Meta Project OT AI Replacement: મેટાના સીઈઓ માર્ક ઝુકરબર્ગે કંપનીને વધુને વધુ AI આધારિત બનાવવાની મહત્વાકાંક્ષી યોજના તૈયાર કરી હતી. આંતરિક સ્તરે આ યોજના 'પ્રોજેક્ટ OT' (Organisational Transformation) તરીકે ઓળખાતી હતી. તેનો હેતુ મોટી ટીમોને નાની અને વધુ કુશળ ટીમોમાં ફેરવીને બાકીનું મોટાભાગનું કામ AI એજન્ટ્સ દ્વારા કરાવવાનો હતો. આ પ્રક્રિયામાં કેટલીક ટીમોના કદમાં 60 ટકા સુધીનો ઘટાડો કરવાની તૈયારી હતી. જોકે, AI એજન્ટ્સ અપેક્ષા મુજબનું પ્રદર્શન ન કરી શકતાં હવે મેટાને આ આક્રમક વ્યૂહરચનામાં ફેરફાર કરવાની ફરજ પડી છે.
AIના ભરોસે છટણીનો પ્લાન, પણ પરિણામ અપેક્ષા મુજબ ન આવ્યું
રિપોર્ટ અનુસાર, મેટાએ આ યોજનાના ભાગરૂપે મે મહિનામાં છટણીનો એક રાઉન્ડ હાથ ધર્યો હતો. ત્યારબાદ નવેમ્બરમાં વધુ એક મોટા રાઉન્ડની છટણી કરવાની તૈયારી હતી, પરંતુ હવે આ નિર્ણય પાછો ખેંચવામાં આવ્યો હોવાનું જાણવા મળે છે. કંપનીના આંતરિક મૂલ્યાંકનમાં સામે આવ્યું કે જે AI એજન્ટ્સ પાસેથી મોટા પાયે કામ કરાવવાની અપેક્ષા હતી, તેઓ હજુ સુધી જરૂરી સ્તરની પ્રોડક્ટિવિટી આપી શક્યા નથી. પરિણામે માનવ કર્મચારીઓને સંપૂર્ણપણે AIથી બદલવાનો પ્લાન મુશ્કેલીમાં મુકાયો છે.
કર્મચારીઓમાં પણ વધી ગયો અસંતોષ
AIને ઝડપથી અપનાવવાની મેટાની નીતિથી કર્મચારીઓમાં પણ ચિંતા વધી હતી. એક તરફ કર્મચારીઓને પોતાના કામમાં AIનો ઉપયોગ કરવા માટે પ્રોત્સાહિત કરવામાં આવી રહ્યા હતા, જ્યારે બીજી તરફ તેમને એવી આશંકા સતાવી રહી હતી કે આ જ ટેક્નોલોજી ભવિષ્યમાં તેમની નોકરીનું સ્થાન લઈ શકે છે. આ સ્થિતિને કારણે કેટલાક વિભાગોમાં કર્મચારીઓનું મનોબળ પણ અસરગ્રસ્ત થયું હોવાનું રિપોર્ટમાં જણાવાયું છે.
અબજોનું રોકાણ છતાં AIની મર્યાદા સામે આવી
મેટાએ છેલ્લા કેટલાક સમયથી AI મોડલ્સ, ડેટા સેન્ટર્સ અને વિશાળ કમ્પ્યુટિંગ ઈન્ફ્રાસ્ટ્રક્ચર પાછળ અબજો ડોલરનું રોકાણ કર્યું છે. કંપની AIને પોતાના ભવિષ્યનો સૌથી મહત્વપૂર્ણ હિસ્સો માને છે. પરંતુ ઓફિસના જટિલ અને વિવિધ પ્રકારના કામને સંપૂર્ણપણે સ્વતંત્ર રીતે સંભાળવામાં AI એજન્ટ્સ હજુ સક્ષમ નથી. આ પ્રયોગે સ્પષ્ટ કર્યું છે કે AI દ્વારા માનવ કર્મચારીઓને મોટા પાયે અને ઝડપથી બદલવા જેટલું સરળ નથી.
ઝુકરબર્ગે બદલ્યો અભિગમ
AI એજન્ટ્સ અપેક્ષા મુજબ ઝડપથી વિકસિત ન થતાં માર્ક ઝુકરબર્ગે હવે વ્યૂહરચનામાં ફેરફાર કર્યો છે. કર્મચારીઓની જગ્યાએ AIને મૂકવા કરતાં હવે નાની અને કુશળ ટીમોની ક્ષમતા વધારવા માટે AIનો ઉપયોગ કરવા પર વધુ ભાર મૂકવામાં આવી રહ્યો છે. અર્થાત્, AI હવે મેટામાં માત્ર કર્મચારીઓની જગ્યાએ કામ કરનાર ટેક્નોલોજી નહીં, પરંતુ કર્મચારીઓને વધુ કાર્યક્ષમ બનાવનાર ટૂલ તરીકે જોવામાં આવી રહ્યું છે.
AI પર મેટાનું રોકાણ યથાવત્
છટણીની વ્યૂહરચનામાં ફેરફાર છતાં મેટાએ AI ક્ષેત્રે પોતાનું રોકાણ ઘટાડ્યું નથી. કંપની હજુ પણ AI મોડલ્સ અને ઈન્ફ્રાસ્ટ્રક્ચર પાછળ મોટાપાયે ખર્ચ કરી રહી છે. હાલની સ્થિતિ મેટા માટે એક મહત્વપૂર્ણ પાઠ સમાન છે—AI કોર્પોરેટ વર્કફોર્સને બદલી શકે છે, પરંતુ હાલના તબક્કે તેને સંપૂર્ણ માનવ વિકલ્પ બનાવવો હજુ પડકારજનક છે.
