહેર થયેલા આવા કિસ્સાઓમાંની એક ઘટનામાં OpenAIના એક AI એજન્ટે ઓસ્ટ્રેલિયાની સરકારી હેલ્થ સ્ટેટિસ્ટિક્સ વેબસાઇટમાં અનધિકૃત પ્રવેશ કર્યો હોવાનું સામે આવ્યું છે. જૂન 2026માં થયેલી આ ઘટનામાં AI એજન્ટે Services Australia દ્વારા સંચાલિત Medicare Statistics Reporting Service Portalમાંથી જાહેર તેમજ કેટલીક બિન-જાહેર ફાઇલો સુધી પહોંચ મેળવી હતી. જોકે, ઓસ્ટ્રેલિયન સરકાર અને OpenAI બંનેએ જણાવ્યું છે કે અત્યાર સુધીની તપાસમાં કોઈ વ્યક્તિગત દર્દીનો Medicare અથવા તબીબી ડેટા ઍક્સેસ થયો હોવાના પુરાવા મળ્યા નથી.
જાહેર દવાઓના ખર્ચ અંગે સંશોધન કરતી વખતે બની ઘટના
ઓસ્ટ્રેલિયન સરકારના જણાવ્યા અનુસાર OpenAIનો AI મોડલ જાહેર દવાઓના ખર્ચ અંગે ઇન્ટરનેટ આધારિત સંશોધન કરી રહ્યો હતો. આ દરમિયાન તે Services Australiaના Medicare Statistics Reporting Service Portal સુધી પહોંચ્યો હતો. પોર્ટલે માંગવામાં આવેલી કેટલીક માહિતી આપવાનો ઇનકાર કર્યા બાદ AI એજન્ટે અન્ય રસ્તો શોધીને સુરક્ષા નિયંત્રણોને પાર કર્યા અને બિન-જાહેર ફાઇલો સુધી પહોંચ મેળવી હતી. આ પોર્ટલ સામાન્ય Medicare અને Pharmaceutical Benefits Schemeના એકત્રિત આંકડા રજૂ કરે છે અને વ્યક્તિગત Medicare ક્લેમ, ચુકવણી અથવા દર્દીઓના મેડિકલ રેકોર્ડ માટે ઉપયોગમાં લેવાતી સિસ્ટમથી અલગ છે. ઓસ્ટ્રેલિયાના કાર્યકારી વડાપ્રધાન રિચર્ડ માર્લ્સે ઘટનાને ગંભીર ગણાવી હતી, પરંતુ વ્યક્તિગત માહિતી સુધી પહોંચ ન થઈ હોવાનું પણ સ્પષ્ટ કર્યું હતું.
OpenAIએ સરકારને લગભગ ત્રણ મહિના બાદ જાણ કરી
આ ઘટનાની સૌથી વધુ ચર્ચા તેની જાણ કરવામાં થયેલા વિલંબને લઈને થઈ રહી છે. 18 જૂને AI એજન્ટે પોર્ટલમાં અનધિકૃત પ્રવેશ કર્યો હતો. OpenAIને 11 ઓગસ્ટની આસપાસ આંતરિક સમીક્ષા દરમિયાન આ પ્રવૃત્તિની જાણ થઈ હતી. ત્યારબાદ 10 સપ્ટેમ્બરે કંપનીએ Services Australiaને ઈમેલ દ્વારા ઘટનાની જાણ કરી હતી. એટલે કે સરકારી પોર્ટલમાં ઘૂસણખોરી થયા બાદ સરકારને જાણ થવામાં લગભગ ત્રણ મહિના લાગ્યા. આ સૂચના Services Australiaના એક જાહેર ઈમેલ ઇનબોક્સમાં મોકલવામાં આવી હતી, જેને સંસ્થા સામાન્ય રીતે સિસ્ટમની નબળાઈ અંગે સંશોધકો અને અન્ય લોકોની જાણ માટે ઉપયોગ કરતી હતી. ત્યારબાદ 15 સપ્ટેમ્બરે Services Australiaએ ઓસ્ટ્રેલિયન સિગ્નલ્સ ડિરેક્ટોરેટ (ASD)ને ઘટનાની જાણ કરી હતી.
સેમ ઓલ્ટમેન સાથે વાતચીતમાં અલ્બાનીઝે વ્યક્ત કર્યો અસંતોષ
ન્યૂયોર્કમાં રહેલા ઓસ્ટ્રેલિયાના વડાપ્રધાન એન્થોની અલ્બાનીઝે OpenAIના CEO સેમ ઓલ્ટમેન સાથે સીધી વાતચીત કરી હતી. અલ્બાનીઝે કંપની દ્વારા સરકારને ઘટનાની જાણ કરવામાં થયેલા લાંબા વિલંબ અને જાહેર ઈમેલ પર મોકલવામાં આવેલી સૂચનાની રીત અંગે ભારે અસંતોષ વ્યક્ત કર્યો હતો. અલ્બાનીઝે આ ઘટનાને ગંભીર અને અસ્વીકાર્ય ગણાવી હતી. તેમના જણાવ્યા અનુસાર, OpenAIએ પણ સ્વીકાર્યું હતું કે કંપની તરફથી ઘટનાની જાણ કરવાની પ્રક્રિયા પૂરતી સારી રહી નહોતી.
દર્દીઓનો વ્યક્તિગત ડેટા ઍક્સેસ થયો નથી
હાલની ફોરેન્સિક તપાસમાં વ્યક્તિગત દર્દીઓના Medicare રેકોર્ડ સુધી AI એજન્ટ પહોંચ્યો હોવાના પુરાવા મળ્યા નથી. OpenAIએ જણાવ્યું છે કે ઍક્સેસ કરવામાં આવેલી માહિતીમાં એકત્રિત આરોગ્ય આંકડા અને આંતરિક ફાઇલોના નામ સામેલ હતા. ઓસ્ટ્રેલિયન સરકારના જણાવ્યા અનુસાર Services Australiaના સમગ્ર નેટવર્કમાં વ્યાપક ઘૂસણખોરી થઈ હોવાનો પણ હાલ કોઈ પુરાવો નથી. જોકે, સરકાર માટે ચિંતાનો મુખ્ય મુદ્દો એ છે કે એક AI એજન્ટે માનવી દ્વારા સ્પષ્ટ રીતે મંજૂરી ન આપવામાં આવેલી રીતથી સરકારી સિસ્ટમના સુરક્ષા નિયંત્રણોને પાર કરીને બિન-જાહેર માહિતી સુધી પહોંચ મેળવી.
સરકારની ટાસ્કફોર્સ કરશે સમગ્ર ઘટનાની તપાસ
ઘટનાની સંપૂર્ણ તપાસ માટે ઓસ્ટ્રેલિયન સરકારે ટાસ્કફોર્સ બનાવવાની જાહેરાત કરી છે. આ તપાસ વડાપ્રધાનના વિભાગના નેતૃત્વ હેઠળ ઓસ્ટ્રેલિયન સિગ્નલ્સ ડિરેક્ટોરેટ અને AI Safety Institute સાથે મળીને કરવામાં આવશે. તપાસમાં AI એજન્ટે કેવી રીતે સુરક્ષા નિયંત્રણો પાર કર્યા, અન્ય સરકારી સિસ્ટમો પર તેની કોઈ અસર થઈ કે નહીં અને ભવિષ્યમાં આવી ઘટનાઓ રોકવા માટે કયા સુરક્ષા પગલાં જરૂરી છે તે સહિતના મુદ્દાઓ તપાસવામાં આવશે. આ ઘટના AI એજન્ટોની વધતી ક્ષમતાઓ સાથે જોડાયેલા સાયબર સુરક્ષા જોખમ અંગે વૈશ્વિક સ્તરે ચર્ચા વધુ તીવ્ર બનાવે છે. ખાસ કરીને એવા AI સિસ્ટમો અંગે સવાલ ઊભો થયો છે કે જે માત્ર માહિતી શોધવા પૂરતી મર્યાદિત ન રહેતા, વેબસાઇટ્સ સાથે સ્વતંત્ર રીતે ક્રિયા પણ કરી શકે છે.
