NYC Bans AI In Primary Schools: સમગ્ર વિશ્વમાં હાલ આર્ટિફિશિયલ ઇન્ટેલિજન્સ (AI) ની ચર્ચા છે અને મોટાભાગના લોકો એવું માનવા લાગ્યા છે કે, AI વગર હવે શિક્ષણ કે કામકાજ શક્ય નથી પરંતુ, આ ટેકનોલોજીનો વધુ પડતો અને વિચાર્યા વગરના ઉપયોગ સામે અમેરિકાના ન્યૂયોર્ક સિટીના સત્તાધીશોએ મહત્વપૂર્ણ નિર્ણય લીધો છે. શહેરે પોતાની તમામ પબ્લિક પ્રાઇમરી અને મિડલ શાળાઓમાં AIના ઉપયોગ પર એક વર્ષ માટે સંપૂર્ણ પ્રતિબંધ મૂકી દીધો છે.
40થી વધુ એજ્યુકેશનલ AI ટૂલ્સ પર બૅન
ન્યૂયોર્ક સિટીના મેયર જોહરાન મમદાનીએ બુધવારે જાહેરાત કરતાં જણાવ્યું હતું કે, હાલમાં સ્કૂલના વર્ગખંડોમાં વપરાતા આશરે 40થી વધુ એજ્યુકેશનલ AI ટૂલ્સના ઉપયોગ પર તાત્કાલિક અસરથી રોક લગાવી દેવામાં આવી છે. અમેરિકામાં સ્કૂલો અને બાળકોના ભવિષ્યને ધ્યાનમાં રાખીને AI અંગે લેવાયેલો આ અત્યાર સુધીનો સૌથી મોટો અને કડક નિર્ણય માનવામાં આવી રહ્યો છે. આ નિર્ણય બાદ હવે લોસ એન્જલસ સહિત અન્ય ક્ષેત્રોમાં પણ શાળાઓ માટેના AIના નિયમોની સમીક્ષા શરૂ થઈ ગઈ છે.
"બાળકોને માનવીય સ્પર્શ અને શિક્ષકનો સાથ જોઈએ"
પોતાના આ નિર્ણયનું સમર્થન કરતાં મેયરે સ્પષ્ટ શબ્દોમાં કહ્યું હતું કે, "બાળકોને શીખવા, સમજવા અને માનસિક રીતે વિકસવા માટે AIના પ્રોગ્રામ્સની નહીં પરંતુ, જીવંત શિક્ષકની અને તેમની સાથેના લાગણીસભર જોડાણની જરૂર છે. વિદ્યાર્થીઓએ પોતાના સહપાઠીઓ સાથે મળીને સામાજિક કૌશલ્યો શીખવા જોઈએ અને શિક્ષકો પાસેથી માર્ગદર્શન મેળવી નવી વસ્તુઓ શીખવી જોઈએ."
કયા ધોરણના વિદ્યાર્થીઓ પર પડશે અસર?
આ પ્રતિબંધનો મુખ્ય અમલ ધોરણ-8 સુધીના વિદ્યાર્થીઓ માટે રહેશે. જોકે, હાઇસ્કૂલના વિદ્યાર્થીઓને કેટલાક ચોક્કસ કિસ્સાઓમાં શૈક્ષણિક હેતુ માટે AIનો ઉપયોગ કરવાની મંજૂરી મળશે. આ ઉપરાંત, સિટી એડમિનિસ્ટ્રેશને એ પણ સ્પષ્ટ કર્યું છે કે, શિક્ષકો પોતાની લેસન પ્લાનિંગ, શિડ્યુલિંગ અને વહીવટી કામગીરી સુચારુ બનાવવા માટે AI ટૂલ્સનો ઉપયોગ ચાલુ રાખી શકશે. આ નિર્ણય અંગે ગૂગલ, એન્થ્રોપિક અને માઇક્રોસોફ્ટ જેવી ગ્લોબલ AI કંપનીઓ તરફથી હજુ સુધી કોઈ સત્તાવાર પ્રતિક્રિયા આવી નથી.
શિક્ષણમાં AIનો ઉપયોગ અને વૈશ્વિક ચિંતાઓ
હોમવર્ક અને વિચારશક્તિ પર વિપરીત અસર: હાલના સમયમાં વિદ્યાર્થીઓ સામાન્ય ગણતરીઓથી લઈને એસાઇનમેન્ટ અને નિબંધ લખવા સુધીના તમામ કામો માટે ChatGPT કે અન્ય AI ટૂલ્સ પર નિર્ભર થઈ રહ્યા છે. આનાથી તેમની ક્રિટિકલ થિંકિંગ અને પ્રોબ્લેમ સોલ્વિંગ ક્ષમતા ઘટી રહી હોવાની ચિંતા શિક્ષણશાસ્ત્રીઓ વ્યક્ત કરી રહ્યા છે.
સ્ક્રીન ટાઇમ અને માનસિક સ્વાસ્થ્ય: પ્રાથમિક સ્કૂલના નાના બાળકોમાં સ્ક્રીન ટાઇમ વધવાને કારણે એકાગ્રતાનો અભાવ, આંખોની તકલીફો અને સામાજિક રીતે દૂર થવાની સમસ્યાઓ જોવા મળી રહી છે.
અન્ય દેશોની સ્થિતિ: ફ્રાન્સ, સ્વીડન અને ઓસ્ટ્રેલિયા જેવા દેશોએ પણ સ્કૂલોમાં બાળકો માટે સ્માર્ટફોન અને ડિજિટલ સ્ક્રીનના અતિશય ઉપયોગ પર નિયંત્રણો મૂકવાનું શરૂ કર્યું છે. સ્વીડને તાજેતરમાં જ સ્કૂલોમાં ડિજિટલ લર્નિંગના બદલે ફરીથી પરંપરાગત પુસ્તકો અને પેન-પેપર લર્નિંગ પર ભાર મૂકવાની જાહેરાત કરી છે.
