LinkedIn: વિશ્વના સૌથી મોટા પ્રોફેશનલ નેટવર્કિંગ પ્લેટફોર્મ LinkedIn પર યુઝર્સની પ્રાઇવસી અને ગોપનીયતાને લઈને ગંભીર સવાલો ઉભા થયા છે. તાજેતરમાં બહાર આવેલા 'બ્રાઉઝરગેટ' રિપોર્ટે ટેક જગતમાં ખળભળાટ મચાવી દીધો છે. આ અહેવાલ અનુસાર, લિંક્ડઇન તેના યુઝર્સના બ્રાઉઝરમાં છૂપી રીતે સ્ક્રિપ્ટ દાખલ કરીને તેમની અંગત માહિતી અને બ્રાઉઝિંગ પેટર્નને ટ્રેક કરી રહ્યું હોવાનું સામે આવ્યું છે. આ સ્ક્રિપ્ટ હજારો ક્રોમ એક્સટેન્શન અને ડિવાઇસના હાર્ડવેર ડેટાને એકત્રિત કરી રહી છે, જે સાયબર સુરક્ષાની દ્રષ્ટિએ અત્યંત જોખમી માનવામાં આવે છે.
શું છે આ 'બ્રાઉઝરગેટ' સ્કેન્ડલ?
Fairlinked EV દ્વારા જાહેર કરવામાં આવેલા અને પ્રસિદ્ધ ટેક વેબસાઇટ 'Bleeping Computer' દ્વારા પુષ્ટિ કરાયેલા આ રિપોર્ટ મુજબ, લિંક્ડઇન દરેક વખતે પેજ લોડ થાય ત્યારે એક વિશેષ જાવાસ્ક્રિપ્ટ (JavaScript) સ્ક્રિપ્ટ યુઝરના બ્રાઉઝરમાં ઇન્જેક્ટ કરે છે. આ સ્ક્રિપ્ટનું મુખ્ય કામ યુઝરના બ્રાઉઝરમાં ઇન્સ્ટોલ કરેલા અંદાજે 6,236 જેટલા ક્રોમ એક્સટેન્શનને સ્કેન કરવાનું છે. આ ટેકનિક એક્સટેન્શનના યુનિક ID સાથે સંકળાયેલા ફાઇલ રિસોર્સિસને એક્સેસ કરવાનો પ્રયાસ કરે છે, જેનાથી પ્લેટફોર્મને ખબર પડી જાય છે કે યુઝર કયા કયા ટૂલ્સનો ઉપયોગ કરી રહ્યો છે.
માત્ર એક્સટેન્શન જ નહીં, હાર્ડવેરની પણ જાસૂસી
ડેટા ટ્રેકિંગનો આ ખેલ માત્ર બ્રાઉઝર એક્સટેન્શન પૂરતો મર્યાદિત નથી. રિપોર્ટમાં ચોંકાવનારો દાવો કરવામાં આવ્યો છે કે લિંક્ડઇન યુઝર્સના ઉપકરણો વિશે અત્યંત ખાનગી તકનીકી માહિતી પણ એકત્રિત કરી રહ્યું છે. જેમાં નીચે મુજબની વિગતોનો સમાવેશ થાય છે:
- CPU કોરોની સંખ્યા અને ઉપલબ્ધ મેમરી (RAM)
- ડિવાઇસની બેટરી સ્ટેટસ અને ચાર્જિંગ લેવલ
- ટાઇમ ઝોન અને લેન્ગ્વેજ સેટિંગ્સ
- સ્ક્રીનનું કદ અને સ્ટોરેજ ક્ષમતા
ઓનલાઇન ગતિવિધિઓ પર ચોકસાઈથી નજર રાખી શકાય
સાયબર નિષ્ણાતોના મતે, આ માહિતીનો ઉપયોગ 'ડિજિટલ ફિંગરપ્રિન્ટિંગ' માટે કરવામાં આવે છે. આ તમામ વિગતોને જોડીને કોઈપણ યુઝરની એક અનોખી ડિજિટલ પ્રોફાઇલ બનાવી શકાય છે, જેના દ્વારા તેની ઓનલાઇન ગતિવિધિઓ પર ચોકસાઈથી નજર રાખી શકાય છે.
તમારી અંગત માહિતી ક્યાં જઈ રહી છે?
આ મામલે વધુ ગંભીરતા ત્યારે વધી જ્યારે રિપોર્ટમાં દાવો કરાયો કે આ એકત્રિત કરવામાં આવેલો ડેટા 'હ્યુમન સિક્યુરિટી' નામની એક સાયબર સિક્યુરિટી ફર્મને મોકલવામાં આવી રહ્યો હોઈ શકે છે. જોકે, હજુ સુધી આ બાબતની સત્તાવાર પુષ્ટિ થઈ નથી. આંકડાઓ દર્શાવે છે કે આ ટ્રેકિંગનો વ્યાપ વર્ષ દર વર્ષે વધી રહ્યો છે. 2025માં જ્યાં માત્ર 2,000 એક્સટેન્શન સ્કેન થતા હતા, તે 2026માં વધીને 6,236 સુધી પહોંચી ગયા છે. આ યાદીમાં લુશા (Lusha), ઝૂમઇન્ફો (ZoomInfo) અને એપોલો (Apollo) જેવા જાણીતા લિંક્ડઇન ટૂલ્સનો પણ સમાવેશ થાય છે.
યુઝર્સ માટે ચિંતાનો વિષય
લિંક્ડઇન જેવા વિશ્વાસપાત્ર પ્લેટફોર્મ દ્વારા કરવામાં આવતી આ પ્રકારની ટ્રેકિંગ પ્રવૃત્તિએ પારદર્શિતા પર મોટા પ્રશ્નો ઉભા કર્યા છે. નિષ્ણાતો સલાહ આપી રહ્યા છે કે યુઝર્સે તેમના બ્રાઉઝર સેટિંગ્સમાં પ્રાઇવસી કંટ્રોલને વધુ કડક બનાવવા જોઈએ અને બિનજરૂરી એક્સટેન્શનને દૂર કરવા જોઈએ. અત્યારે લિંક્ડઇન તરફથી આ રિપોર્ટ અંગે કોઈ સત્તાવાર સ્પષ્ટતા કરવામાં આવી નથી, પરંતુ કરોડો પ્રોફેશનલ યુઝર્સના ડેટાની સુરક્ષા હવે જોખમમાં હોય તેમ જણાય છે.
