Facebook Account Recovery: સોશિયલ મીડિયા અકાઉન્ટ હેક થવું ચિંતાજનક બની શકે છે, કારણ કે હેકર્સ તમારા વ્યક્તિગત ડેટા, ફોટા, મેસેજ અને કોન્ટેક્ટ્સનો દુરુપયોગ કરી શકે છે. જો તમારા Facebook પ્રોફાઇલ ફોટો, પોસ્ટ્સ, કમેન્ટ્સ, મેસેજ અથવા કોન્ટેક્ટ વિગતોમાં તમારી જાણ બહાર ફેરફાર જોવા મળે તો અકાઉન્ટ સાથે ચેડા થયા હોવાની શક્યતા છે. અજાણ્યા લોગિનની ચેતવણી મળવી, ટુ-ફેક્ટર ઓથેન્ટિકેશનમાં સમસ્યા આવવી અથવા અકાઉન્ટમાં લોગિન ન કરી શકવું પણ હેકિંગના સંકેત હોઈ શકે છે.
હેક થયેલું Facebook અકાઉન્ટ કેવી રીતે રિકવર કરવું?
સૌથી પહેલાં શક્ય હોય તો એ જ ફોન, કમ્પ્યુટર અથવા અન્ય ડિવાઇસનો ઉપયોગ કરો, જેમાંથી તમે અગાઉ Facebookમાં લોગિન કર્યું હોય. ત્યારબાદ Facebookનું ‘Forgot account?’ અથવા અકાઉન્ટ રિકવરી વિકલ્પ ખોલો. ત્યાં તમારા અકાઉન્ટ સાથે જોડાયેલો મોબાઇલ નંબર, ઈમેલ એડ્રેસ અથવા જરૂરી હોય તો નામ નાખીને અકાઉન્ટ શોધવાનો પ્રયાસ કરો. Facebookની રિકવરી પ્રક્રિયા ઓળખી શકાય તેવા અકાઉન્ટ માટે આગળના વિકલ્પો બતાવી શકે છે.
મોબાઇલ નંબર કે ઈમેલથી રિકવરી કરો
અકાઉન્ટ મળ્યા બાદ Facebook તમને ઉપલબ્ધ રિકવરી પદ્ધતિ બતાવી શકે છે. તમારા મોબાઇલ નંબર અથવા ઈમેલ પર મળેલો કોડ દાખલ કરો અને સ્ક્રીન પર આપેલા સૂચનો પ્રમાણે આગળ વધો. જો હેકરે અકાઉન્ટ સાથે જોડાયેલો ઈમેલ અથવા ફોન નંબર બદલી નાખ્યો હોય અને સામાન્ય રિકવરી કામ ન કરતી હોય, તો Facebookની હેક થયેલા અકાઉન્ટની રિકવરી પ્રક્રિયાનો ઉપયોગ કરો. જો મોબાઇલ નંબરથી રિકવરી કરી રહ્યા હોવ તો દેશનો કોડ પણ દાખલ કરીને પ્રયાસ કરી શકો છો. ઈમેલ અકાઉન્ટની ઍક્સેસ પણ ગુમાવી હોય તો પહેલાં તમારા ઈમેલ પ્રોવાઇડર મારફતે ઈમેલની ઍક્સેસ પાછી મેળવવાનો પ્રયાસ કરો.
અકાઉન્ટમાં લોગિન થઈ જાય તો તરત આ કામ કરો
અકાઉન્ટ પાછું મળતાની સાથે જ સૌથી પહેલાં પાસવર્ડ બદલો. Facebookમાં લોગિન કર્યા બાદ Profile Picture → Settings & Privacy → Settings → Accounts Center → Password and Security → Change Password પર જાઓ અને નવો પાસવર્ડ સેટ કરો. પાસવર્ડ બદલ્યા બાદ ‘Where you're logged in’ અથવા લોગિન સેશનની વિગતો તપાસો. અજાણ્યા ફોન, કમ્પ્યુટર અથવા લોકેશન પરથી થયેલા લોગિનને Log out કરો. આ પછી અકાઉન્ટ સાથે જોડાયેલા ઈમેલ અને મોબાઇલ નંબર પણ ચેક કરો કે હેકરે તેમાં કોઈ ફેરફાર કર્યો નથી.
મજબૂત પાસવર્ડ અને 2FA ચાલુ કરો
નવો પાસવર્ડ એવો રાખો જે અન્ય કોઈ અકાઉન્ટમાં ઉપયોગમાં ન લીધો હોય. ત્યારબાદ Accounts Center → Password and Security → Two-factor authenticationમાં જઈને ટુ-ફેક્ટર ઓથેન્ટિકેશન ચાલુ કરવું વધુ સુરક્ષિત રહેશે. અકાઉન્ટ રિકવર થયા બાદ અજાણ્યા પોસ્ટ્સ, મેસેજ, કમેન્ટ્સ, પેજ અથવા એપ્સની ઍક્સેસ પણ તપાસો. હેકરે કરેલા કોઈ ફેરફાર દેખાય તો તેને દૂર કરો અને તમારા મિત્રોને પણ જાણ કરો કે અકાઉન્ટ હેક થયું હતું.
રિકવરી કોડ કે પાસવર્ડ કોઈને આપશો નહીં
Facebook રિકવરી દરમિયાન મળેલો OTP, સિક્યુરિટી કોડ અથવા નવો પાસવર્ડ કોઈ વ્યક્તિ સાથે શેર કરશો નહીં. “તમારું અકાઉન્ટ હું રિકવર કરી આપીશ” કહીને કોઈ પૈસા અથવા કોડ માંગે તો સાવચેત રહો. અકાઉન્ટ રિકવરી માટે માત્ર Facebookના સત્તાવાર રિકવરી વિકલ્પોનો જ ઉપયોગ કરો.
