Canada IRCC Relaunches Application Status Tracker: કેનેડામાં અભ્યાસ કરવા, નોકરી કરવા કે પછી કાયમી નિવાસ (PR - Permanent Residency) મેળવવાનું સપ્નં જોતા લાખો વિદેશી અરજદારો માટે ઇમિગ્રેશન વિભાગ તરફથી મહત્વપૂર્ણ અને રાહતના સમાચાર સામે આવ્યા છે. કેનેડાની સરકારી ઇમિગ્રેશન એજન્સી 'ઇમિગ્રેશન, રેફ્યુજીસ એન્ડ સિટિઝનશિપ કેનેડા' (IRCC) દ્વારા 14 ઓક્ટોબર, 2026ના રોજ પોર્ટેબલ અને અપગ્રેડેડ 'એપ્લિકેશન સ્ટેટસ ટ્રેકર' (ATS) ટૂલ ફરીથી સક્રિય કરી દેવામાં આવ્યું છે. આ સુવિધા ઉપલબ્ધ થવાથી હવે અરજદારો પોતાની ઇમિગ્રેશન અરજી કયા તબક્કે પહોંચી છે તે ઘરે બેઠા સરળતાથી જાણી શકશે.
કયા-કયા વિઝા અને પરમિટ માટે ઉપયોગી બનશે આ ટ્રેકિંગ સુવિધા?
IRCC ના જણાવ્યા મુજબ, આ એપ્લિકેશન ટ્રેકર પોર્ટલનો ઉપયોગ કરીને વિવિધ શ્રેણીના અરજદારો પોતાની ફાઇલની સ્થિતિ ચકાસી શકશે. જેમાં સ્ટડી પરમિટ (Study Permit), વર્ક પરમિટ (Work Permit), અને વિઝિટર વિઝા (Visitor Visa)ના ઉમેદવારોનો સમાવેશ થાય છે. આ ઉપરાંત, એક્સપ્રેસ એન્ટ્રી (Express Entry) હેઠળ કાયમી નિવાસ (PR) માટે અરજી કરનારા, એન્હાન્સ્ડ પ્રોવિન્શિયલ નોમિની પ્રોગ્રામ (PNP) ના ઉમેદવારો અને ફેમિલી સ્પોન્સરશિપ (જીવનસાથી અથવા આશ્રિત બાળકોને બોલાવવા) માટે અરજી કરનારા લોકો પણ પોતાની અરજીનું સ્ટેટસ ટ્રેક કરી શકશે.
અરજીના આ 4 મુખ્યાંગોની પ્રોસેસ સરળતાથી સમજી શકાશે
આ નવા ATS ટૂલની સૌથી મોટી ખાસિયત એ છે કે તે અરજીના મુખ્ય 4 તબક્કાઓની અલગ-અલગ સ્થિતિ દર્શાવે છે:
પાત્રતા (Eligibility): અરજદાર તમામ શરતો પૂર્ણ કરે છે કે નહીં.
મેડિકલ પરીક્ષા (Medical Exam): સ્વાસ્થ્ય તપાસ સંબંધિત રિપોર્ટ સ્વીકારાયો છે કે નહીં.
બેકગ્રાઉન્ડ ચેક (Background Check): સુરક્ષા અને પૃષ્ઠભૂમિની ચકાસણીની પ્રગતિ.
બાયોમેટ્રિક્સ (Biometrics): ફિંગરપ્રિન્ટ્સ અને ફોટોગ્રાફની પ્રક્રિયા પૂરી થઈ છે કે નહીં.
સ્ટેટસ મેસેજનો અર્થ કેવી રીતે સમજવો?
ટ્રેકર પોર્ટલ પર ફાઇલની સ્થિતિ દર્શાવવા માટે ખાસ ટેક્નિકલ શબ્દોનો ઉપયોગ કરવામાં આવે છે:
Not Started: સંબંધિત તબક્કાની ચકાસણી હજુ શરૂ થઈ નથી.
Waiting on You: અરજદાર તરફથી કોઈ દસ્તાવેજ કે વધારાની માહિતી આપવાની બાકી છે.
In Progress: અધિકારીઓ દ્વારા તે ભાગની સમીક્ષા ચાલી રહી છે.
Completed: સંબંધિત તબક્કાની ચકાસણી સફળતાપૂર્વક પૂર્ણ થઈ ગઈ છે.
Exempted / Not Applicable: અરજદારને તે ચોક્કસ તબક્કો પૂરો કરવાની જરૂરિયાતમાંથી મુક્તિ આપવામાં આવી છે.
ફાઇલ સ્ટેટસ અને લોગ-ઇન કરવાની રીત
અરજીના અલગ-અલગ વિભાગો ઉપરાંત, સમગ્ર ફાઇલનું 'ઓવરઓલ સ્ટેટસ' (Overall Status) પણ દર્શાવવામાં આવે છે, જેમાં અરજી પ્રાપ્ત થઈ છે (Received), પ્રક્રિયા હેઠળ છે (In Progress) કે ફાઇલ બંધ થઈ ગઈ છે (Closed) તે જાણી શકાય છે. આ ટૂલનો ઉપયોગ કરવા માટે અરજદારે IRCCની સત્તાવાર વેબસાઇટ પર જઈ પોતાના GCKey યુઝરનેમ અને પાસવર્ડ અથવા અધિકૃત સાઇન-ઇન પાર્ટનર મારફતે લોગ-ઇન કરવાનું રહેશે. લોગ-ઇન કરતી વખતે અરજી નંબર (Application Number) અને યુનિક ક્લાયન્ટ આઇડેન્ટિફાયર (UCI) નંબર દાખલ કરવો જરૂરી છે.
અરજદારો માટે મહત્વની સાવચેતી અને સલાહ
અરજીની પળેપળની માહિતી મેળવવા માટે આ ટ્રેકર ખૂબ જ ઉપયોગી છે, પરંતુ ધ્યાનમાં રાખવું જરૂરી છે કે ટ્રેકર પર સ્ટેટસ 'Completed' બતાવે તેનો અર્થ વિઝા કે PR મંજૂર થઈ ગયા એવો થતો નથી. તે માત્ર તે તબક્કો પૂર્ણ થયાનું સૂચવે છે. કોઈપણ વિગતો ચકાસવા માટે હંમેશાં માત્ર અને માત્ર કેનેડા સરકારની સત્તાવાર વેબસાઇટ (canada.ca) નો જ ઉપયોગ કરવો અને અનધિકૃત લિંક્સથી સાવધાન રહેવું.
