India Car Safety News: ભારતમાં વધી રહેલા રોડ અકસ્માતો અને તેના કારણે થતા જીવલેણ બનાવોને રોકવા માટે કેન્દ્રીય સડક પરિવહન અને રાજમાર્ગ મંત્રાલયે એક ઐતિહાસિક નિર્ણય તરફ કદમ વધાર્યા છે. દેશમાં વેચાતી તમામ કારો તેમજ અન્ય મોટા વાહનોમાં એડવાન્સ્ડ ઇમરજન્સી બ્રેકિંગ સિસ્ટમ (AEBS) અને એડવાન્સ ડ્રાઇવર અસિસ્ટન્સ સિસ્ટમ (ADAS) જેવી આધુનિક સ્માર્ટ સુરક્ષા સિસ્ટમ ફરજિયાત બનાવવા માટેનો વિશિષ્ટ ડ્રાફ્ટ રજૂ કરવામાં આવ્યો છે. આ પ્રસ્તાવિત નિયમો પર તમામ ભાગીદારો, વાહન ઉત્પાદકો અને દેશના નાગરિકો પાસેથી 30 દિવસના સમયગાળામાં સૂચનો અને વાંધાઓ મંગાવવામાં આવ્યા છે. સામાન્ય લોકો પાસેથી મળેલા ફીડબેકનો અભ્યાસ કર્યા બાદ આ નિયમોને આખરી ઓપ આપવામાં આવશે.
AEBS ટેક્નોલોજી શું છે અને ADAS સાથે તેનો શો સંબંધ છે?
સરળ ભાષામાં કહીએ તો ADAS (એડવાન્સ ડ્રાઇવર અસિસ્ટન્સ સિસ્ટમ) એ વાહનની સમગ્ર સ્માર્ટ સુરક્ષા સિસ્ટમનું નામ છે, જ્યારે AEBS (ઓટોમેટિક ઇમરજન્સી બ્રેકિંગ સિસ્ટમ) એ ADAS નો જ એક મુખ્ય અને મહત્વપૂર્ણ ભાગ છે. જ્યારે કારની સામે અચાનક કોઈ વાહન, પગપાળા મુસાફર કે અવરોધ આવી જાય અને ડ્રાઇવર સમયસર બ્રેક ન મારે, ત્યારે ગાડીમાં લાગેલા રડાર અને સેન્સર જોખમને ઓળખીને આપમેળે જ ઇમરજન્સી બ્રેક લગાવી દે છે. ADAS ની અંદર લેન કંટ્રોલ અને ડ્રાઇવર એલર્ટ જેવા અન્ય ફીચર્સ પણ આવે છે, પરંતુ સરકારે હાલમાં આ સમગ્ર સુરક્ષા કવચના સૌથી અગત્યના અંગ એવા AEBS ને તબક્કાવાર રીતે અનિવાર્ય બનાવવા માટે કડક ધોરણો નક્કી કર્યા છે.
તબક્કાવાર અમલીકરણ: કાર માટેનો રોડમેપ
સરકારે ઓટોમોબાઇલ ઉદ્યોગને પૂરતો સમય આપવા માટે આ કડક નિયમોને તબક્કાવાર લાગુ કરવાનું આયોજન કર્યું છે:
1 ઓક્ટોબર 2028: જે M1 (પેસેન્જર કાર) અને N1 (હળવા માલવાહક) વાહનોમાં પહેલાંથી જ AEBS સુવિધા મોજૂદ હશે, તેમણે નિર્ધારિત સુરક્ષા માનકો (AIS-185) પૂરા કરવા પડશે.
1 ઓક્ટોબર 2030: દેશમાં લોન્ચ થનારા તમામ 'નવા' પેસેન્જર કાર મોડેલોમાં AEBS ફીચર સ્ટાન્ડર્ડ તરીકે આપવું ફરજિયાત બની જશે.
1 ઓક્ટોબર 2032: અગાઉથી માર્કેટમાં વેચાઈ રહેલા તમામ જૂના કે ચાલુ કાર મોડેલો માટે પણ આ ઓટોમેટિક બ્રેકિંગ નિયમ પૂર્ણપણે અનિવાર્ય કરી દેવામાં આવશે.
સ્ટીયરિંગ, લેન કંટ્રોલ અને ટેક્સીઓ માટે કડક ધોરણો
નવા ડ્રાફ્ટમાં માત્ર બ્રેકિંગ જ નહીં પરંતુ સ્ટીયરિંગ અને લેન જાળવણી સંબંધિત સેફ્ટી ફીચર્સ પર પણ ભાર મૂકવામાં આવ્યો છે. 1 ઓક્ટોબર 2027થી સ્ટીયરિંગ કંટ્રોલ સંબંધિત નવા સ્ટાન્ડર્ડ લાગુ થશે. વધુમાં, 1 ઓક્ટોબર 2029 થી ટેક્સી જેવા કોમર્શિયલ પેસેન્જર વાહનોમાં ડ્રાઇવર ઊંઘી જાય કે તેનું ધ્યાન ભટકે ત્યારે ચેતવણી આપતી 'ડ્રાઇવર ડ્રોઝીનેસ ડિટેક્શન' અને વાહન લેન બહાર જાય ત્યારે એલર્ટ કરતી 'ઇમરજન્સી લેન કિપિંગ સિસ્ટમ' ફરજિયાત કરવાનો પ્રસ્તાવ છે.
હેવી વ્હીકલ્સ અને V2V કનેક્ટિવિટીનું ભવિષ્ય
માર્ગ અકસ્માતોમાં મોટા ભાગે ટ્રક અને બસ જેવા ભારે વાહનો પણ સામેલ હોય છે. આથી જાન્યુઆરી 2027થી નવા ટ્રક અને બસમાં AEBS તેમજ ડ્રાઇવરના 'બ્લાઇન્ડ સ્પોટ' દર્શાવતી સિસ્ટમ ફરજિયાત કરવાની યોજના છે. આ ઉપરાંત 1 ઓક્ટોબર 2027 થી ટ્રકો માટે ઇલેક્ટ્રોનિક સ્ટેબિલિટી કંટ્રોલ (ESC) પણ અનિવાર્ય બનશે. સરકારે 1 ઓક્ટોબર 2028 થી વાહનોમાં 'વ્હીકલ-ટુ-વ્હીકલ' (V2V) કનેક્ટિવિટી લાવવાનો વિચાર પણ રજૂ કર્યો છે, જેનાથી રસ્તા પર ચાલતી ગાડીઓ એકબીજા સાથે સ્પીડ અને લોકેશનનો ડેટા શેર કરીને અકસ્માત પહેલાં જ ચેતવણી આપી શકશે.
