Jensen Huang Resignation News: અમેરિકાની અગ્રણી ટેક કંપની Nvidiaના CEO જેન્સેન હુઆંગના રાજીનામા સાથે જોડાયેલા વિવાદે નવો વળાંક લીધો છે. બ્લૂમબર્ગના અહેવાલ મુજબ, પદ છોડતાં પહેલાંના અંતિમ કલાકોમાં હુઆંગ માનસિક રીતે ખૂબ જ થાકી ગયા હતા અને તેમનો આત્મવિશ્વાસ પણ ડગમગી ગયો હતો. એક સમયે કંપનીની દરેક બાબત પર નિયંત્રણ રાખવા માટે જાણીતા હુઆંગ હવે હાર સ્વીકારતા જોવા મળ્યા હોવાનું અહેવાલમાં જણાવાયું છે. તેમણે પોતાને 'ખૂબ જ ખરાબ માણસ' ગણાવી પસ્તાવો વ્યક્ત કર્યો હોવાનો પણ દાવો કરવામાં આવ્યો છે.
અઠવાડિયાં સુધી CEOની ખુરશી બચાવવા સંઘર્ષ કર્યો
બ્લૂમબર્ગના અહેવાલમાં સૂત્રોના હવાલાથી જણાવાયું છે કે હુઆંગનો અગાઉનો આત્મવિશ્વાસ અને દરેક બાબત પોતાના નિયંત્રણમાં રાખવાનો સ્વભાવ હવે જોવા મળતો નહોતો. CEO તરીકેનું પદ બચાવવા તેમણે અઠવાડિયાં સુધી સંઘર્ષ કર્યો હતો. જોકે, લગ્નેતર સંબંધો અને ચીનની એક કથિત જાસૂસ સાથે જોડાયેલા હોવાના આરોપો બાદ તેમની સ્થિતિ નબળી પડી હતી. અહેવાલ પ્રમાણે, પોતાની બેવફાઈ સ્વીકાર્યા બાદ અને ચીની જાસૂસીના કથિત મામલામાં નામ સામે આવ્યા પછી એક અઠવાડિયાથી પણ ઓછા સમયમાં હુઆંગનો સંઘર્ષ કરવાનો જુસ્સો ખતમ થઈ ગયો હતો. બુધવારે મોડી રાત સુધીમાં તેઓ પસ્તાવાની સ્થિતિમાં પહોંચી ગયા હોવાનું કહેવાય છે.
ટ્રમ્પે પણ કર્યો હતો ફોન, સંઘર્ષ ચાલુ રાખવાની આપી સલાહ
આ સમગ્ર ઘટનાક્રમમાં અમેરિકાના રાષ્ટ્રપતિ ડોનાલ્ડ ટ્રમ્પે પણ હસ્તક્ષેપ કર્યો હોવાનો અહેવાલ છે. અહેવાલ મુજબ, ટ્રમ્પે મંગળવારે હુઆંગને ફોન કરીને પોતાની સ્થિતિ બચાવવા માટે સંઘર્ષ ચાલુ રાખવાની સલાહ આપી હતી. જોકે, ગુરુવારે હુઆંગે રાજીનામું આપી દીધું હોવાનો દાવો કરવામાં આવ્યો છે. વિવાદ ત્યારે વધુ ઘેરો બન્યો જ્યારે અનેક મહિલાઓ સાથે હુઆંગના કથિત સંબંધોની વિગતો સામે આવી હતી. તેમાં ચીનની બિઝનેસવુમન એલિસ હુઆંગનો પણ સમાવેશ થાય છે. અમેરિકાના અધિકારીઓને એલિસ હુઆંગના બેઇજિંગની ગુપ્તચર સેવાઓ સાથે સંબંધો હોવાની શંકા હોવાનું અહેવાલમાં જણાવાયું છે.
રોજેરોજ નવા સ્કેન્ડલ સામે આવ્યા
અહેવાલમાં એવો પણ દાવો કરવામાં આવ્યો છે કે હુઆંગના Nvidiaની એક મહિલા અધિકારી સાથે કથિત સંબંધો હતા. આ અધિકારી સીધા હુઆંગને રિપોર્ટ કરતાં હતાં. ત્યારબાદના અહેવાલોમાં આ અધિકારીની ઓળખ કંપનીના વાઇસ પ્રેસિડેન્ટ કિમ્બર્લી પોવેલ તરીકે કરવામાં આવી હતી. આ આરોપો અને સતત સામે આવતી નવી વિગતોને કારણે હુઆંગની મુશ્કેલીઓ વધી હોવાનું અહેવાલમાં જણાવાયું છે.
વ્હાઇટ હાઉસ સુધી પહોંચ્યો વિવાદ
આ વિવાદની અસર Nvidiaના વ્યવસાય અને પ્રતિષ્ઠા પર પણ પડી રહી હોવાનું કહેવાય છે. ખાસ કરીને આર્ટિફિશિયલ ઇન્ટેલિજન્સ (AI) ક્ષેત્ર પર કડક નજર રાખવામાં આવી રહી છે ત્યારે કંપની માટે આ મામલો વધુ મુશ્કેલી ઊભી કરી શકે છે. આ વિવાદ વોશિંગ્ટન સુધી પણ પહોંચ્યો છે. અહેવાલો અનુસાર, ચીનને ટેક્નોલોજીની નિકાસના મુદ્દાને સંભાળવાની રીતને લઈને વ્હાઇટ હાઉસ વાણિજ્ય મંત્રી હોવર્ડ લુટનિકને પદ પરથી હટાવવા અંગે વિચારણા કરી રહ્યું છે. હુઆંગ એક સમયે પોતાની અપાર ઊર્જા અને નાની-નાની બાબતો પર બારીકાઈથી ધ્યાન આપવા માટે જાણીતા હતા. પરંતુ વધતા વિવાદ વચ્ચે તેમના અંતિમ કલાકોમાં તેઓ 'હવે જે થવાનું હોય તે થાય, મને પરવા નથી' જેવા વલણમાં જોવા મળ્યા હોવાનું અહેવાલમાં જણાવાયું છે.
