Oracle Mass Layoffs: ટેક્નોલોજી ક્ષેત્રમાંથી ફરી એકવાર મોટા પાયે છટણીના સમાચાર સામે આવ્યા છે. ઓરેકલ (Oracle)માં કર્મચારીઓને અચાનક નોકરીમાંથી છૂટા કરવામાં આવ્યા હોવાના અહેવાલો સામે આવ્યા છે. કંપની અગાઉ પણ હજારો કર્મચારીઓની છટણી કરી ચૂકી છે, ત્યારે નવી કપાતના અહેવાલથી કર્મચારીઓમાં ચિંતા વધી છે.
સવારે ઈમેઈલ આવ્યો અને નોકરી છીનવાઈ ગઈ
સોમવારે સવારે કેટલાક કર્મચારીઓની આંખ ખુલતાં જ તેમના ઈનબોક્સમાં કંપનીનો ઈમેઈલ જોવા મળ્યો હતો. આ ઈમેઈલમાં કંપનીમાં મોટા પાયે ફેરફાર કરવામાં આવી રહ્યા હોવાનું જણાવાયું હતું અને કેટલાક કર્મચારીઓને તેમની નોકરી સમાપ્ત કરવાની જાણ કરવામાં આવી હતી. અચાનક મળેલા આ સંદેશથી કર્મચારીઓમાં ભારે આઘાત જોવા મળ્યો.
LinkedIn અને Reddit પર કર્મચારીઓએ વ્યક્ત કરી વેદના
નોકરી ગુમાવનારા કર્મચારીઓએ પોતાની આપવીતી સોશિયલ મીડિયા પર શેર કરી છે. LinkedIn અને Reddit જેવા પ્લેટફોર્મ પર અનેક કર્મચારીઓએ છટણી અંગે પોસ્ટ કરી છે. કેટલાક કર્મચારીઓએ વીડિયો શેર કરીને અચાનક નોકરી ગુમાવવાના અનુભવ અને કંપનીના નિર્ણય અંગે પોતાની વાત પણ જણાવી છે.
AI અને ક્લાઉડ બિઝનેસ વચ્ચે છટણી કેમ?
ઓરેકલમાં થઈ રહેલી છટણીને કંપનીના AI અને ક્લાઉડ બિઝનેસના વિસ્તરણ સાથે જોડવામાં આવી રહી છે. કંપની ડેટા સેન્ટર ઈન્ફ્રાસ્ટ્રક્ચરનો વ્યાપ વધારવાની સાથે ખર્ચ અને વર્કફોર્સને પણ મેનેજ કરવાનો પ્રયાસ કરી રહી છે. અહેવાલ મુજબ, ઓરેકલના AI બિઝનેસમાં મોટી માંગ જોવા મળી રહી છે અને કંપનીએ 30 અબજ ડૉલરથી વધુના વધારાના AI ક્લાઉડ કોન્ટ્રેક્ટ પણ સાઈન કર્યા છે.
અગાઉ પણ હજારો કર્મચારીઓની નોકરી ગઈ
હાલની છટણીમાં ઓરેકલે સત્તાવાર રીતે કેટલા કર્મચારીઓને અસર થઈ છે તેનો ચોક્કસ આંકડો જાહેર કર્યો નથી. જોકે, અગાઉની વ્યાપક છટણીમાં આશરે 21,000 કર્મચારીઓની નોકરી ગઈ હોવાના અહેવાલો સામે આવ્યા હતા. કંપનીની વાર્ષિક ફાઇલિંગ મુજબ, વૈશ્વિક કર્મચારીઓની સંખ્યામાં લગભગ 13 ટકાનો ઘટાડો થયો હતો. આ દરમિયાન કર્મચારીઓની સંખ્યા આશરે 1.62 લાખથી ઘટીને 1.41 લાખ રહી હોવાનું જણાવાયું હતું.
