Ahmedabad Cyber Fraud Traffic E Challan: અમદાવાદમાં ટ્રાફિક ઈ-ચલણના નામે સાયબર ઠગાઈના કિસ્સાઓ સામે આવી રહ્યા છે. વાહનનો સાચો નંબર દર્શાવતો મેસેજ મોકલી લોકોને વિશ્વાસમાં લઈને સાયબર ઠગો નકલી લિન્ક મારફતે મોબાઈલમાં માલિશિયસ એપ્લિકેશન ડાઉનલોડ કરાવી રહ્યા છે. ત્યારબાદ મોબાઈલનો એક્સેસ મેળવી બેંક ખાતામાંથી લાખો રૂપિયા ઉપાડી લેવાના બનાવો સામે આવ્યા છે.
ઈ-ચલણની લિન્ક ખોલી, ખાતામાંથી ₹4.58 લાખ ઉપડી ગયા
ઈસનપુર વિસ્તારમાં કુણાલ ઈન્ફોટેક નામે વ્યવસાય કરતા 38 વર્ષીય કુણાલ પ્રજાપતિના મોબાઈલ પર ગાડી નંબર GJ27AP6801 સાથે ₹1,000નો ટ્રાફિક મેમો ભરવાનો મેસેજ આવ્યો હતો. મેસેજમાં દર્શાવેલો વાહન નંબર સાચો હોવાથી કુણાલે લિન્ક પર ક્લિક કરી હતી. જોકે, આગળ કોઈ પ્રોસેસ થઈ નહોતી. ત્યારબાદ તેમના મોબાઈલ પર એક પછી એક અનેક OTP આવવા લાગ્યા. મોડી રાત્રે તેમના બેંક ખાતામાંથી વારાફરતી 6 ટ્રાન્ઝેક્શન દ્વારા કુલ ₹4.58 લાખ ઉપડી ગયા હોવાના મેસેજ આવ્યા હતા. પૈસા કપાઈ ગયા બાદ તેમણે તાત્કાલિક મોબાઈલ સ્વિચ ઓફ કર્યો અને સાયબર હેલ્પલાઈન 1930 પર સંપર્ક કર્યો હતો. આ મામલે ઈસનપુર પોલીસ સ્ટેશનમાં ફરિયાદ નોંધાવવામાં આવી છે.
બહેરામપુરાના વેપારીને પણ ₹2.21 લાખનો ફટકો
આવો જ બીજો બનાવ બહેરામપુરા વિસ્તારમાં સામે આવ્યો છે. 48 વર્ષીય કલ્પેશ કાલેના મોબાઈલ પર અજાણ્યા નંબર પરથી WhatsApp મારફતે ઈ-ચલણ ભરવાની લિન્ક સાથે તેમના વાહન નંબરનો મેસેજ આવ્યો હતો. વાહન પર ખરેખર ઈ-ચલણ બાકી હોવાનું માની તેમણે લિન્ક ખોલી હતી. ત્યારબાદ તેમના મોબાઈલમાં અચાનક એક એપ્લિકેશન ડાઉનલોડ થઈ ગઈ હતી. બીજા દિવસે બેંક ખાતામાંથી રૂપિયા કપાયાના મેસેજ આવતા તેમણે તપાસ કરી હતી. પ્રાથમિક માહિતી મુજબ, ઠગોએ મોબાઈલનો એક્સેસ મેળવી અલગ-અલગ ટ્રાન્ઝેક્શન મારફતે કુલ ₹2.21 લાખ ઉપાડી લીધા હતા. આ મામલે પણ પોલીસ ફરિયાદ નોંધાઈ છે.
સાચો વાહન નંબર જોઈને લોકો કેવી રીતે ફસાય છે?
સાયબર ઠગો વાહનચાલકોના નંબર સહિતની માહિતી મેળવીને ટ્રાફિક પોલીસ જેવા દેખાતા મેસેજ તૈયાર કરે છે. તેમાં ‘તમારો ઈ-મેમો બાકી છે’ અથવા મેમો ભરવા માટેની લિન્ક મોકલવામાં આવે છે. મેસેજમાં પોતાનો સાચો વાહન નંબર જોઈને વ્યક્તિને તે વિશ્વસનીય લાગે છે. પરંતુ લિન્ક ખોલ્યા બાદ મોબાઈલમાં શંકાસ્પદ APK એપ્લિકેશન ડાઉનલોડ કરાવવાનો પ્રયાસ થઈ શકે છે. આવી એપ્લિકેશનને જરૂરી પરવાનગીઓ મળી જાય તો SMS, સ્ક્રીન અને અન્ય સંવેદનશીલ માહિતી સુધી ઠગો પહોંચ મેળવી શકે છે. ત્યારબાદ બેંકિંગ સાથે જોડાયેલા OTP અથવા અન્ય વિગતોનો દુરુપયોગ કરીને ખાતામાંથી પૈસા ઉપાડવાનો પ્રયાસ કરવામાં આવે છે.
ઈ-ચલણના નામે આવતી લિન્કથી સાવધાન
સાયબર ઠગાઈથી બચવા માટે અજાણ્યા નંબર પરથી મળતી ઈ-ચલણની લિન્ક પર ક્લિક ન કરવી જોઈએ. કોઈ મેમો ખરેખર બાકી છે કે નહીં તે જાણવા માટે સત્તાવાર ટ્રાફિક અથવા સરકારી પોર્ટલ પર જઈને જ ચકાસણી કરવી વધુ સુરક્ષિત છે. અજાણી APK એપ્લિકેશન ડાઉનલોડ કરવી નહીં અને કોઈને પણ OTP, PIN, પાસવર્ડ કે બેંકિંગની સંવેદનશીલ માહિતી આપવી નહીં. જો ખાતામાંથી પૈસા ઉપડી જાય તો શક્ય તેટલી ઝડપથી 1930 સાયબર ક્રાઈમ હેલ્પલાઈન પર સંપર્ક કરવો જરૂરી છે.
