5G Internet to Get Faster Across India: બંધ રૂમમાં જતાં જ 5G ઇન્ટરનેટની સ્પીડ સ્લો થઈ જવાની સમસ્યામાંથી હવે દેશવાસીઓને કાયમી મુક્તિ મળવા જઈ રહી છે. દેશભરમાં 5G નેટવર્કને વધુ મજબૂત અને ઝડપી બનાવવા માટે કેન્દ્ર સરકારે એક અત્યંત મહત્વપૂર્ણ પગલું ભર્યું છે. અત્યાર સુધી ટાવરથી અંતર વધતાં જ સિગ્નલ નબળા પડી જતા હતા, પરંતુ હવે સરકારે વર્ષો જૂના કડક રેડિયેશન નિયમોમાં મોટો ફેરફાર કરીને ગ્રાહકોને સુપરફાસ્ટ કનેક્ટિવિટી આપવાનો માર્ગ સાફ કરી દીધો છે.
રેડિયેશન લિમિટમાં છૂટછાટ: સિગ્નલની રેન્જ થશે સીધી બમણી
કેન્દ્ર સરકારે મોબાઈલ નેટવર્ક માટે ઈલેક્ટ્રોમેગ્નેટિક ફીલ્ડ (EMF) એટલે કે રેડિયેશનની મર્યાદામાં નોંધપાત્ર છૂટછાટ આપી છે. નવા નિયમો હેઠળ 5G બેઝ ટાવર સ્ટેશનની પાવર ડેન્સિટી 5 વોટ પ્રતિ ચોરસ મીટરથી વધારીને 10 વોટ પ્રતિ ચોરસ મીટર કરી દેવામાં આવી છે. આ નિર્ણયથી ટાવરમાંથી નીકળતા મોબાઈલ સિગ્નલ હવે બમણા અંતર સુધી સરળતાથી પહોંચી શકશે. પરિણામે, યુઝર્સને બંધ મકાનો, ભોંયરા કે ટાવરથી દૂરના વિસ્તારોમાં પણ સીમલેસ અને હાઇ-સ્પીડ ઈન્ટરનેટનો અનુભવ મળશે.
વૈશ્વિક ધોરણો અપનાવ્યા: 137 દેશોની હરોળમાં ભારત
ભારતે હવે આંતરરાષ્ટ્રીય સંસ્થા ICNIRP (ઈન્ટરનેશનલ કમિશન ઓન નોન-આયોનાઈઝિંગ રેડિયેશન પ્રોટેક્શન) અને વર્લ્ડ હેલ્થ ઓર્ગેનાઈઝેશન (WHO) દ્વારા નક્કી કરાયેલા વૈશ્વિક રેડિયેશન ધોરણોને અપનાવી લીધા છે. ભારત 2012 થી ખૂબ જ આકરા નિયમોનું પાલન કરતું હતું, જે 5G ટેકનોલોજીની પ્રકૃતિ સાથે સુસંગત નહોતા. હવે નવી 10 વોટની સીમા લાગુ થતાં ભારત બ્રિટન, જાપાન, ઓસ્ટ્રેલિયા, દક્ષિણ કોરિયા અને સિંગાપુર જેવા વિશ્વના 137 વિકસિત દેશોની યાદીમાં સામેલ થઈ ગયું છે.
ટેલિકોમ કંપનીઓને રાહત: નવો ખર્ચ ઘટશે, નેટવર્ક વધશે
આ નિર્ણયથી રિલાયન્સ જીઓ, એરટેલ અને વોડાફોન આઈડિયા જેવી દેશની પ્રમુખ ટેલિકોમ કંપનીઓને મોટો આર્થિક ફાયદો થશે. અત્યાર સુધી થોડા-થોડા અંતરે નવા ટાવરો ઊભા કરવા પડતા હતા, જેના કારણે કંપનીઓનો માળખાકીય ખર્ચ વધી જતો હતો. હવે જૂના અને ઓછા ટાવરોની મદદથી પણ મોટા ભાગને કવર કરી શકાશે. જે કંપનીઓ હાલ 5G રોલઆઉટ કરી રહી છે, તેઓ પોતાના નેટવર્કનું આયોજન હવે વધુ અસરકારક અને ઓછા ખર્ચે કરી શકશે.
આવતા મહિનાથી લાગુ થશે નવા નિયમો
સરકાર દ્વારા જાહેર કરવામાં આવેલા આ નવા અને હળવા રેડિયેશન નિયમો આવતા મહિનાથી સમગ્ર દેશમાં વિધિવત રીતે લાગુ કરી દેવામાં આવશે. 5Gની અદ્યતન ટેકનોલોજી માટે જૂના 2G અને ૩G સમયના નિયમો અડચણરૂપ બની રહ્યા હતા. આ નવા નીતિગત ફેરફારથી ટેલિકોમ ક્ષેત્રને નવી ઊર્જા મળશે અને સામાન્ય નાગરિકો માટે ડિજિટલ ઈન્ડિયાનો અનુભવ વધુ ઝડપી, સરળ અને અડચણરહિત બની રહેશે.
