OpenAI AI Agent Hack: ઓસ્ટ્રેલિયામાં ChatGPT બનાવતી કંપની OpenAIના AI એજન્ટે સરકારી વેબ પોર્ટલમાં અનધિકૃત રીતે પ્રવેશ મેળવ્યાનો મામલો સામે આવ્યો છે. વડાપ્રધાન એન્થની અલ્બનીઝે જણાવ્યું કે જૂન 2026માં OpenAIના એક AI એજન્ટે Services Australia દ્વારા સંચાલિત Medicare Statistics Reporting Service Portalમાં અનધિકૃત પ્રવેશ મેળવ્યો હતો. એજન્ટે જાહેર અને બિન-જાહેર બંને પ્રકારની ફાઇલો સુધી પહોંચ મેળવી હતી. સંશોધકોના મતે, આ સ્વાયત્ત AI દ્વારા સરકારી વેબસાઇટમાં ઘૂસણખોરીનો પ્રથમ નોંધાયેલો કિસ્સો હોઈ શકે છે.
AI એજન્ટે કેવી રીતે કરી ઘૂસણખોરી?
ઓસ્ટ્રેલિયન સરકારના જણાવ્યા મુજબ, OpenAIના AI મોડલને જાહેર દવાઓના ખર્ચ અંગે ઇન્ટરનેટ આધારિત સંશોધનનું કામ સોંપવામાં આવ્યું હતું. AI એજન્ટે Medicareના આંકડાકીય પોર્ટલ પાસેથી માહિતી મેળવવાનો પ્રયાસ કર્યો હતો, પરંતુ માહિતી ન મળતાં તેણે સુરક્ષા નિયંત્રણને બાયપાસ કરીને અનધિકૃત રીતે એવી ફાઇલો સુધી પહોંચ મેળવી, જે તે સમયે જાહેર નહોતી. ઓસ્ટ્રેલિયાના કાર્યકારી વડાપ્રધાન અને સંરક્ષણ મંત્રી રિચર્ડ માર્લ્સે આ વર્તનને ગંભીર અને અસ્વીકાર્ય ગણાવ્યું છે.
વ્યક્તિગત મેડિકલ ડેટા એક્સેસ થયો નથી
સરકાર અને OpenAI બંનેના જણાવ્યા મુજબ, આ ઘટનામાં કોઈ વ્યક્તિના વ્યક્તિગત Medicare અથવા મેડિકલ રેકોર્ડ્સ એક્સેસ થયા હોવાના પુરાવા મળ્યા નથી. જે માહિતી સુધી પહોંચ થઈ તેમાં મુખ્યત્વે એકત્રિત આરોગ્ય આંકડા અને કેટલીક આંતરિક ફાઇલોના નામ સામેલ હતા. Medicareનું આ પોર્ટલ વ્યક્તિગત દાવા, ચુકવણી કે દર્દીઓના વ્યક્તિગત રેકોર્ડ સંભાળતી સિસ્ટમથી અલગ છે.
અન્ય ત્રણ સરકારી વિભાગોની પણ તપાસ
આ ઘટના બાદ ઓસ્ટ્રેલિયન સિગ્નલ્સ ડિરેક્ટોરેટ (ASD)ની મદદથી ફોરેન્સિક તપાસ શરૂ કરવામાં આવી છે. તપાસમાં એ પણ જોવામાં આવી રહ્યું છે કે અન્ય સરકારી સિસ્ટમ્સ પર કોઈ અસર થઈ હતી કે નહીં. તેમાં Australian Institute of Health and Welfare (AIHW), Victorian Department of Health અને NSW Bureau of Crime Statistics and Researchનો સમાવેશ થાય છે. જોકે, આ ત્રણેય સિસ્ટમ અંગે થયેલી સામાન્ય ઍક્સેસ અને Medicare પોર્ટલમાં થયેલી અનધિકૃત ઍક્સેસ વચ્ચે સીધી કડી હજુ સરકાર કે OpenAIએ પુષ્ટિ કરી નથી.
OpenAIને ઓગસ્ટમાં ખબર પડી, સરકારને સપ્ટેમ્બરમાં જાણ
આ ઘટના 18 જૂને બની હતી. OpenAIને ઓગસ્ટમાં પોતાના AI મોડલની પ્રવૃત્તિઓની સમીક્ષા દરમિયાન આ અનધિકૃત ઍક્સેસની જાણ થઈ હતી. જોકે, ઓસ્ટ્રેલિયન સરકારને કંપનીએ 10 સપ્ટેમ્બરે ઈમેઇલ દ્વારા માહિતી આપી હતી. વડાપ્રધાન અલ્બનીઝે કહ્યું કે આ માહિતી Services Australiaના એક સામાન્ય જાહેર મેઇલબોક્સ પર મોકલવામાં આવી હતી અને તેને સંબંધિત અધિકારીઓ સુધી પહોંચવામાં પાંચ દિવસ લાગ્યા હતા. તેમણે કંપનીના આ રિપોર્ટિંગ પ્રોટોકોલ સામે નારાજગી વ્યક્ત કરી હતી.
અલ્બનીઝે સેમ ઓલ્ટમેન સાથે કરી વાતચીત
ન્યૂયોર્કમાં સંયુક્ત રાષ્ટ્ર મહાસભા દરમિયાન વડાપ્રધાન અલ્બનીઝે OpenAIના CEO સેમ ઓલ્ટમેન સાથે આ મુદ્દે સીધી વાતચીત કરી હતી. અલ્બનીઝે ઓસ્ટ્રેલિયાની ગંભીર ચિંતા અને કંપની દ્વારા સરકારને મોડેથી જાણ કરવા અંગે નારાજગી વ્યક્ત કરી હતી. સરકારનું કહેવું છે કે ઘટનાની અસર મર્યાદિત રહી હોવા છતાં AI એજન્ટે સરકારી વેબસાઇટમાં અનધિકૃત રીતે પ્રવેશ મેળવ્યો તે બાબત ગંભીર છે.
સરકાર બનાવશે વિશેષ ટાસ્કફોર્સ
આ ઘટનાની વધુ તપાસ માટે ઓસ્ટ્રેલિયન સરકારે વિશેષ ટાસ્કફોર્સ બનાવવાની જાહેરાત કરી છે. તપાસમાં AI એજન્ટે કઈ રીતે સુરક્ષા નિયંત્રણને બાયપાસ કર્યું, કઈ માહિતી સુધી પહોંચ મેળવી અને અન્ય કોઈ સરકારી સિસ્ટમ પર તેની અસર થઈ કે નહીં તે તપાસવામાં આવશે. આ ઘટનાએ સરકારી ડિજિટલ સિસ્ટમ્સમાં AI એજન્ટ્સની સ્વાયત્તતા, સાયબર સુરક્ષા અને ભવિષ્યમાં આવા AI આધારિત હુમલાઓ સામે સુરક્ષાના નિયમો અંગે ચર્ચા વધુ તેજ કરી છે.
