Flipkart Minutes vs Blinkit UBS Report: ઈ-કોમર્સ ક્ષેત્રે હાલમાં ક્વિક કોમર્સ એટલે કે 10 મિનિટમાં ઘરઆંગણે સામાન પહોંચાડવાનો ક્રેઝ ખૂબ જ ઝડપથી વધી રહ્યો છે. ગ્રાહકો પણ આ ઝડપી સેવાને ભારે પસંદ કરી રહ્યા છે, જેના કારણે ક્વિક કોમર્સ માર્કેટમાં સ્પર્ધા ટક્કરની બની ગઈ છે. આ દરમિયાન સ્વિસ ફાઈનાન્શિયલ સર્વિસીસ કંપની UBS દ્વારા બહાર પાડવામાં આવેલા એક રિપોર્ટમાં દાવો કરવામાં આવ્યો છે કે 'Flipkart Minutes' ખૂબ જ ઝડપથી આગળ વધી રહ્યું છે અને કેટલીક બાબતોમાં તે ક્ષેત્રની લીડર કંપની Blinkitની એકદમ નજીક પહોંચી ગયું છે.
1000 ડાર્ક સ્ટોર્સ અને 130 શહેરોમાં નેટવર્ક મજબૂત
ક્વિક કોમર્સ બિઝનેસમાં વધુમાં વધુ ગ્રાહકો સુધી પહોંચવા માટે ડાર્ક સ્ટોર્સની સંખ્યા વધારવી અત્યંત મહત્વપૂર્ણ માનવામાં આવે છે. UBS રિપોર્ટ અનુસાર, ફ્લિપકાર્ટ મિનિટ્સે દેશના 130થી વધુ શહેરોમાં 1000થી પણ વધુ ડાર્ક સ્ટોર્સનું વિશાળ નેટવર્ક તૈયાર કરી લીધું છે. કંપનીનો મુખ્ય ઉદ્દેશ્ય ગ્રાહકોને ઝડપથી અને ગુણવત્તાસભર સામાન પૂરો પાડવાનો છે.
એવરેજ ઓર્ડર વેલ્યુમાં Blinkitની બરાબરી
રિપોર્ટ દર્શાવે છે કે એવરેજ ઓર્ડર વેલ્યુના કિસ્સામાં ફ્લિપકાર્ટ મિનિટ્સ હવે બ્લિંકિટની ખૂબ જ નજીક પહોંચી ગયું છે. સ્માર્ટફોન અને મોટી ઈલેક્ટ્રોનિક્સ વસ્તુઓની ખરીદીને બાદ કરીએ તો પણ ફ્લિપકાર્ટ મિનિટ્સની સરેરાશ ઓર્ડર વેલ્યુ ₹500થી ₹530ની વચ્ચે રહે છે, જ્યારે બ્લિંકિટ માટે આ આંકડો આશરે ₹518ની આસપાસ છે.
સ્માર્ટફોન અને ઈલેક્ટ્રોનિક્સ કેટેગરીનો મોટો ફાયદો
ફ્લિપકાર્ટ મિનિટ્સને સૌથી મોટો ફાયદો સ્માર્ટફોન અને ઈલેક્ટ્રોનિક્સ ઓર્ડર્સમાંથી મળી રહ્યો છે. ફ્લિપકાર્ટ પાસે ઈ-કોમર્સ ક્ષેત્રે મોબાઈલ અને ઈલેક્ટ્રોનિક્સ વેચવાનો વર્ષોનો અનુભવ છે. જ્યારે ગ્રાહકો ક્વિક કોમર્સ દ્વારા મોબાઈલ કે ગેજેટ્સ ઓર્ડર કરે છે, ત્યારે તેની એવરેજ ઓર્ડર વેલ્યુમાં મોટો ઉછાળો આવે છે, જે ફ્લિપકાર્ટ મિનિટ્સને અન્ય એપ્સ કરતાં વધુ ફાયદો આપે છે.
મેચ્યોર સ્ટોર્સ પર રોજના 1500 ઓર્ડર્સ
ફ્લિપકાર્ટ મિનિટ્સના સામાન્ય ડાર્ક સ્ટોર પર દરરોજ આશરે 800થી 1000 ઓર્ડર્સ આવી રહ્યા છે, જ્યારે જુના અને મેચ્યોર સ્ટોર્સ પર દૈનિક ઓર્ડર્સની સંખ્યા 1200થી 1500 સુધી પહોંચી જાય છે. ક્વિક કોમર્સની આશરે 60% માંગ મેટ્રો શહેરોમાંથી આવે છે, પરંતુ હવે ટાયર-2 અને ટાયર-3 (નાના) શહેરોમાં પણ તેનો વ્યાપ ઝડપથી વધી રહ્યો છે.
બીજા 1000 ડાર્ક સ્ટોર્સ ખોલવાની તૈયારી
ફ્લિપકાર્ટ મિનિટ્સ આવનારા સમયમાં પોતાની બેકએન્ડ ક્ષમતા વધારવા માટે આક્રમક પ્લાનિંગ કરી રહ્યું છે. કંપની આગામી વર્ષના મધ્ય સુધીમાં વધુ 1000 ડાર્ક સ્ટોર્સ ખોલવાની તૈયારી કરી રહી છે. આ વિસ્તરણ બાદ કંપની ગ્રાહકો સુધી પહોંચવાનો સમય વધુ ઘટાડી શકશે અને દરરોજ લાખો ઓર્ડર્સ પ્રોસેસ કરી શકશે.
ક્વિક કોમર્સ માર્કેટ અંગે વિશેષ માહિતી
ક્વિક કોમર્સ સેક્ટરની રેસ: હાલ ભારતીય ક્વિક કોમર્સ માર્કેટમાં Blinkit (Zomato), Zepto, Swiggy Instamart અને Flipkart Minutes વચ્ચે ચતુષ્કોણીય જંગ ખેલાઈ રહ્યો છે. તાજેતરમાં Tata Neu (BB Now) અને Reliance Dunzo પણ આ રેસમાં સક્રિય છે.
ડાર્ક સ્ટોર એટલે શું?: ડાર્ક સ્ટોર એ કોઈ સામાન્ય શોપિંગ મોલ કે દુકાન નથી હોતી, પરંતુ ગ્રાહકો માટે બંધ હોય એવું એક નાનું સ્થાનિક ગોડાઉન હોય છે. જે 2થી 3 કિલોમીટરના વિસ્તારમાં રહેતા ગ્રાહકોને 10થી 15 મિનિટમાં સામાન ડિલિવર કરવા માટે જ ડિઝાઇન કરવામાં આવે છે.
ભારતમાં ક્વિક કોમર્સનું ભવિષ્ય: ઈન્ડસ્ટ્રી રિપોર્ટ્સ મુજબ ભારતીય ક્વિક કોમર્સ માર્કેટ 2026-27 સુધીમાં $5 થી $6 બિલિયન ડોલરથી પણ વધુ મોટું થવાની શક્યતા છે, જેમાં ગ્રોસરી ઉપરાંત ઈલેક્ટ્રોનિક્સ, કપડાં અને બ્યુટી પ્રોડક્ટ્સની ઝડપી ડિલિવરી મુખ્ય ચાલક બળ બનશે.
