Android vs iPhone Features: આજના ડિજિટલ યુગમાં સ્માર્ટફોન ખરીદતી વખતે મોટાભાગના લોકો એવું માને છે કે જે ફોનની કિંમત સૌથી વધારે હશે, તેમાં જ સૌથી વધુ અને બેસ્ટ ફીચર્સ મળશે. ખાસ કરીને એપલના આઇફોન ખરીદતી વખતે ગ્રાહકોના મનમાં આવી જ છાપ હોય છે. જોકે વાસ્તવિકતા કાંઇક અલગ જ છે. ટેકનોલોજીની દુનિયામાં એવા ઘણા ઉદાહરણો છે જ્યાં આઇફોન કરતાં અડધી કે ત્રીજા ભાગની કિંમતમાં મળતા એન્ડ્રોઇડ સ્માર્ટફોન્સમાં ઘણા એવા કામના ફીચર્સ જોવા મળે છે, જે હજુ સુધી લાખો રૂપિયાના આઇફોનમાં પણ આપવામાં આવ્યા નથી. આ જ કારણ છે કે ઘણા યુઝર્સ મોંઘા આઇફોન ખરીદવા છતાં એન્ડ્રોઇડના કેટલાક યુઝર-ફ્રેન્ડલી ફીચર્સને મિસ કરે છે.
પ્લે સ્ટોર સિવાય પણ એપ ડાઉનલોડ કરવાની સુવિધા
એન્ડ્રોઇડ સ્માર્ટફોન યુઝર્સ માટે સૌથી મોટો ફાયદો એ છે કે તેમને પોતાના ફોનમાં થર્ડ-પાર્ટી એપ્લિકેશન્સ ડાઉનલોડ કરવાની સંપૂર્ણ આઝાદી મળે છે, જેને ટેકની ભાષામાં 'સાઇડલોડિંગ' કહેવામાં આવે છે. એટલે કે, જો કોઈ એપ્લિકેશન ગૂગલ પ્લે સ્ટોર પર ઉપલબ્ધ ન હોય, તો પણ યુઝર્સ તેને સત્તાવાર વેબસાઇટ કે અન્ય સુરક્ષિત સોર્સ પરથી APK ફાઇલ ડાઉનલોડ કરીને ઇન્સ્ટોલ કરી શકે છે. તેની સામે એપલ પોતાના iOS ઓપરેટિંગ સિસ્ટમ પર સખત કંટ્રોલ રાખે છે. આઇફોનમાં યુઝર્સ માત્ર એપ સ્ટોર પરથી જ એપ ડાઉનલોડ કરી શકે છે. આવી આઝાદી ન મળવાના કારણે આઇફોન યુઝર્સ કેટલીક ઉપયોગી એપ્સ વાપરવાથી વંચિત રહી જાય છે.
એક જ ફોનમાં બે એકાઉન્ટ: એન્ડ્રોઇડનું અદ્ભુત 'એપ ક્લોન' ફીચર
આજના સમયમાં મોટાભાગના લોકો પાસે બે સિમ કાર્ડ અથવા બે અલગ-અલગ નંબર હોય છે – એક પર્સનલ અને બીજો પ્રોફેશનલ. એન્ડ્રોઇડ સ્માર્ટફોન્સમાં 'એપ ક્લોન' અથવા 'ડ્યુઅલ એપ્સ' નામનું એક શાનદાર ફીચર આપવામાં આવે છે. આ ફીચરની મદદથી યુઝર્સ એક જ ફોનમાં વોટ્સએપ, ફેસબુક કે અન્ય સોશિયલ મીડિયા એપ્સના બે અલગ-અલગ વર્ઝન સરળતાથી ચલાવી શકે છે. પરિણામે પર્સનલ અને ઓફિશિયલ બંને કામ એક જ હેન્ડસેટમાં અલગ-અલગ રાખી શકાય છે. દુઃખની વાત એ છે કે, લાખો રૂપિયા ખર્ચ્યા પછી પણ આઇફોનમાં હજુ સુધી આવું સત્તાવાર ક્લોન ફીચર મળતું નથી.
એકસાથે બે કામ: મલ્ટિટાસ્કિંગ માટે 'સ્પ્લિટ સ્ક્રીન' ફીચર
જો તમે સ્માર્ટફોન પર એકસાથે બે કામ કરવા ટેવાયેલા છો, તો એન્ડ્રોઇડનો 'સ્પ્લિટ સ્ક્રીન' મોડ તમારા માટે આશીર્વાદરૂપ છે. આ ફીચરની મદદથી ફોનની ડિસ્પ્લે સ્ક્રીન બે ભાગમાં વહેંચાઈ જાય છે અને યુઝર એક જ સમયે બે અલગ-અલગ એન્વાયરમેન્ટમાં કામ કરી શકે છે. ઉદાહરણ તરીકે, તમે સ્ક્રીનના ઉપરના ભાગમાં ઈન્સ્ટાગ્રામ પર વીડિયો જોઈ શકો છો અને નીચેના ભાગમાં વોટ્સએપ પર ચેટ કરી શકો છો અથવા નોટ્સ લખી શકો છો. એન્ડ્રોઇડમાં આ ફીચર વર્ષોથી ઉપલબ્ધ છે, પરંતુ આઇફોનની સ્ક્રીન પર એકસાથે બે એપ્સ ચલાવવાનો વિકલ્પ હજુ પણ ગાયબ છે.
એક જ ક્લિકમાં બધી એપ્સ બંધ: 'ક્લિયર ઓલ' કરવાનો સહેલો રસ્તો
દરરોજ આપણે ફોનમાં ડઝનબંધ એપ્સ ઓપન કરતા હોઈએ છીએ. એન્ડ્રોઇડ ફોનમાં રિસન્ટ એપ્સ મેનૂમાં જઈને 'Clear All' અથવા ડસ્ટબિન આઇકોન પર એક ક્લિક કરવાથી બેકગ્રાઉન્ડમાં ચાલતી તમામ એક્ઝિટ થયેલી એપ્સ એકસાથે બંધ થઈ જાય છે. જ્યારે આઇફોનમાં યુઝર્સે તાજેતરમાં ઉપયોગમાં લીધેલી એપ્સને એક-એક કરીને ઉપરની તરફ સ્વાઇપ કરીને મેન્યુઅલી ક્લોઝ કરવી પડે છે. જોકે એપલનું કહેવું છે કે iOS બેકગ્રાઉન્ડ એપ મેનેજમેન્ટ પોતાના સ્તરે શ્રેષ્ઠ રીતે કરે છે, છતાં યુઝર એક્સપિરિયન્સની દ્રષ્ટિએ એન્ડ્રોઇડનો એક-ક્લિક ઓપ્શન વધુ ઝડપી અને સરળ અનુભવ આપે છે.
બે અલગ-અલગ ઓપરેટિંગ સિસ્ટમની પોતાની ખાસિયતો
એપલ આઇફોન તેના પ્રીમિયમ લુક, મજબૂત સિક્યોરિટી અને પાવરફુલ કેમેરા માટે જાણીતો છે, પરંતુ જ્યારે વાત રોજીંદા વપરાશની સુગમતા, ફ્લેક્સિબિલિટી અને કસ્ટમાઇઝેશનની આવે ત્યારે એન્ડ્રોઇડ બાજી મારી જાય છે. ઓપરેટિંગ સિસ્ટમમાં રહેલા આ તફાવતને કારણે જ એન્ડ્રોઇડ ઓછી કિંમતમાં પણ ગ્રાહકોને વધુ સુવિધાઓ પૂરી પાડે છે. હવે જોવાનું એ રહેશે કે એપલ પોતાના આગામી iOS અપડેટ્સમાં આ ઉપયોગી ફીચર્સનો સમાવેશ કરે છે કે કેમ.
